Скачать или смотреть រដ្ឋបាលខេត្តកំពង់ធំ បើកដំណើរការ គម្រោងពង្រឹងសមត្ថភាពគណៈកម្មាធិការខេត្ត ប្រយុទ្ធប្រឆាំង, 659-071025

រដ្ឋបាលខេត្តកំពង់ធំ បើកដំណើរការ គម្រោងពង្រឹងសមត្ថភាពគណៈកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស (គ.ខ.ប.ជ)

(កំពង់ធំ)៖ លោកជំទាវ លំ គន្ធារី អភិបាលរងខេត្តកំពង់ធំ និងលោក ជុំ សាឯម នាយកប្រចាំប្រទេសអង្គការបេសកកម្មយុត្តិធម៌អន្តរជាតិ (IJM) អញ្ចើញជាអធិបតីក្នុងបើកដំណើរការ “គម្រោងពង្រឹងសមត្ថភាពគណៈកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស (គ.ខ.ប.ជ)” របស់អង្គការបេសកកម្មយុត្តិធម៌អន្តរជាតិ (IJM) នៅសាលប្រជុំសាលាខេត្តកំពង់ធំ ថ្ងៃទី០៧ ខែតុលា ឆ្នាំ២០២៥។

ជាមួយគ្នានោះ លោក ជុំ សាឯម បានបង្ហាញនូវគោលបំណងអំពីការបើកដំណើរការនេះ គឺសំដៅទៅលើភារកិច្ច និងសកម្មភាពរបស់អង្គការបេសកកម្មយុត្តិធម៌អន្តរជាតិ (IJM) ព្រមទាំងបង្ហាញពីសារៈសំខាន់ និងគោលបំណងនៃគម្រោងពង្រឹងសមត្ថភាពសគណៈកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស (គ.ខ.ប.ជ) ក្នុងខេត្តគោលដៅ បង្កើនទំនាក់ទំនង និងបង្កើតបណ្តាញទំនាក់ទំនងជាមួយថ្នាក់ដឹកនាំ និងមន្ត្រីលេខាធិការដ្ឋាន គ.ខ.ប.ជ ព្រមទាំងក្រុមការងារថ្នាក់ អន្តរមន្ទីរទាំងប្រាំមួយ។ ព្រមទាំងស្វែងយល់បន្ថែមពីមតិយោបល់ និងបទពិសោធន៍របស់មន្ត្រីលេខាធិការដ្ឋាន និងក្រុមការងារថ្នាក់អន្តរមន្ទីទាំងប្រាំមួយ ពាក់ព័ន្ធនឹងចំណេះដឹង ជំនាញ និងការអនុវត្តន៍ក្នុងការសម្របសម្រួលសកម្មភាពប្រយុទ្ធប្រឆាំងអំពើជួញដូរមនុស្សនៅក្នុងខេត្តកំពង់ធំ។

បន្ថែមពីនេះ លោកនាយកអង្គការបេសកកម្មយុត្តិធម៌អន្តរជាតិ (IJM) ក៏បានថ្លែងអំណរគុណដល់ គណៈកម្មាធិការខេត្ត ដែលបានផ្តល់ការគាំទ្រ ក៏ដូចជាការប្តេជ្ញាចិត្តខិតខំរបស់មន្ត្រី គ.ខ.ប.ជ និងក្រុមការងារទាំងអស់ ដែលជាដៃគូដ៏សំខាន់ក្នុងការបំផុសឱ្យគម្រោងនេះកើតមាន ជាពិសេសវត្តមានរបស់អង្គការដៃគូរ តំណាងសហគមន៏ និងជនធ្លាប់រងគ្រោះ ក្នុងការចូលរួមដាក់អោយដំណើរការកម្មវិធីកសាងសមត្ថភាពដល់ គ.ខ.ប .ជ ខេត្តកំពង់ធំនាពេលនេះ។

ក្នុងពិធីនោះ លោកជំទាវ លំ គន្ធារី បានថ្លែងអំណរគុណចំពោះ អង្គការបេសកកម្មយុត្តិធម៌អន្តរជាតិ (IJM) ដែលបានរៀបចំកម្មវិធីនេះឡើង និងបានជ្រើសរើសយកខេត្តកំពង់ធំ ជាខេត្តគោលដៅក្នុងការអនុវត្តគម្រោងនេះ។

លោកជំទាវ បានបន្តថា រាជរដ្ឋាភិបាលកម្ពុជា គឺផ្តល់ឱកាសជូនប្រជាពលរដ្ឋក្នុងការបង្កើនប្រាក់ ចំណូលទាំងនៅក្នុងស្រុក និងនៅក្រៅស្រុក។ ពលករមួយចំនួនទទួលបានកម្រៃ និងលើកកម្ពស់ជីវភាព បានយ៉ាងល្អតាមការរំពឹងទុក ប៉ុន្តែអ្វីដែលជាការព្រួយបារម្ភនោះគឺ ការធ្វើទេសន្តរប្រវេសន៍ដោយប្រថុយប្រថាន មិនមានការធានាផ្នែកច្បាប់ និងមិនមានការគ្រប់គ្រងច្បាស់លាស់ ដែលនាំឱ្យមានហានិភ័យក្នុងការ កេងប្រវ័ញ្ចកម្លាំពលកម្ម និងមានការជួញដូរមនុស្ស។

លោកជំទាវ បានបន្ថែមថា ក្នុងកិច្ចការងារនេះ គណៈកម្មាធិការប្រយុទ្ធប្រឆាំងអំពើជួញដូរមនុស្ស ដែលមានក្រុមការងារទាំង៦ ជាសេនាធិការ បានយកចិត្តទុកដាក់ក្នុងការអនុវត្តតួនាទី ភារកិច្ចរបស់ខ្លួនបានយ៉ាងល្អប្រសើរ ក្នុងការផ្សព្វផ្សាយដល់ ប្រជាពលរដ្ឋនៅតាមមូលដ្ឋាន រួមទាំងបានស្តារនីតិសម្បទាជនរងគ្រោះ និងបានជួយជនរងគ្រោះដែលត្រូវ បានជនល្មើសកេងប្រវ័ញ្ចកម្លាំងពលកម្ម និងចាញ់បោកមេខ្យល់ខុសច្បាប់ទៅធ្វើការនៅក្រៅប្រទេស។ ដោយមន្ទីរ អង្គភាពជំនាញ និងរដ្ឋបាលក្រុង ស្រុកដែលជាសេនាធិការ ក៏បានបន្តផ្សព្វផ្សាយនៅតាមមូលដ្ឋាន របស់ខ្លួន ជាពិសេសពាក់ព័ន្ធនឹងអំពើជួញដូរមនុស្ស អំពើហិង្សាក្នុងគ្រួសារ កិច្ចអន្តរាគមន៍ជួយជនរង គ្រោះស្ត្រី និងកុមារដោយការបំពាបំពានផ្លូវភេទ និងវិធីសាស្ត្រចំណាកស្រុកដោយសុវត្ថិភាព។

ជាចុងក្រោយលោក ជំទាវ លំ គន្ធារី អភិបាលរងខេត្ត បានណែនាំដល់មន្ត្រីដែលទទួល បន្ទុកការងារប្រយុទ្ធប្រឆាំងអំពើជួញដូរមនុស្ស និងសមាសភាពអង្គការដៃគូ ក្រុមការងារទាំង៦ សូមបន្ត ខិតខំប្រឹងប្រែងបំពេញកាតព្វកិច្ច ដោយមានភាពទំនួលខុសត្រូវ និងត្រូវចូលរួមក្នុងកិច្ចសហការជាមួយ អង្គការ IJM ដើម្បីឱ្យគម្រោងនេះទទួលបានលទ្ធផលល្អប្រសើរ និងចូលរួមសម្រេចបាននូវផែនការ យុទ្ធសាស្ត្រជាតិ ២០២៤-២០២៨ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស។ អត្ថបទដោយសូរហ៊ាន សំអាង រូបភាពដោយ យីម ប៊ុនហ័រ-ពិនិត្យដោយអ៊ុមញឹប។