Wiladagoda Buddhist Monestery | Road trip to Wilpattuwa|මළ සිරුරු දෙස බලා භාවනා කරණ හාමුදුරුවන් සොයා

අලි,කොටි,වලසුන් ගැවසෙන, විල්පත්තුව මහ වන මැද පිහිටා ඇති "විලදගොඩ අරණ්‍යයයේ" වාසය කරණ, මළ සිරුරු දෙස බලා අනිත්‍යය මෙනෙහි කරමින් වැඩ වාසය කරණ භාවනායෝගී හාමුදුරු වරුන් සොයා ගිය ගමන.

ශ්‍රී ලංකා සිතියමේ තද කොල පැහැයෙන් දක්වා ඇති මහා වනාන්තරයක් වූ, විල්පත්තුව ජාතික වනෝද්‍යානය කේන්ද්‍රය කරගත් සංචාරය ආරම්භ වන්නේ සැබැවින්ම සටහන් පොතේ තිබූ පුංචි ලංකා සිතියමට පිං සිදු වන්නටයි.

කොළඹ සිට පුත්තලමටත්, පුත්තලමෙන් එලුවන්කුලම දක්වාත් ගමන් කල අප ඒ අතරමග දී හමු වන සොදුරු නැවතුමක, දෙකක නතර වූයේ තවත් මේ ගමන හරවත් සහ රසවත් කර ගැනීමටයි. අප මින් පෙර සැළසුම් කොට තිබුනේ එලුවන්කුලම සිට මන්නාරම දක්වා විල්පත්තුව මැදින් ගමන් කිරීමටයි. නමුත් අප එලුවන්කුලමට ගිය පසු තොරතුරු සොයාගත්තේ එලුවන්කුලම සිට මන්නාරම දක්වා මාර්ගයේ ඇති පාලම් කැඩී මාර්ගය කලෙක සිටම වසා ඇති බවයි. එතැන සිටි ආරක්ෂක සේවයේ මහතෙකු පවසා සිටියේ " මහත්තුරු යන්න විලච්චියට.. එතැනින් කජුවත්ත පාරෙන් යන්න පුලුවන් මන්නාරම්.. හැබැයි මේ පාරට වඩා ඒක කැඩිලා ඇත්තේ.." යනුවෙනි.

කෙසේ වෙතත් එතැනින් නැවත හැරුනු අප නැවතත් කිලෝමීටර 25කට වැඩි දුරක් ගෙවා නැවත පැමිණියේ පුත්තලමටයි. පුත්තලම සහ නොච්චියාගම අතර මාර්ගයේ සිට කිලෝමීටර විස්සක,තිහක පමණ දුරින් විල්පත්තුව වනාන්තරය මධ්‍යයේ ගල් ගුහා සංකිර්ණයක් ඇති බවත්, එහි "මල මිනී" යොදා ගනිමින් භාවනාවේ නියැලෙන වන වාසී භික්ෂූන් වහන්සේලා වැඩ වාසය කරණ වගත්,මින් පෙර මා හට දැනගන්නට ලැබුනේ මාගේ යූටියුබ් වීඩියෝ නරඹන දරුවකුගේ දැනුවත් කිරීමක් හරහා යි. කෙසේ වෙතත් අප විල්පත්තුව හරහා මන්නාරමට ගමන් කල යුතුමය. මක්නිසාද ‍යත් ලොකු පීරිස් සහ මා ගමන් කල කිසිදු සංචාරයක් මේ වන තුරු අතර මැද අතැර දැමීම හෝ කල් දැමීම සිදු කොට නොමැති නිසාවෙනි.

අප විල්පත්තුවේ වන මැද පිහිටි මේ සොදුරු ආරණ්‍යය සොයා ගමන් අරඹන්නේ සැබැවින්ම අපට ඇති වූ කුතුහලයේ පිපාසය සංසිදුවා ගැනීමටයි. සාලියවැව පොලිසිය මාර්ගයේ සිට කිලෝමීටර පහක හයක පමණ දුරක් ගමන් කල පසු හමුවන්නේ විල්පත්තුව රක්ෂිතයයි. එහිත් තැනෙක දෙකක මාර්ගය ආසන්නයේ කුඩා ගම්මානයක් දෙකක් අපට හමු වූ අතර ඒ සියල්ල පසු කොට හමුවන (තබ්බෝව රක්ෂිතය) විල්පත්තුව ‍රක්ෂිතය යි. කිලෝමීටර විසි අටක පමණ දුරක් ගෙවා ආ පසු, හමු වූයේ අප සොයා පැමිණි පුරාණ "විලදගොඩ ආරණ්‍යයයි."

අප එහි යන විට මධ්‍යහ්නය වී තිබූ අතර මග හමු වූ ගම් වැසියකු කියා සිටියේ " සතියකට උඩදිත් අලියෙක් ගහලා මනුස්සයෙක් මැරුවා මේ පාරෙදි.." "අවුව තියෙන වෙලේ මිසක්.. දෙකෙන් පස්සෙ පංසල් යන්නෙ නෑ ගමේ කෙනෙක් වත්.." යනුවෙනි.

කෙසේ වෙතත් විල්පත්තුව වන මැද පිහිටි මේ පිංබිම මාගේ හදවත නතර කර ගත්තේ කාලයකට නොදුටු.. කාලයකට නොවිදි.. නිදහසක්, සැනසීමක් මනසට සහ හදවතට එකතු කරවමිනි. විටෙක හමා එන සිහින් සුළගට ලෙලෙදෙන අතු අග ඇති ලා දළු කොල, සුදු පැහැති සිහින් වැලි වලින් නිම වී ඇති පොළොව, නිතර ඇසෙන කුරුල්ලන්ගේ කිචි බිචිය අප හට කියා පෑවේ සොබාදහමේ නිදහසයි.

කෙසේවෙතත් අප දෙදෙනාව වැද නමස්කාර කොට නායක ස්වාමීන් වහන්සේගෙන් විමසා සිටියේ මේ පුරාණ සෙනසුණේ යටගියාවයි. උන් වහන්සේ විසින මේ පිළිබද දීර්ඝ විස්තර ගොන්නක් අප හට පවසා ඉනික්බිතිව අප දෙදෙනාව රැගෙන ගියේ මහ වන මැද ඇති විලදගොඩ පංසලේ බොහෝ දෙනා නොදුටු නොපැමිණි ඉසව් කිහිපයකටයි.

ආරණ්‍යයයෙන් වනාන්තරය පෙදෙසට ගමන් ගන්නා ඕනෑම අයෙකුට දැක ගැනීමට ලැබෙන්නේ හිදි පිළිමයකි. එහි එක් පසෙක ඇත්තේ මියුනු මිනිසෙකුගේ ඇට සැලිල්ලකි. මේ ඇට සැලිල්ල නායක ස්වාමීන් වහන්සේට පූජා කොට ඇත්තේ මෙහි පෙර සේවය කල උපස්ථායකයා විසිනි. උපස්ථායකයා මිය ගිය පසු නිසි අවසරයකින් යුක්තව එම ප්‍රාණය නිරුද්ධ වූ සිරුර තබාගෙන භාවනා කටයුතු කල වගත් ඉන් පසුව ආරණ්‍යයට පූජා කල සිරුරු කිහිපයක් අභිමුව සිට මළ සිරුරේ මාංශපේෂින් දිරා,නරක් වී ගොස් අස්ථි පද්ධතිය දක්වා ඉතිරි වන තෙක්මත්, ඉන් පසුවත් ඒ ආසන්නයේම රැදී සිටිමින් ස්වාමීන් වහන්සේලා භාවනා කටයුතු කල බව නායක හාමුදුරුවන් විසින් පැහැදිලි කරණ ලද්දේ අප මෙතක් අතිශෝක්තියක් යැයි සිතා සිටි සියල්ල සැබෑවක් කරවමිනි.

සාලිය-අසෝකමාලා ආදර කතාවට සම්බන්ධ වී ඇති මේ විහාර සංකීර්ණයේ ගල් ලෙන් විශාල සංඛ්‍යාවක් දැක ගත හැකි අතර මෙය අතීතයේ කොටි ත්‍රස්තවාදීන්ගේ තෝතැන්නක් වී තිබී ඇත. දැනට අවුරුදු විස්සක පමණ කාලයක සිට නායක හාමුදුරුවන් මෙහි වැඩ වාසය කරණ අතර දශක දෙකකට පමණ මෙහි වැඩම කරණ විට මේ සියලු විහාර ස්ංකීර්ණ සහ ගොඩනැගිලි වනාන්තරයට යටව තිබූ බවත් ගහක මුදුනක, ගලක් මුදුනක සිට මේ පිං බිම ආරකෂා කොට ගෙන වැඩ වාසය කල බවත් උන්වහන්සේ පසක් කරන්නේ යම් කිසි හැගීම් බර විලාශයකිනි. වන සතුන් විශාල සංඛ්‍යාවක් වාසය කරණ මේ පිං බිමේ අලි ඇතුන්, කොටියන්, වලසුන් නිතර නිතර නායක ස්වාමීන් වහන්සේට මුන ගැසුනත් ඔවුන්ගෙන් මේ වන තෙක් කිසිදු අකරතැබ්බයක් හෝ අනතුරක් නොවූ බවත් සතුන්ට තුවක්කු බැද සිටින දඩයක්කරුවන්ගෙනුත් නිදන් හොරුන්ගෙනුත් හැරෙන්නට මෙහි කිසිදු මිනිසකුට කිසිදු අනතුරක් නැති බව උන්වහන්සේ පසක් කලේ තවත් මේ ආරණ්‍යයයේ තොරතුරු ගොන්නක් අපේ දැනුමට එකතු කර්මින් සිටින අතරතුරයි.

"ඔබට මට පුලුවන්ද..? වන වැදී රැකගන්න.. උරුමයයි මේ අපේ.. අනාගතයට ගෙනයන්න" දොළුකන්ද විහාරස්ථානයේදී පරිහරණය කල උන්වහන්සේ පැමිණි මෝටර් රථය විකුණා, ඉන් ලැබුනු මුදලින් වැවක් කරවා, එය සග සතු කොට සතුන්ගේද පිපාසය සන්සිදුවා, වනයට යට වූ මේ අතීත උරුමය රැකගෙන, විදුලිය හෝ පානිය ජලය නොමැතිව බණ භාවනාවේ යෙදෙමින්,මේ ගමන් කරන්නේ අපට දුර මාර්ගයක වග වටහා ගැනීමට එහි ගිය අපට හැකි වූයේ පෙර සංසාරයේ කල පිනකට වග මේ අකුරු කරණ මොහොතේත් මා හද තුල රැව් පිළි රැව් දෙයි.

මීලග සතියේත් සුන්දර ගමනාන්තයකින් හමු වෙමු.

➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖
➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖

Instagram -   / dinesh_a_pathum  
Message or information -   / dinesh_a_pathum  

DAP production

"සොබාදහම රකින්නා සොබාදහම විසින් රකිනු ලබයි"