Скачать или смотреть კიმ ჩენ ინი პუტინთან შესახვედრად რუსეთში ჩავიდა

ჩრდილოეთ კორეის ლიდერი კიმ ჩენ ინი თავისი ჯავშნიანი მატარებლით ჩავიდა ვლადივოსტოკში, სადაც 25 აპრილს გაიმართება მისი და რუსეთის პრეზიდენტის, ვლადიმირ პუტინის შეხვედრა.

სააგენტო „რია ნოვოსტის“ ცნობით, კიმს პურით, მარილით და წითელი ხალიჩით დახვდნენ. სააგენტო „ინტერფაქსის“ ინფორმაციით, რამდენიმე საათით ადრე ფხენიანიდან ვლადივოსტოკში თვითმფრინავით ჩაიტანეს კიმ ჩენ ინის ჯავშნიანი „ლიმუზინი.“

ჩრდილოეთ კორეის ლიდერის და რუსეთის პრეზიდენტის შეხვედრა ვლადივოსტოკის კუნძულ რუსკიზე გაიმართება. მის გარშემო აკვატორია სამი დღით დაიკეტა მცირე ზომის გემებისთვის.

25 აპრილს, კიმ ჩენ ინი და ვლადიმირ პუტინი ერთმანეთს ჯერ პირისპირ, შემდეგ კი დელეგაციებთან ერთად შეხვდებიან. რუსეთის პრეზიდენტის პრესმდივნის დმიტრი პესკოვის ინფორმაციით, დღის წესრიგშია ორმხრივი ურთიერთობები, რეგიონული თანამშრომლობა და ბირთვული განიარაღების საკითხი.

2018 წლის ივნისში და 2019 წლის თებერვალში კიმ ჩენ ინი ჯერ სინგაპურში, შემდეგ კი ვიეტნამში შეხვდა აშშ-ის პრეზიდენტს, დონალდ ტრამპს. ამ მოლაპარაკებების მიზანი იყო ფხენიანს უარი ეთქვა ბირთვულ პროგრამაზე, რასაც საერთაშორისო სანქციების გაუქმება მოჰყვებოდა, თუმცა, მხარეებმა საბოლოო შეთანხმებას ვერ მიაღწიეს.