"Bir oğul böyütdü ki, oğul deyirəm sənə"... Şəhid Həmid Həmidlinin ailəsi xatirələrini bölüşür

"Bir gözəl, bir sevimli oğul böyütdü ana.
Bir oğul böyütdü ki, gur, çatmaqaş, gensinə.
Bir oğul böyütdü ki, oğul deyirəm sənə..."

İndi bəhs edəcəyimiz oğul, Əli Kərimin şeirindəki kimi naxələf çıxmadı. Anasının görən gözü, döyünən ürəyi, hər gün böyüyən sevgisi oldu. Boyuna baxanda sevindi anası. “Mənim oğlumdur” dedi. Oğlunun hər uğuru ananı biraz da qürurlandırdı. Şən gülüşü, məğrur duruşu, sağlam xarakteri ananı daha da həyata bağladı.

Həmidin yeri başqa idi, anasının ürəyində. Ağlına da gətirmirdi ki, bir gün onu bu dünyada itirə bilər. Hələ də bunu qəbul edə, inana bilmir. Hələ də düşünür ki, “oğlu işdədir, dönəcək”. Artıq oğlu 11 aydır ki, həyatda yoxdur. Amma ana hələ də bu yoxluğu qəbul edə bilmir. Gözü telefonda gəlməsini gözlədiyi o zəngdədir, qulağı həyətdən gələcək ən kiçik səsdədir. Amma birdən ağırlıq çökür üzərinə, övladının yoxluğunu hiss edir. O anlarda boğazı quruyur, nəfəs ala bilmir...

Həmid Həmidli anasının istəyi ilə hərbçi olur. Könül ana deyir ki, mən oğluma deyirdim ki, “mən səngərdə zabit anası olmaq istəyirəm”. Beləcə Həmid 8-ci sinfi bitirdikdən sonra Cəmşid Naxçıvanski adına hərbi liseydə təhsil almağa başlayır, sonra akademiya həyatı. 21 yaşında isə leytenant rütbəsi alaraq, təyinatı üzrə işə başlayır…

Könül ana, bu gün şəhid kapitan Həmid Həmidlinin anası olduğu üçün fəxr edir. Deyir ki, əvvəllər Həmid Həmidlinin anası olduğu üçün hər gün fəxr edirmiş.

“Həmid daşıdığı rütbənin, geyindiyi formanın haqqını verən bir hərbçi idi. Bu, onun xarakterində var idi. Elə bir insan idi ki, yaxşı mənada "soyuqqanlı". Mən onun harda olduğunu bilməzdim. Sonra deyəndə, düşünürdüm ki, “ay Allah, mənim balam harda olub”. Baxmayaraq ki, komandir idi. Əsgərləri ilə hər zaman ön sıralarda olub”-deyə Könül ana danışır.

Könül ana, 44 günlük Vətən müharibəsində Həmidin yaralanmasından da danışır. Deyir ki, yanan tankda Həmidin də bədəninin 72 faizi yanıbmış. İstəsəydi, işinə davam etməzdi. Amma elə bir xarakteri var idi ki, bunu özünə sığışdırmazdı. 27 yaşında batalyon komandiri olmaq hər adama nəsib olmur….

“Şəhadətin təsəllimdir”…

Hər dərdin çarəsi var. Bunun çarəsi yoxdur. Hər ayrılığın, hər darıxmağın adı var. Bunun adı yoxdur. “Nəfəs adamın boğazında düyünlənər? Sözlər yığılıb qalır, danışa bilmirsən”…

Şəhid Həmid Həmidlinin atası da bu ağrıya dözə bilmir. Özünü güclü göstərməyə çalışsa da, sözlər düyünlənir dilində…

“Dedilər ki, Həmid şəhid olub. Sanki belim qırıldı. Gedib cənazəsini götürəndə, üzünü açdım. Gülümsünürdü. Bəlkə də heç bir zaman ona yaxın olmadığım qədər yaxın oldum, öpdüm, oxşadım… Bilirdim ki, bu görüş sondur”…

Valideynləri Həmidin yoxluğuna hələ də inana bilmirlər. Elə düşünürlər ki, hardadırsa gələcək. Bacısı Ləman, həyat yoldaşı Günay aradan 11 ay keçməsinə baxmayaraq bu itkini qəbul edə bilmirlər. Hətta məzardan baxan şəkli belə onları inandırmır.

1 günlük lokal antiterror əməliyyatı zamanı 600-dən çox şəhid vermişdik. Bu şəhidlərin qanı bahasına bu gün Azərbaycanın ərazi bütünlüyü təmin edilib. Bu şəhidlərin qanı bahasına biz “bütöv Azərbaycan”la fəxr edirik.

Həmid şəhidliyi ən uca zirvə adlandırardı. Başqa cür yox, məhz şəhid olaraq dünyadan köçməyi arzulayarmış. Bu gün valideynləri Həmidin "Azərbaycanın Milli Qəhrəmanı" adı almasını arzulayırlar. Deyirlər ki, o zaman bəlkə ürəkləri bir az sakitləşər…

Mənə elə gəlir ki, şəhid anaları da oğulları ilə birlikdə mənəvi ölür. Arzuları, istəkləri, yaşamaq həvəsi oğulları ilə sönür…

...Geriyə qalan təsəlli olur. Könül ananın təsəllisi isə, övladından qalan xatirələrdir.

Könül ana deyir ki, övladı Həmidə bəslədiyi hisslərindən kitab yazmağı düşünür…

Bir günümüzü şəhid Həmid Həmidlinin ailəsi ilə keçirdik. Həmidin muzeyə çevrilmiş otağına baxdıq. Burada ona aid hər şey var. Özü vəsiyyət edibmiş ki, bu otaq şəhid olandan sonra onun əşyaları üçün ayrılsın.

Biz şəhid Həmid Həmidlinin anasının, atasının, sevdiklərinin onun haqqında xatirələrini dinlədik, yazdıq, çəkdik...

Şəhid Həmid Həmidli üçün Tanrıya dua edir, ruhunun şad olmasını diləyirik. Allah rəhmətindən pay versin. Amin...

İradə Cəlil, Bizimyol.info

Hörmətli üzvlər, şahidi olduğunuz maraqlı hadisələrin video və fotolarını çəkib, bizə göndərə bilərsiniz: Whatsapp: +994 50 498 73 68

"Bizim Yol" qəzetinin və "Bizimyol.info" xəbər portalının rəsmi hesabları:
"Bizim Yol" xəbər portalı - https://www.bizimyol.info
Facebook -   / bizimyolinfo  
Twitter -   / bizimyolinfo  
YouTube -    / bizimyolinfotv  
Instagram -   / bizimyolinfo  

Bizi izlədiyiniz üçün təşəkkürlər.