المدح وجه الشعر 2024 | ناصر بن منيف - خالد ال بريك | مهداه الى رجل الاعمال فيصل مطلق الدغيلبي .

شيلة مهداه الى رجل الاعمال:
فيصل بن مطلق الدغيلبي

كلمات: ناصر بن منيف البقمي
اداء: خالد ال بريك

الابيات:

الصبح لمنه تنفس ينظم اخيوط النهار
والشمس تبدي تقطع اخيوطه بزود اعنادها

وتصير نور الارض ولا للسماء تبقى شعار
وتسير ركبان العباد الي تدور زادها

الي كسبها باليمين اخير من كسب اليسار
والي يبي رد الخساره بالعزايم عادها

هزيمت الرجال بعض احيان دافع لانتصار
عزيمتً تجلب غنيمه كان ربي رادها

والحاجه الي ماتجي فالاصل فيها لانتظار
والي يزعزعه انتظاره طافته ماصادها

ماتنفع الاصوات عقب الفوت وتسبب دمار
والبدو زين اعلومها بتشين مع ردادها

والياس اشد من الالم يذبح طموحات الكبار
والتجربه من عاشها راسه يعد اسنادها

الله ياما في الصدر من عله وضيقه ونكسار
تجمعة بين الضلوع الي تعد ابلادها

اشيل مفتاح الفرج في داخلي وملك قرار
ولا غبطت الى العيون الي هنت برقادها

الشعر محصول الشعور الي تكدس وستنار
والصفحه البيضاء وحيّد السطر يظهر مادها

المدح وجه الشعر له هيبه ويملك له وقار
وينساق في راع الجميل الي اثنى ل شدادها

شرواك يافيصل ولد مطلق ولا فيها اعتذار
اسمً مازوده القصيد الى القصيده زادها

اي والله ابو نايف الي يخطف الجزله جهار
تنساقله صفر الدلال الي ذعرت بقنادها

كفه كريمه من كرمها يملك الفقري عقار
وجاهه يعتق ارقاب كانت تنتظر ميعادها

من بعد ربي مزبن الي ضاقبه وقته وجار
هو بلسم اجروح الدريك الي بلش بضمادها

خلك من الي لا نصيته دار عينه للزرار
ينشب لسانه فالجما وابشر تثنى اقيادها

ياجعل عودً مخرهه فالعرض في يوم القرار
تفتح له ابواب الجنان ويهتني ببرادها

ان كان له ذنبً فذا الدنيا حنين ام الحوار
عيال العشاير كل مارحب تراغت بادها

يكفيني انه من عتيبه والفخر صنع الكبار
برقا وروق الي حمايها لفت بمجادها

اي والله اعتيبه يومً الحرب باولها شرار
تالع بروسً زحزحت بالسيف عن ميرادها

في مامضى لطامت العايل معسفت المهار
ياحي قومً تبني التاريخ بني اجدادها

تضارب الافكار لاسنيت للمدحه مسار
والي صدق في طرقها يشره على نقادها

لاشك بّن الراي مايوخذ بعين الاعتبار
يمكن مافد الي مؤايد والمعارض فادها

الحسد مثل الحرب يدمر روح ويدمر ديار
واسباب سرعان النجاح احيان من حسادها