Bakının yeni yaşıllıq planı hazırlanıb - YENİ NÖV AĞACLAR ƏKİLİR

Paytaxt ərazisində yaşıllıq sahələrinin artırılması məqsədilə şəhərin yeni yaşıllıq planı hazırlanıb.

Bakı Şəhər İcra Hakimiyyətindən APA TV-ə bildirilib ki, təcrübəli landşaft mütəxəssisləri tərəfindən hazırlanmış plan Bakı şəhərinin yaşıllıq sahələrində yeni rənglərin yaranmasına səbəb olacaq.

Bakı Şəhər İcra Hakimiyyətinin şöbə müdiri Coşqun Cəbrayılov deyir ki, bu ilki mövsümi yaşıllaşdırma işlərində yeni növ ağaclar əkiləcək: “Bu işlər çərçivəsində şəhərin müxtəlif ərazilərində kiçik, meşə tipli massivlərin salınması, yol boyu ağacların əkilməsi, yaşıllıqların bərpası, dekorativ kollar, güllərin əkilməsi işləri həyata keçirilir. Bu ilki mövsümi yaşıllaşdırma işlərində xüsusi, yeni növ ağacların əkilməsinə üstünlük verilir ki, gələcəkdə, xüsusən də payız mövsümündə onların müxtəlif rənglərə bürünməsi gözəl Bakımızın görünüşünə xüsusi rəng qatsın”.

Yaşıllaşdırma Təsərrüfatı Birliyinin baş mühəndisi Cavanşir Məmmədovun sözlərinə görə, əkin prosesində Bakı şəhərinin iqlim şəraitinə uyğun olan yerli ağac növləri ilə yanaşı, xüsusi rəng çalarlarına malik yeni enliyarpaqlı ağaclardan da istifadə edilməsi nəzərdə tutulur: “Bakı şəhərinin quraq iqlimə məxsus olduğunu, yağıntıların az düşdüyünü nəzərə alaraq, əsasən quraqlığa davamlı bitkilər - sərv ağacları əkirik. Burada bu gün təqribən minə yaxın ağac əkildi. Bu sahə bildiyiniz kimi əvvəldən boşluq idi”.

Paytaxtın yaşıllıq səviyyəsinin keyfiyyətcə yaxşılaşdırılması məqsədi daşıyan tədbirlər şəhərin estetik görünüşünün yeni mərhələyə yüksəlməsinə təkan verəcək.


Rəsmi facebook səhifəmiz:   / tvapaxeber  
Rəsmi instagram səhifəmiz:   / apatvresmi  
Rəsmi twitter səhifəmiz:   / apatvofficial  


#apatv #apaxeber