Скачать или смотреть មន្ត្រីជាន់ខ្ពស់ក្រសួងព័ត៌មាន ជំរុញដល់មន្ត្រី​ ត្រូវបន្តពង្រឹងការងារព័ត៌មាន និងសាធារណមតិ​

មន្ត្រីជាន់ខ្ពស់ក្រសួងព័ត៌មាន ជំរុញដល់មន្ត្រីមន្ទីរព័ត៌មានខេត្តសៀមរាប ត្រូវបន្តពង្រឹងការងារព័ត៌មាន និងសាធារណមតិឱ្យកាន់តែសកម្ម

ក្នុងឱកាសជួបសំណេះសំណាលជាមួយមន្ត្រីមន្ទីរព័ត៌មានខេត្តសៀមរាប នារសៀលថ្ងៃទី២២ ខែសីហានេះ ឯកឧត្តម ទេព អស្នារិទ្ធ អនុរដ្ឋលេខាធិការ និងជាប្រធានលេខាធិការដ្ឋានគណកម្មាធិការជាតិសម្របសម្រួលកិច្ចការព័ត៌មាន និងសាធារណមតិ (គ.ស.ព.ស) បានណែនាំដល់មន្ត្រីទាំងអស់ ត្រូវបន្តយកចិត្តទុកដាក់ចូលរួមឱ្យកាន់តែសកម្មលើការងារព័ត៌មាន និងសាធារណមតិ ដើម្បីឆ្លើយតបឱ្យបានទាន់ពេលវេលា រាល់ការផ្សព្វផ្សាយនានាលើបណ្ដាញសង្គម ដែលធ្វើឱ្យប៉ះពាល់ដល់ស្ថិរភាព សណ្ដាប់ធ្នាប់ និងសន្តិសុខក្នុងខេត្ត ក៏ដូចជាទូទាំងប្រទេស។
ឯកឧត្តម ទេព អស្នារិទ្ធ មានប្រសាសន៍ថា ការងារសាធារណមតិ តម្រូវឱ្យមន្ត្រីព័ត៌មាន និងសាធារណមតិខេត្ត យកចិត្តទុកដាក់តាមដាន ដោយសហការជាមួយអាជ្ញាធរខេត្ត។ ជាមួយគ្នានេះ ត្រូវភ្ជាប់ទំនាក់ទំនងជាមួយមន្ទីរ-អង្គភាពជុំវិញខេត្ត ដើម្បីផ្សព្វផ្សាយព័ត៌មានពិត សុក្រិត្យ និងពង្រឹងទំនាក់ទំនងជាមួយអ្នកសារព័ត៌មាន។ លើសពីនេះ ត្រូវស្រាយបំភ្លឺសាធារណមតិ ដើម្បីឆ្លើយតបទៅនឹងការបំភ្លៃ និងបន្សាបព័ត៌មានក្លែងក្លាយ។ ស្របពេលដែលមានបញ្ហាព្រំដែននាពេលនេះ មន្ត្រីពាក់ព័ន្ធត្រូវតាមដានឱ្យទាន់នូវសភាពការណ៍ទាំងអស់ តាមរយៈការបង្កើនកិច្ចសហការជាមួយមន្ទីរ-អង្គភាពដែលពាក់ព័ន្ធ។
ឯកឧត្តមបានបញ្ជាក់ថា ការងារព័ត៌មាន និងសាធារណមតិមានតួនាទីសំខាន់ណាស់សម្រាប់រដ្ឋបាលថ្នាក់ជាតិ និងថ្នាក់ក្រោមជាតិ។ ក្នុងន័យនេះ ដើម្បីធ្វើជាសេនាធិការដ៏ល្អរបស់រដ្ឋបាលខេត្ត មន្ត្រីមន្ទីរព័ត៌មានចាំបាច់ត្រូវខិតខំបង្កើនការយកចិត្តទុកដាក់អនុវត្តការងារប្រចាំថ្ងៃរបស់ខ្លួន តាមបែបបុរេសកម្ម ដោយត្រូវពង្រឹងបន្ថែមនូវសមត្ថភាពផ្នែកបច្ចេកទេស ជំនាញប្រើប្រាស់កម្មវិធីឌីជីថលផ្សេងៗ ឱ្យស្របនឹងការរីកចម្រើនក្នុងសង្គម និងទំនោរនៃការទទួលព័ត៌មានរបស់សាធារណៈជន រាប់បញ្ចូលទាំងបណ្ដាញសង្គមផ្សេងៗដែលកំពុងពេញនិយមនាពេលបច្ចុប្បន្ន។
បើតាមលោក បុង ឆវ័ន ប្រធានការិយាល័យព័ត៌មាន និងសោតទស្សន៍នៃមន្ទីរព័ត៌មានខេត្តសៀមរាប បានបង្ហាញថា ក្នុងរយៈពេល ៧ខែ ឆ្នាំ២០២៥ ក្រុមការងារសម្របសម្រួលកិច្ចការព័ត៌មាន និងសាធារណមតិរបស់មន្ទីរ បានប្រមូលព័ត៌មានអវិជ្ជមានបានចំនួន ២ ៥៥៨ អត្ថបទ និងដំណឹងរសើបចំនួន ៥០៤ អត្ថបទ។ ចំនួននេះកើនឡើង ១៧១ អត្ថបទ បើធៀបនឹងរយៈពេលដូចគ្នាក្នុងឆ្នាំ២០២៤។ ក្នុងនោះ ក្រុមការងារក៏បានធ្វើការស្រាយបំភ្លឺបានចំនួន ៣៧ ករណីផងដែរ។ ជាមួយគ្នានេះ មន្ទីរក៏បានបង្កើតក្រុមការងារផលិតមាតិកា ដើម្បីគាំទ្រសកម្មភាពកិច្ចការព័ត៌មាន និងសាធារណមតិ ដោយក្នុងរយៈពេល ៧ខែនេះ ផលិតបានចំនួន ២៥៦ វីដេអូ និងរូបភាព៕