جديد 2021 * هجيني عمر ابو عياده*هوا الهجن فالقلب موسوم* فرقة السبعاوية لتراث والدحيه*

الحمد لله على المقسوم
وميسّر الرزق وقسّامه
ما واحد عن الخطا معصوم
وراعي الهوى محد لامه

كثر السهر وقللت النوم
والعرب بيقولو علامه
يا عرب والله ما علي لوم
طرد الهوى ما به ملامه




اظمر في صدري همن مكتوم
من وقتن زادت به سخامه
راع البل من مسكنه في خيوم
اليومي رحل عن خيامه




هوى الهجن ع البدو ملزوم
هيل المغاتير والجهـامه
واللي يجلب الهـجن للسوم
بيقضّي عميره ندامه




شلن بنا يا امهـات وسوم
من ختم بلي واوسامه
شلن بنا ع ديرة القروم
اللي للمواجيب قوّامه

هوى الهـجن فالقلب موسوم
ماهـو هـوى راعية الشامه
ما انساهن كان الميّت يقوم
من قبره ليوم القيامه


يحني قلبي ع الهجن دوم
حنة غريبن عن زلامه
ياربي يا عالم العلوم
عطاياك طويلات القامه




الوقت تبدّل على القوم
وتبدّل الصقر برخامه
ياحيفي صار الصقر محكوم
من طير الغراب والحمامه




يا علي وشهو حالنا اليوم
الناسي حسوده ولوامه
الجيد بالردى متهوم
والراعي يامر على عمامه



كيف ودك صقورن من البوم
والذيب ما يخاوي النعامه
ونتي على وقتن ما يدوم
ونت العراق ع صدامه