Скачать или смотреть တနှစ်ကြာတပ်စွဲထားတဲ့စစ်တပ်စခန်းကို နာရီပိုင်းအတွင်း PDF တွေသိမ်းပိုက်

တနှစ်ကြာတပ်စွဲထားတဲ့စစ်တပ်စခန်းကို နာရီပိုင်းအတွင်း PDF တွေသိမ်းပိုက်

ရေတာရှည်၊ အောက်တိုဘာ ၂၂၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ ရွာသစ်ကျေးရွာရှိ အင်အား ၆၀ ကျော်နဲ့ တနှစ်ကြာတပ်စွဲထားတဲ့ စစ်ကော်မရှင်စခန်းကို နာရီပိုင်းအတွင်းသိမ်းပိုက်နိုင်ခဲ့တယ်လို့ နေပြည်တော်တိုင်းစစ်ဌာန တာဝန်ရှိသူတွေဆီက သိရပါတယ်။

အောက်တိုဘာ ၂၀ ရက် နေ့လယ် ၁ နာရီ ၅၀ မိနစ်ခန့်မှာ ဘန်ကာ ၄ ခု၊ ပင်မစခန်း ၁ ခု ရှိနေတဲ့ စစ်ကော်မရှင်စခန်းကို ဝင်ရောက်တိုက်ခိုက်ရာ ညနေ ၃ နာရီမထိုးခင်အချိန်မှာ နေရာအားလုံးကို သိမ်းယူနိုင်ခဲ့တယ်လို့ ဆိုပါတယ်။

"တနှစ်ကျော်ကြာပြီး။ ဘန်ကာ၊ ကာကင်းတွေနဲ့အခိုင်အမာတပ်စွဲထားတဲ့နေရာဖြစ်တယ်။ ဘယ်လိုမှ ဟိုဟာဖြစ်လို့မရတဲ့နေရာ။ အရင်တခေါက်ကလည်းကြိုးစားခဲ့ဖူးတယ်။ ဒါပေမယ့် အောင်မြင်မှု မရရှိခဲ့ဘူး။ ဝင်တိုက်ခဲ့တဲ့နေရာမှာ တနာရီမတိုင်ခင် တနာရီအတွင်း ကာကင်းတွေ ပင်မသူတို့စခန်း ဖြစ်တဲ့ သူတို့ထိုင်တဲ့ဘုန်းကြီးကျောင်းပေါ့။ ဘုန်းကြီးတော့မရှိတော့ဘူး။ ရွာဘုန်းကြီးကျောင်းစခန်းတွေ ကာကင်းစခန်းတွေအကုန်လုံးသိမ်းပိုက်ရရှိခဲ့တယ်"လို့ နေပြည်တော်တိုင်းစစ်ဌာန တိုင်းကွပ်ကဲရေးမှူး ဗိုလ်လက်ျာကပြောပါတယ်။

တိုက်ပွဲအတွင်းမှာ လေကြောင်းရန်ကာကွယ်ရေးတပ်/လကတ-၂၀၂၉ တပ်က ဒုတိယဗိုလ်မှူးကြီး ညီညီနိုင်ကို လက်နက်ချဖို့ပြောပေမယ့် လက်မခံဘဲ ပြန်ပစ်ဖို့ကြိုးစားလာတာကြောင့် အသေပစ်ခတ်ခဲ့ကာ ၎င်းအပါအဝင် စစ်ကော်မရှင်ဘက်က ၁၅ ဦးသေဆုံးပြီး ၂ ဦးအရှင်ဖမ်းမိခဲ့တယ်လို့ ဆိုပါတယ်။

ဒါ့အပြင် စစ်ကော်မရှင်ဘက်က ဂျက်ဖိုက်တာနဲ့ ပေါင် ၅၀၀ ဗုံး ၂ လုံးကြဲခဲ့သလို ပွိုင့် 5 တွေနဲ့ လည်းပစ်ခတ်ပြီး ဆွာရွာမအထိုင်ချ စခန်းကနေလည်း ၁၂၀ မမ လက်နက်ကြီးတွေနဲ့ ပစ်ကူပေးတာတွေ ရှိခဲ့တယ်လို့ သိရပါတယ်။

ဒရုန်းဂျန်ဘာ အထိုင်စက်ကြီး ၁ လုံး၊ MA-11 ၁ လက်၊ MA-3 ၁ လက်၊ G3 ၃ လက်၊ ၆၀ မမ ၁ လက်၊ ပစ္စတို ၁ လက်၊ ၆၀ မမကျည် ၅ လုံး၊ ကျည်ဘောက် ၁၀ ခု၊ ကျည်မျိုးစုံ ၁,၀၀၀ ခန့်နဲ့မီးစက် ၁ လုံးကို တော်လှန်ရေးတပ်တွေက သိမ်းဆည်းခဲ့ပြီး ကျန်စစ်ကော်မရှင်တပ်ဖွဲ့ဝင်တွေက ဆွာရွာမဘက်က ဆုတ်ပြေးသွားတယ်လို့ သိရပါတယ်။

ဒီတိုက်ခိုက်မှုကို နေပြည်တော်တိုင်းစစ်ဌာနလက်အောက်တပ်ဖွဲ့ဝင်တွေက တိုက်ခိုက်ခဲ့တာဖြစ်ပြီး တိုက်ပွဲမှာ တပ်ဖွဲ့ဝင် ၂ ဦး မစိုးရိမ်ရဒဏ်ရာရခဲ့တယ်လို့ ဆိုပါတယ်။

ပြီးခဲ့တဲ့ဇန်နဝါရီ ၂၃ ရက်ကလည်း ရေတာရှည်မြို့နယ်၊ စစ်တောင်းမြစ်အရှေ့ခြမ်း၊ အိုးမြေဒူးကျေးရွာမှာတပ်စွဲထားတဲ့ စစ်ကော်မရှင်အဖွဲ့တိုက်ခိုက်ခံရပြီး ၄ ဦးသေဆုံးခဲ့သေးတယ်လို့ သိရပါတယ်။

သတင်း - ကျော်ကြီး၊ စာတည်း - လင်း၊ တည်းဖြတ် - HP⁩

#မြေလတ်အသံ
#ပဲခူး #ရေတာရှည် #စစ်တပ်စခန်း #PDF #သိမ်းပိုက်