អត្ថបទ ព្រះនាងឥន្ទ្រទេវី - ភាសាខ្មែរ ថ្នាក់ទី៩ (ការស្ដាប់)

អត្ថបទ ព្រះនាងឥន្ទ្រទេវី - ភាសាខ្មែរ ថ្នាក់ទី៩ (ការស្ដាប់)

#ព្រះនាងឥន្រ្ទទេវី #Edumediacambodia #ការស្ដាប់
ព្រះនាងឥន្ទ្រទេវី ទ្រង់ប្រសុតក្នុងត្រកូលក្សត្រ។ ព្រះនាងមានព្រះកនិដ្ឋាមួយអង្គគត់ គឺព្រះនាងជ័យរាជទេវី។ ក្នុងវ័យសិក្សាទ្រង់យកព្រះទ័យទុកដាក់ក្នុងការហាត់រៀនភាសាសំស្រ្កឹត មុខវិជ្ជាអក្សរសិល្ប៍ និងវិទ្យាសាស្ត្រផ្សេងៗយ៉ាងស្ទាត់ជំនាញ ជាពិសេសទស្សនវិជ្ជាព្រះពុទ្ធសាសនា។ ការសិក្សាគម្ពីរធម៌អាថ៌ព្រះពុទ្ធ ធ្វើឱ្យព្រះនាងមានប្រាជ្ញាឈ្លាសវៃ ហើយសព្វព្រះទ័យយ៉ាងខ្លាំង ក្នុងការប្រតិបត្តិតាមពុទ្ធោវាទ។ ព្រះនាងមានព្រះទ័យសប្បុរសចំពោះព្រះញាតិវង្ស និងរាជបរិពារ។ នៅពេលដែលព្រះកនិដ្ឋភគិនីជ័យរាជទេវីមានទុក្ខដោយត្រូវព្រាត់ប្រាសពីព្រះស្វាមី ដែលទ្រង់ត្រូវយាងទៅធ្វើសង្គ្រាមអស់រយៈពេលជាច្រើនឆ្នាំ ព្រះនាងបានពន្យល់ណែនាំព្រះកនិដ្ខាដែលរក្សាភក្ដីភាពយ៉ាងខ្ជាប់ខ្ជួន តាមក្រឹត្យវិន័យនៃសាសនាព្រាហ្មណ៍ ឱ្យបែរត្រឡប់មកកាន់តាមព្រះពុទ្ធសាសនាវិញដោយសាងផ្នួសជាដូនជីរហូតដល់ព្រះបាទជ័យវរ្ម័នទី៧យាងមកកាន់មាតុប្រទេសវិញទើបលាចាកសិក្ខាបទ។ ព្រះនាងជ័យរាជទេវីទ្រង់រំងាប់សេចក្ដីទុក្ខសោកសង្រេងសង្រៃតាមមាគ៌ានៃ ព្រះពុទ្ធ ប៉ុន្ដែជាអកុសលព្រះនាងមិនមានជន្មាយុយឺនយូរឡើយ។ ព្រះនាងឥន្ទ្រទេវីក៏ត្រូវបានព្រះបាទជ័យវរ្ម័នទី៧ សព្វព្រះរាជហឫទ័យ ហើយរៀបអភិសេកជាអគ្គមហេសីរបស់ព្រះអង្គ។ គឺនៅពេលនេះហើយដេលព្រះនាងទ្រង់ក្លាយជាអគ្គពុទ្ធសាសនូបត្ថម្ភក៍ក្នុងរាជាណាចក្រកម្ពុជា។ យសសក្តិដ៏ខ្ពង់ខ្ពស់នេះពុំធ្វើឱ្យព្រះនាងងាករេព្រះទ័យចេញពីសេចក្ដីស្មោះស្ម័គ្រខាងវិទ្យាសាស្ដ្រឡើយ។ ព្រះនាងទ្រង់ជំរុញខាងវិស័យសិល្បៈ អក្សរសាស្ដ្រ វប្បធម៌ជាតិឱ្យមានសន្ទុះរីកចម្រើនជឿនលឿនយ៉ាងខ្លាំងក្លានាសម័យនោះព្រមទាំងបង្កើតឱ្យមានសាលាបាលី
ជាន់ខ្ពស់ទៀតផង។
ព្រះនាងត្រូវបានព្រះរាជាតែងតាំងជាសាកលវិទ្យាធិការិនីនៅសាកលវិទ្យល័យមួយឈ្មោះ “ទិលកគុត្តរៈ” ហើយព្រះនាងបង្ហាត់បង្រៀនស្ដ្រីខ្មែរ រាជបរិពារអំពីវិជ្ជាខាងពុទ្ធសាសនា
នៅក្នុងវត្តមួយឈ្មោះ នរេន្ទ្រាស្រម។ ទន្ទឹមនឹងនេះ ព្រះនាងទ្រង់ព្រះរាជនិពន្ធកាព្យភាសាសំស្រឹ្តតជាច្រើន។ ស្នាព្រះហស្ថរបស់ព្រះនាងត្រូវបានសិល្បករនាសម័យនោះចារឹកទុកលើផ្ទាំងថ្មមួយ ក្នុងប្រាសាទភិមានអាកាស រួមទាំងអស់១០២វគ្គ។ ក្នុងអត្ថបទកាព្យនោះ ព្រះនាងរៀបរាប់អំពីលំអ និងព្រះទ័យបរិសុទ្ធប្រកបដោយភក្ដីភាពនៃព្រះនាងជ័យរាជទេវី ព្រមទាំងព្រឹត្តិការណ៍សំខាន់ៗទាក់ទងនឹងព្រះបាទជ័យវរ្ម័នទី៧ និងព្រះនាងឥន្រ្ទទេវី។ ក្រៅពីព្រះរាជកិច្ចតែងនិពន្ធ ព្រះនាងតែមានសទ្ធាជ្រះថ្លាក្នុងការបំពេញកុសលធម៌ និងបុណ្យទានផ្សេងៗតាមលក្ខណៈនៃព្រះពុទ្ធសាសនា។ ក្នុងកុសលកម្មទាំងនេះ គេអាចរាប់បានការបង្កើតមន្ទីរសង្គ្រោះដែលផ្ដុំក្មេងអនាថា ការធ្វើអំណោយទាន និងពុទ្ធបូជាសំខាន់ៗដល់ព្រះវិហារក្នុងព្រះរាជាណាចក្រ ព្រមទាំងការកសាងបដិមាមួយចំនួននៃរាជវង្សព្រះនាង និងមិត្តភក្តិខ្លះ។
ក្នុងឋានៈជាអគ្គមហេសី នៃព្រះមហាក្សត្រ ដ៏មានអំណាចខ្លាំងពូកែមួយអង្គព្រះនាងទ្រង់ព្យាយាមបញ្ចូលព្រះស្វាមីឱ្យមានគុណធម៌យ៉ាងជ្រាលជ្រៅចំពោះប្រជានុរាស្ដ្រ និងងាកមកកាន់ព្រះពុទ្ធសាសនាយ៉ាងមុតមាំ។ នៅពេលជួសជុលរាជធានីចាស់យសោធបុរៈ ព្រះបាទជ័យវរ្ម័នទី៧ទ្រង់ចាត់ឱ្យសាងប្រាសាទបាយ័ន ដើម្បីតម្កល់ព្រះពុទ្ធរូបមួយអង្គ ដែលមានកម្ពស់៩ម៉ែត ទុកជាទីសក្ដារបូជាចំពោះព្រះពុទ្ធសាសនា។ ទន្ទឹមនឹងនេះព្រះអង្គ ទ្រង់ចាត់ឱ្យស្ថាបនាប្រាសាទព្រះខ័ន សម្រាប់រំលឹកវិញ្ញាណក្ខន្ធព្រះវរបិតាប្រាសាទតាព្រហ្មជាទីតម្កល់ព្រះបរមរូបនៃព្រះមាតា និងសម្ដេចព្រះគ្រូប្រាសាទបន្ទាយឆ្មារ ជាតង្វាយដល់ព្រះរាជបុត្រមួយអង្គព្រះនាមស្រិន្រ្ទកុមារដែលមានគុណចំពោះព្រះបាទយសោវរ្ម័នទី២ ក្នុងចម្បាំងនឹងជនក្បត់រាហ៊ូ និងប្រាសាទដទៃទៀតជាច្រើន។ ក្រៅពីនេះ ព្រះអង្គទ្រង់ចាត់ឱ្យសង់សាលាសំណាក់ចំនួន ១២១ ជាទីស្នាក់នៅនៃអ្នកដំណើរ វត្តអារាមនានា សម្រាប់ទទួលសិស្សឱ្យចូលរៀនមុខវិជ្ជាផ្សេងៗ និងមន្ទីរពេទ្យចំនួន ១០២ ដែលមានគ្រូពេទ្យ និងឱសថគ្រប់យ៉ាង។ នេះបញ្ជាក់ឱ្យឃើញថា សុខទុក្ខរបស់រាស្ត្រក៏ជាការឈឺចាប់របស់ព្រះអង្គដែរ។
ដោយសារចំណេះដឹងដ៏ខ្ពង់ខ្ពស់ និងចរិយាល្អឥតខ្ចោះ ព្រះនាងឥន្រ្ទទេវីក្លាយជានារីម្នាក់ ដែលមានតម្លៃជាអមតៈ គួរឱ្យកោតស្ញប់ស្ញែងយ៉ាងក្រៃលែង។ ឥទ្ធិពលរបស់ព្រះនាងជំរុញឱ្យព្រះពុទ្ធសាសនាចាក់ឫសយ៉ាងរឹងមាំ និងមានពន្លឺថ្លាដូចពេជ្រពណ្ណរាយក្នុងព្រះរាជាណាចក្រកម្ពុជាយើង ជាពិសេសញ៉ាំងសម័យអង្គរឱ្យក្លាយជាសម័យមួយដ៏រុងរឿងជាងសម័យណាទាំងអស់។ ស្នាព្រះហស្ថរបស់ព្រះនាងស្ថិតនៅគង់វង្សរហូតដល់បច្ចុប្បន្នកាលនេះ ហើយមិនគ្រាន់តែបង្ហាញប្រាប់កូនខ្មែរអំពីហេតុការណ៍ ក្នុងសម័យនោះប៉ុណ្ណោះទេ ប៉ុន្តែថែមទាំងបំផុសស្មារតីកម្ពុជបុត្រគ្រប់រូបឱ្យថែរក្សា និងលើកស្ទួយវប្បធម៌ជាតិយើងឱ្យបានថ្កុំថ្កើងរុងរឿង។
(ដកស្រង់ពីសៀវភៅភាសាខ្មែរថ្នាក់ទី៩របស់ក្រសួងអប់រំបោះពុម្ពឆ្នាំ២០០៦)

ប្រសិនជាប្រិយមិត្តអ្នកស្ដាប់ទាំងអស់មានបំណងចង់ឧបត្ថម្ភគាំទ្រ និងលើកទឹកចិត្តចំពោះការផលិតអត្ថបទការស្ដាប់ជាសំឡេងរបស់ខ្ញុំ ក៏អាចចូលរួមឧបត្ថម្ភបានតាមរយៈ៖
គណនីអេស៊ីលីដាទាន់ចិត្ត ៖ 1287-0708-0
ឬ គណនីធនាគារអេស៊ីលីដា៖ 34760356300515
ឬ Facebook Page :   / edumediacambodia  

To get more news, knowledge and entertainment on
Facebook Page:   / edumediacambodia