"МЕН СЕНІ САҒЫНДЫМ ҒОЙ, БАЛА ДӘУРЕН" АҚЫН ДӘУРЕН БЕРІКҚАЖЫҰЛЫНЫҢ ШЫҒАРМАШЫЛЫҚ КЕШІ. 2023 жыл

"МЕН СЕНІ САҒЫНДЫМ ҒОЙ, БАЛА ДӘУРЕН" КЕШІ ӨТТІ!

27 қазан күні Үржар аудандық мәдениет үйінде ақын, аудармашы, халықаралық «Алаш» әдеби сыйлығының иегері Дәурен Берікқажыұлының «Мен сені сағындым ғой, бала Дәурен!» атты шығармашылық кеші ұйымдастырылды. Бұл – келер жылғы 50 жас мерейтой қарсаңындағы ақынның туған жерінде өткен тұңғыш шығармашылық кеші. Дәурен Берікқажыұлын Үржар ауданы әкімінің орынбасары
Б. Тұрлыбеков, Келдімұрат ауылдық округінің әкімі М.Адаев, Қарабұта ауылдық округінің әкімі Ж.Смағұлов, Көктал ауылдық округінің әкімі Н. Садуақасов және Қазақстан Жазушылар одағының мүшесі, ақын А.Абылқасымов құттықтады. Ақынға аудан әкімінің міндетін атқарушы А.Башимбаевтың құттықтау хаты, ауданның "Абырой" төсбелгісі мен сый-сияпат тапсырылды.
Шығармашылық кеш Д.Берікқажыұлының өлеңдері бойынша Үржар мәдениет үйінің артистері әзірлеген театр қойылымымен басталды. Дәурен Берікқажыұлының өлеңдерін Тұрсабек ОМ, Келдімұрат ОМ, Сейфуллин ОМ оқушылары мен Үржар аудандық кітапханасының кітапханашысы А.Жұмәділова ерекше тебіреніспен оқып, оның өлеңдеріне жазылған әндерді Н.Черубаев, Р.Чүкенова, Г.Сатмұхамбетова, Т.Әлеш, А.Дүйсенов, Д.Аймұхамбетова шырқады. Жергілікті композитор Дарын Шаяхметов ақынның өлеңіне "Қарай бергім келеді" атты ән шығарып сыйға тартты.
Кеш барысында Дәурен Берікқажыұлының «Атамұра» корпорациясының президенті, Үржар ауданының Құрметті азаматы, "Жомарт жүрек" номинациясының жеңімпазы Рақымғали Абрарұлы Құл-Мұхаммедтің демеушілігімен жарық көрген «Мақаншы мен Манхэттеннің арасы» атты кітабының тұсауы кесілді. Үржар аудандық орталық кітапханасы ақынның шығармашылығы бойынша көрме әзірледі.
Айтулы шараға әнші, актер Қадырғали Көбентай, белгілі телережиссер, вокалды-инструменталды «Айгүл» ансамблінің бұрынғы әншісі Қарлығаш Мұртазина және ақынның Астана мен Алматы, Қарағанды мен Семейдегі әріптестері мен достары келіп қатысты.
Өнерсүйер қауымның есінде қаларлықтай әдемі кеш өтіп, ақын мен әріптестері үлкен ризашылықтарын білдірді.
Жерлесіміз Дәурен Берікқажыұлына шалқар шабыт тілейміз. Өнері өрге жүзіп, мерейі үстем болсын!