Скачать или смотреть ირაკლი ბერია

(სამი დღის წინ დაბრუნდა)

სამი დღის წინ
დაბრუნდა ჩემი ძმა
ავღანეთიდან...
და ამ სამი დღის მანძილზე,
როცა მივდიოდი სახლში
ჩემი ძმა არ მხვდებოდა...
და როცა ჩემი ძმა მიდიოდა სახლში,
მე არ ვხდებოდი...
მესამე დღეს, გარეთ გავედი
და გავიყოლე ფიქრი
სკამზე გადაკიდებულ ფორმაზე,
რომელსაც ეტყობა უდაბნოს კვალი
და რომელსაც
ჩემი ძმის სახელი ჰქვია...
საღამოს სახლიდან დამირეკეს...
ტელეფონში მოისმა ნაცნობი ხმა-
„სად ხარ ირაკლი?...“
მე დამება ენა,
სწრაფად წავედი შინისკენ
და მთელი გზის განმავლობაში
გამიჩნდა უამრავი კითხვა
მისთვის დასასმელი,
ოვაციები წარმოვიდგინე,
აღმაფრენა,
წარმოვიდგინე სურათი ჩვენი
ხმამაღალი შეხვედრის
და როცა შევაღე სახლის კარი,
გავშეშდი...
რადგან მე შევხვდი ღამენათევ
და
ნაფრონტალ თვალებს...
ჩვენ გავშეშდით ერთმანეთის წინ
სამიოდე წამი
და
სამი წამის შემდეგ
უსიტყვოდ გადავეხვიეთ...

. . .

(ჩემი შუათანა ძმა)

ჩემი შუათანა ძმა,
როგორც - უფროსი,
ჯარისკაცია...
მას ნანახი აქვს ის,
რასაც მხოლოდ ჯარისკაცები ხედავენ...
რა უნდა ვთქვა მის შესახებ
გარდა იმისა,
რომ დალევა უყვარს,
ხშირად მთვრალია
და
მისი მარჯვენა ყოველთვის
მზად არის ჩახმახის გამოსაკრავად...
და
მისი გული ალალი არის,
სუფთაა,
წმინდა
და მისი მარჯვენა კაცის კვლას არ ისწრაფვის,
არამედ გარეთ ქუჩაში,
მიუსაფარ გამვლელს ხვევს,
სახლში ამოჰყავს,
ლიტრა ღვინით
და მარილით,
მცირედი მისაყოლებლით
უმასპინძლდება...
ვსხედვართ ჩვენ სამნი,
ის ყოველთვის აცნობს ჩემს თავს სტუმარს
და
ეუბნება:
„იცი?
ჩემი ძმა
ლექსებს წერს.“
და შემდეგ, როცა უზომოდ თვრება,
ოთახში იკეტება და ტირის...
მისი ოცნება არ არის კაცის კვლა,
არამედ შლეგური სიკვდილი
ფსოუს ნაპირზე...

. . .

ყველაზე დიდი მსგავსება
ჯარისკაცსა და პოეტს შორის
ის არის, რომ
ორივე კეთილშობილი მკვლელია !