Pranga — "Qanadı Qırıq Qartal"

Yaralar gədər bədəndən, amma əbədi ruhda qalar izi
Qopardıqca təzələnər və qanadıqca qanar izi
İmperiyalar, işğal, talan və onca məzarsız Şəhid
Dalbadal vuruldu zərbələr və bulandı qana dizim

Gecələr ağrıdır, gecələr lənət kimidir,
Döyünmür ürək nə zamandır, bədəndə artığ ət kimidir
Otaqda ruhlarla birgə rəqs edirdi tüstülər
Çırpıram qanadımı Şəhid məzarlarının üstünə

Mənə soyuq peronlarda tükənmiş ümidlər gətir
Tənhalığın adı yoxdu, gedənlər də gəlmədi
Pranga üzdə gülür, amma, fəryad edir bətində
Mübarizəmiz davam edir dubinka müşaiyətində

Media məzbəhələrini yağlı qoyunlarla doldurun
Dezinformativ, üstü bağlı oyunlarla doldurun
İçimdə bağırtılar, üzümə zəhrimar qarışar
Zirvə tək nəfərlikdir, Qartala təklik yaraşar

Chrous:

Möhkəm vur! Ölənə qədər vur!
Divar laylarımda çatlar əmələ gələnə qədər vur!
Çırpınar göydə təşnə ruhum yaralardan
Quru bağırtılarım yadigardır dəlixanalardan

Yaxın gəlin!
Kürəyimi deşən qanlı zəncirlərə baxən gəlin Yaxından baxın, közərəcək bu yaralarım
Dalımca Qartal ordusu, batalyon, axın gəlir


Çıxmayan candan ümid kəsildisə də dönmədik
Meydanlarda carçılarımız əzildisə də dönmədik
Bərk vurun, elə vurun ki, qanım qarışsın quma
İki cahana sığmaz ikən bir bədəndə məhkumam

Günəşi ardınca çəkib aparan qürubam mən
Sarbanam, Şuşaya doğru karvanam, yurdam mən
Mehvərimdə Tanrı parçasıyla laməkanam, bil
Səmalarında Qartal, torpağında qurdam mən

Dəniz gözlüm, repressiyalar səndən qoparacaq məni
Deşər güllə, kəsər bıçaq, yandırar bu ocaq məni
Ver sancım ol şanlı hilalı gövdəmə, ey can
Bir əqidəm var ki, Tanrı dağına qədər aparacaq məni

Məni də asın, leşimi Şəms-i şəfəq sığallasın
Oyan Xəlil, Cavad, Şəhriyar, yarımcanam mən
Bu nəğməyə cəbhələrdə əldə silah qulaq asın
Eşqi bitib tükənməyən Azərbaycanam mən!

Chrous:

Möhkəm vur! Ölənə qədər vur!
Divar laylarımda çatlar əmələ gələnə qədər vur!
Çırpınar göydə təşnə ruhum yaralardan
Quru bağırtılarım yadigardır dəlixanalardan

Yaxın gəlin!
Kürəyimi deşən qanlı zəncirlərə baxən gəlin Yaxından baxın, közərəcək bu yaralarım
Dalımca Qartal ordusu, batalyon, axın gəlir