Скачать или смотреть សង្ខេបព័ត៌មានជាតិសំខាន់ៗ ប្រចាំថ្ងៃទី១៤ ខែតុលា ឆ្នាំ២០២៥

---
១. សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានលើកឡើងពីសកម្មភាពដែលភាគីថៃបានប្រើប្រាស់សំឡេងរំខានមកលើពលរដ្ឋខ្មែរនៅតំបន់ភូមិព្រៃចាន់ និងភូមិជោគជ័យ ប្រាប់ទៅកាន់ ឯកឧត្តម Dato Seri’ Ahmad Zahid bin Hamidi ឧបនាយករដ្ឋមន្ត្រី និងជារដ្ឋមន្ត្រីក្រសួងអភិវឌ្ឍន៍តំបន់ និងជនបទម៉ាឡេស៊ី។ ការគូសបញ្ជាក់របស់សម្ដេចតេជោយ៉ាងដូច្នេះ ធ្វើឡើងនៅក្នុងជំនួបពិភាក្សាការងារជាមួយរដ្ឋមន្ត្រីក្រសួងអភិវឌ្ឍន៍តំបន់ និងជនបទម៉ាឡេស៊ី នៅថ្ងៃទី១៤ ខែតុលានេះ។ សម្ដេចតេជោ បានគូសបញ្ជាក់បន្ថែម ទៅកាន់ឯកឧត្តមឧបនាយករដ្ឋមន្ត្រីថា អ្វីដែលកម្ពុជាចង់បាន គឺមិនត្រូវការឲ្យប្រទេសណាមួយ សម្ព័ន្ធមិត្ត ឬក៏មិត្តរបស់កម្ពុជាទៅថ្កោលទោសប្រទេសណាទេ ប៉ុន្តែអ្វីដែលកម្ពុជាចង់បានគឺការធ្វើយ៉ាងណាជំរុញឲ្យភាគីទាំងពីរគោរពបទឈប់បាញ់ឲ្យមានប្រសិទ្ធភាព និងការស្វែងរកដំណោះស្រាយ ដើម្បីឈានទៅរកប្រក្រតីភាព នៃទំនាក់ទំនងរវាងកម្ពុជា និងថៃឡើងវិញ។
ប្រភព៖ សម្ដេចតេជោ ហ៊ុន សែន (  / 17bjig7f4j  )

២. លោក យ៉ាន ឡាយ នាយកប្រតិបត្តិនៃសម្ព័ន្ធសិទ្ធិកុមារកម្ពុជា (CRC-Cambodia) បានឱ្យដឹងថា សំឡេងរំខានពីប្រទេសថៃបានជះឥទ្ធិពលដល់សុខភាពផ្លូវចិត្ត និងការអប់រំរបស់កុមារ ដែលនាំឲ្យមានរោគសញ្ញារបួសផ្លូវចិត្ត និងការថប់បារម្ភជាដើម។ លោក យ៉ាន ឡាយ បានប្រាប់កាសែតភ្នំពេញប៉ុស្ត៍ថា «វាប៉ះពាល់ដល់សុខភាពផ្លូវចិត្តរបស់កុមារ។ នៅពេលមានសំឡេងរំខានខ្លាំងជាពិសេសសំឡេងគួរឲ្យខ្លាច វារំខានដល់ការគេងរបស់កុមារ។ សំឡេងខ្លាំងៗ និងគួរឲ្យខ្លាចតែងតែធ្វើឲ្យកុមារមានសុបិន្តអាក្រក់ និងមានភាពភ័យស្លន់ស្លោ នៅពេលយប់។ កុមារជាច្រើននៅតាមភូមិព្រំដែន បានបង្ហាញសញ្ញានៃភាពតានតឹង, ការថប់បារម្ភ និងជំងឺបាក់ទឹកចិត្ត ដោយកុមារខ្លះយំ និងមិនស្រណុកក្នុងខ្លួននៅពេលយប់។ ការរំខានទាំងនេះ ក៏ប៉ះពាល់ដល់ការអប់រំប្រចាំថ្ងៃរបស់កុមារ ផងដែរ។ កុមារជាច្រើនភ័យខ្លាចក្នុងការទៅសាលារៀននៅពេលព្រឹក ឬពេលល្ងាច។ នៅពេលពួកគេភ័យខ្លាច ពួកគេមិនអាចផ្តោតលើការសិក្សាបានទេ»។ លោកបានជំរុញឲ្យអាជ្ញាធរ ឪពុកម្តាយ គ្រូបង្រៀន និងមេដឹកនាំសហគមន៍ និយាយជាមួយកុមារ អំពីប្រភពនៃសំឡេងរំខាននោះ និងរៀបចំកន្លែងសម្រាប់ពួកគេ ដើម្បីបញ្ចេញអារម្មណ៍របស់ពួកគេ៕
ប្រភព៖ Phnom Penh Post & Straits Times (https://str.sg/qUB4)

៣. សំណុំរឿងនិស្សិតកូរ៉េម្នាក់ស្លាប់នៅខេត្តកំពត សមត្ថកិច្ចឃាត់ខ្លួនជនសង្ស័យបាន៣នាក់ និងកំពុងបន្តតាមចាប់ខ្លួនបក្ខពួកជនសង្ស័យ២នាក់ទៀត ដើម្បីបន្តនីតិវិធីច្បាប់។ នេះបើយោងតាមសេចក្ដីប្រកាសព័ត៌មានស្ដីពីលទ្ធផលប្រតិបត្តិការស៊ើបអង្កេតករណីឃាតកម្មលើជនជាតិកូរ៉េខាងត្បូង ចេញផ្សាយថ្ងៃទី១៤ ខែតុលានេះ។ យោងតាមសេចក្ដីប្រកាសព័ត៌មាននេះ បានបញ្ជាក់ថា នគរបាលកម្ពុជាបានចុះល្បាតជំនាញ នៅយប់ថ្ងៃទី៨ ខែសីហា ឆ្នាំ២០២៥ បានប្រទះឃើញរថយន្តដឹក សាកសពមួយគ្រឿងក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត, ភ្លាមនោះ នគរបាលបានឃាត់ខ្លួនជនសង្ស័យជនជាតិចិន ចំនួន២នាក់ផងដែរ ខណៈម្នាក់ទៀតរត់គេចខ្លួន។ បន្ទាប់ពី ការធ្វើកោសល្យវិច័យបឋមនាពេលនោះរកឃើញថា សពជនរងគ្រោះបានស្លាប់ដោយគាំងបេះដូង ដែលបណ្តាលមកពីការ ធ្វើទារុណកម្ម ដោយមានស្នាមជាំជាច្រើនកន្លែងលើរាងកាយ។ អង្គហេតុនេះបញ្ជាក់ថា នគរបាលកម្ពុជាពុំ បានទទួលព័ត៌មាន ឬបណ្ដឹងពីក្រុមគ្រួសារសព ឬក៏ពីស្ថានទូតកូរ៉េខាងត្បូង ដូចការចុះផ្សាយរបស់ សារព័ត៌មាន South China Morning Post ដែលថា គ្រួសារសពបានស្វែងរកកិច្ចអន្តរាគមន៍ ជួយសង្គ្រោះ តាមរយៈស្ថានទូត និងនគរបាលមូលដ្ឋាននោះទេ។
ប្រភព៖ FB/ឯកឧត្ដម ស សុខា (https://www.facebook.com/SarSokha/pos...)

៤. កាកបាទក្រហមអន្តរជាតិ បានអះអាងថា យោធិនកម្ពុជាទាំង១៨រូប ដែលថៃកំពុងឃុំខ្លួន គឺមានសុខភាពល្អ និងបានទទួលទានអាហារប្រចាំថ្ងៃបានធម្មតា ហើយសន្យាថា នឹងជំរុញឱ្យមានការដោះលែងមកវិញអនុសញ្ញាទីក្រុងហ្សឺណែវ។ ការអះអាងរបស់កាកបាទក្រហមអន្ដរជាតិ ធ្វើឡើងនៅក្នុងជំនួបដែល លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា និងលោក ចច ម៉ុនតានី ប្រធានប្រតិភូគណៈកម្មាធិការអន្តរជាតិនៃកាកបាទក្រហមប្រចាំភូមិភាគ នៅថ្ងៃទី១៣ ខែតុលា ឆ្នាំ២០២៥។ ទន្ទឹមគ្នានេះ កាកបាទក្រហមអន្តរជាតិ ក៏បាននាំយកសារលិខិតដែលសរសេរដោយយោធិនកម្ពុជា១៨ ជាលើកទី២ មកប្រគល់ជូនកាកបាទក្រហមកម្ពុជា ដើម្បីបន្តយកទៅប្រគល់ជូនក្រុមគ្រួសារយោធិនកម្ពុជា១៨រូបដែលកំពុងរង់ចាំដំណឹងផងដែរ។
ប្រភព៖ កម្ពុជាថ្មី (https://www.kampucheathmey.com/local-...)

៥. នៅថ្ងៃទី១៣ ខែតុលា ឆ្នាំ២០២៥ ក្នុងពិធីសំណេះសំណាលជាមួយប្រតិភូកីឡាកម្ពុជាដែលនឹងចូលរួមការប្រកួតកីឡាយុវជនអាស៊ី លើកទី៣ ខាងមុខនេះ, ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ បានណែនាំប្រាប់កីឡាករ កីឡាការិនីកម្ពុជា ត្រូវរក្សាភាពថ្លៃថ្នូរ ប្រកាន់ខ្ជាប់ឥរិយាបថសមរម្យ ជាមួយនឹងប្រតិភូកីឡានៃប្រទេសថៃ ដើម្បីបង្ហាញអំពីសីលធម៌ ការគោរពវិន័យ ភាពចាស់ទុំរបស់កម្ពុជា។ ដោយឯកឧត្តមបណ្ឌិត បានគូសបញ្ជាក់ថា «កីឡាគឺជាអំណាចទន់ ដែលជាផ្នែកមួយនៃមុខមាត់ប្រទេសជាតិ»។ សូមជម្រាបជូនថា ការប្រកួតកីឡាយុវជនអាស៊ី លើកទី៣ ឆ្នាំ២០២៥ ដែលនឹងធ្វើឡើងក្នុងប្រទេសបារ៉ែន ដែលប្រព្រឹត្តទៅចាប់ពីថ្ងៃទី២២ ដល់ ថ្ងៃទី៣១ ខែធ្នូ ឆ្នាំ២០២៥ ខាងមុខនេះ។
ប្រភព៖ MoEYs Cambodia (  / 15yoximhmi  )

Facebook:   / preah.khan.khmer  
Telegram: https://t.me/preah_khan
TikTok:   / preah_khan