عيدية عتيبه | اهداء لرجل الاعمال محمد بن سمار| كلمات:عيضه الثبيتي |اداء : مهنا العتيبي | حصرياً 2021

(محمد بن مسعد بن سمّار)
👇🏻👇🏻
ياعتيبه من بعد عيد الفطر شافوا هلاله
كل واحد من عتيبه عاد عيده عاد عيده🔥
لا طرا اسم عتيبه الهيلا تزيد الروس طاله
اطنخوا يالابتي والعيد جعل الله يعيده

الفرح هذا مجاله و الطرب هذا مجاله
جعلكم في كل عام بخير وأعيادٍ سعيده

عاد عيد ملوكنا وبلادنا رمز الاصاله
نحتفل بالعيد ونعايد حكومتنا الرشيده

طاري اللّي علم والهاجس طراله ماطراله
والشعر ماله علاقه بالشياطين المريده

لا تقولون انطلق شيطان شعرك من حباله
لنّي مسوّي على نص رمضان أطلق قصيده

مرّني خمسة عشر ليله وانا ماني بِداله
احتري ميعادها وانا على النار الوقيده

من جزالاتها مقدّمها على منصى الجزاله
العضيد اللي يعز الراس وينومس عضيده

خل عنك اللي ليا منّه فقد حتى رياله
تحسب أنّه فاقد الّه من بني عمه فقيده

احتزم بالكفو خلْ اللي سواة ابو محاله
ولا تلف يسار خلك فاليمين وروح سيده

الرفيق الكفو يستاهل من بعيد انعناله
والطريق يهون مدام التعب فوق الحديده

ما عشقنا الشعر غير أنّا نعبّر من خلاله
بالشعور اللي نعبّر عنه في جمله مفيده

من غلا محمد ولد مسعد لعل الخير فاله
ودّي أغنّي وأطوّع شِردْ الابيات الفريده

المعايد حق لو بمكالمة ولا رساله🔥
وانت يامحمد ترى واجبك أعايدك بقصيده

ياعساي أرد لو شوي من بعض الجماله
من جمايلك القديمه لاجمايلك الجديده

دون قاصر في مطانيخ الرجال اسمك لحاله
واضح وبيّن كما العنوان الأول فالجريده

حي والله راسك اللي يطبّخ طيب وشكاله
كرشميٍ نحتزم بك فالملمّات الشديده

جود كفّك مثل غيثٍ يحجب الشمس بخياله
ضوح برقه يخطف الانظار و مزونه سديده

الامور الكايده عندك مثل شرب البياله
أبعد نجوم السماء أقرب من هقاويك البعيده

لا نصاك اللي قبل ينخاك يحذف لك عقاله
كل مايطلب تحذفه من رصيدك في رصيده

فزعة الروقي تزيد ارقام عن خانات الاله
الله يعين المحاسب يحسب الرقم ويزيده

يزبنه من صام مسجون و يعيّد مع عياله
تسلم رقبته من السيف الحدب ويفك قيده

اسم ابن سمّار للفزعه غدا مثل الوكاله🔥
أحذر التقليد وأنصى شركة الطيب الأكيده

في مواقيف القبيله مرخصٍ ماله و حاله
الامور الكايده يقدم عليها ماتكيده

طيب رأسه ماخذه من رأس أبوه ورأس خاله
ولا يزيد الاّ طناخة راس جعل الله يزيده

الفخر مكسب من يحط المكارم راس ماله
ماكسبه اللي نباه زهيد و فعوله زهيده

مير حنا ياعتيبه سادة المجد ورجاله
أخذين من الفخر و المجد فوق اللي نريده



عيضه الثبيتي