អំណោយចម្រៀងជាង៧០០បទ ប្រគល់ជូនក្រុមដំណើរខ្មែររក្សាទុក

នៅព្រឹកថ្ងៃទី១​ ខែឧសភា​ ឆ្នាំ២០២៤នេះ​ ក្រុមដំណេីរខ្មែ​របានទទួលលិខិតជាផ្លូវការមួយច្បាប់ពីលោក​ ប៉ែន​ វ៉ាណូ​ អតីតនិស្សិតខ្មែរសិក្សានៅប្រទេសបារាំង​ សព្វថ្ងៃអាយុ៨១ឆ្នាំ​ កំពុងរស់នៅប្រទេសបារាំង​ បានចុះហត្ថលេខានៅថ្ងៃទី២៩​ ខែមេសា​ ឆ្នាំ២០២៤សម្រេចប្រគល់ឯកសារមរតកភ្លេង​ និងចម្រៀងខ្មែរ​ ចំនួន​ជាង៧០០បទ​ អោយទៅលោក​ វីរៈ​ វ៉ារ៉ានី​ ប្រធានក្រុម​ដំណេីរខ្មែរដេីម្បីរក្សាទុក​បន្ត។
ចម្រៀងទាំង៧០០បទនេះ​ សុទ្ធតែជាចម្រៀងដែលចម្លងពីរ៉ូឡូ​ ពីថាស​ និងពីកាសែត​ តាំងពីចុងទសវត្ស៥០​ រហូតដល់ឆ្នាំ១៩៧៥​ ក្នុងនោះមានចម្រៀងមួយចំនួន​ ជាចម្រៀងបងប្អូនមហាជនបានស្តាប់រួចហេីយ​ ហេីយមួយចំនួនទៀតជាបទដ៏កម្រ​ដូចជា​ បទ​ អន្លង់រាត្រី​ ច្រៀងដោយលោកស្រី​ ឈួន​ ម៉ាល័យ​ , បទ​ ចំប៉ាបាត់ដំបង​ ច្រៀងដោយ​ លោក​ យ៉ង់​ ឈៀង​ , បទ​ សំបុត្រក្រោមខ្នេីយ​ ច្រៀងដោយ​ លោកស្រី​ សាវដ្តី​ , បទ​ រ់លកបោកខ្សាច់​ ច្រៀងដោយ​ លោក​ អ៉ឹម​ សុងសឺមជាដេីម។
លោក​ ប៉ែន​ វ៉ាណូ​ បានប្រាប់ក្រុមដំណេីរខ្មែរថា​ ចម្រៀងទាំងនោះលោកខិតខំស្រាវជ្រាវ​ និងប្រមូលរក្សាទុកតាំងពីឆ្នាំ១៩៧៩​ ក្រោយរបបខ្មែរក្រហមបានសម្លាប់សិល្បករខ្មែរ​ និងបំផ្លិចបំផ្លាញស្ទេីរតែខ្ទេចខ្ទី​។ ដោយពេលនេះ​ លោកកំពុងស្ថិតក្នុងវ័យជរាទៅ​ ហេីយក៏បឆនសង្កេតឃេីញនូវទឹកចិត្តភក្តីភាពរបស់លោក​ វីរៈ​ វ៉ារ៉ានី​ និងក្រុមការងារនៃក្រុមដំណេីរខ្មែរតាំងពីដេីមរៀងមក​ ឃេីញថាមានស្មារតីស្នេហាមរតកសិល្បៈខ្មែរយ៉ាងប្តូរផ្តាច់នោះ​ លោកក៏សម្រេចចិត្តប្រគល់ចម្រៀងទាំងអស់នេះមកកាន់ក្រុមដំណេីរខ្មែររក្សាទុកបន្ត។
ក្រុមដំណេីរខ្មែ​រ​ សូមគោរពដឹងគុណ​ចំពោះមហាវីរៈភាពដ៏ថ្លៃថ្លារបស់លោក​ ដែលព្យាយាមស្រាវជ្រាវ​ ចំណាយពេលវេលា​ និងថវិកាដេីម្បីប្រមូលឯកសារចម្រៀងខ្មែរទាំងនោះអោយនៅសេសសល់ដល់សព្វថ្ងៃ​ ទុកជាឧត្តមប្រយោជន៍សម្រាប់សិល្បៈវប្បធម៌ខ្មែរ។
ក្រុមដំណេីរខ្មែ​រ​ សូមគោរពជូនពរ​ លោក​ ប៉ែន​ វ៉ាណូ​ មានសុខភាពល្អ​ អាយុយឺនយូរ​។