Isuma Geyneyso Danne! Carays Ciise Kaarshe

Saar awoowe Carays Ciise Kaarshe, 1966.
Saarki oo qoraal ah:

Heleey waa taan lahaa,
Deel looxaa lagu dhigaa,
Ilaahay Daa’in waay,

Duunyaa dayr loo raraa,
Dal baa meel laga degaa,
Duggaal waa meel la daday,
Deegaan waa deeq Ilaah,
Dayuura cirkay martaa,

Geesiga duulaanka wada,
Ayaama hadduu dibjiro,
Darsaale inuu dhacoo,
Rag daga waa damacsan yahay,

Dulmiileyda habari ahi,
Dab bay daa’iman shiddaa,
Calibo seyf buu ku dilaye,
In ay reer dumisa iyo,
Dirdira waa damacsan tahay,

Darmaan gabar oo da’yari,
Dib soo xaalka u noqdaba,
Inuu wiil daahiyo,
Daardaar bay damacsan tahay,

Askarigii daacad ihi,
Sareeye hadduu dalbado,
Dabkoo uu haysta iyo,
Digtoonuu damacsan yahay,

Wadaadkii diin akhriya,
Haddii neef loo dilaa,
Habeenkaa inuu dikriyoo,
Duceeyuu damacsan yahay,

Nimuu diihaal hayaa,
Naftanu waa daallimade,
Haddii uu dabin dhigtaa,
Inay deero u gashoo,
Dubtaa buu damacsan yahay,

Duddumo ruuxii dugsado,
Hadduusaan qabin dareen,
Naftiisii buu dayacee,
Dushiisa inuu dayiyo,
Dadaal buu damacsan yahay,

Dakane ruuxii qabiyo,
Ninkii laga dhacay dumaal,
Dalkiisii laga dafiray,
Hadduusan doqon ahayn,
Dareen uu ku hurda iyo,
Dagaal buu damacsan yahay,

Dembiga diitaan ka ahay,
Deel-saar anigaa degsaday,
Waa idin deeqsiin hayaa,

Afsoomaaliga docayn,
Iyo,
Dariiq baan ugu hadlaa,
Markuu ii soo dargalo,
Xarfaha aan doqon garan,
Ma daayee dagantidee,
Duuganahaan soo degaa,

Sidii reer degay abaar,
Cirkoo meel dheer ka da’ay,
Hala deytin ihi,
Ka dawreen jeer duhur ah,

Habeen badan sii didayoo,
Hadday doogii galeen,
Aar dool ahi soo dujiyoo,
Ka dilay tii ugu darrnayd,

Debin goortuu daldalay,
Wiilkii daba-joogayoo,
Daal iyo diihaalba qabo,
Docdiisa intuu ka dayay,
Ka duuloo daaca qubay,

Sidiisaan ahay diyaar,
Afsoomaaliga docayn,
Iyo,
Dariiq baan ugu hadlaa,
Markuu ii soo dargalo,
Xarfaha aan doqon garan,
Ma daayee dagantidee,
Duuganahaan soo degaa,

Waxaa deelkaas ka daran!

Dab iyo daad inay darsaan,
Isuma geyneeyso danne,

Wadaadkii diin leh iyo,
Durbaan kii tuman hayaa,
Isuma geyneeyso danne,

Haddii ay tahay diraac,
Dameer kii dhaansadiyo,
Midkii awr soo dabraday,
Isuma geyneeyso danne,

Dugaag duunyada diliyo,
Ninkii daajina hayaa,
Isuma geyneeyso danne,

Dabaaxii hilib deldelay,
Iyo,
Dambiil tii ula tagtoo,
Darhanna aan taagga hayn,
Isuma geyneeyso danne,

Dulaal iyo kii dirsaday,
Digniin bay kala qabaano,
Isuma geyneeyso danne,

Ninkii daar suubsadoo,
Dusheedaa kore degiyo,
Dabayl kii ka cararoo,
Dugsiga hoosa u fadhiya,
Isuma geyneeyso danne,

Nimuu diihaal yahiyo,
Midkii daacaaya oo,
Dibbira aan toosi Karin,
Isuma geyneeyso danne,

Dukaan wiilkii dhigtiyo,
Midkii loo haysta deyn,
Isuma geyneeyso danne,

Ninkii soo daalay iyo,
Durdura kii doonayaa,
Isuma geyneeyso danne,

Dadaal ruuxii hayoo,
Kitaabkii daalacdiyo,
Dersin kaan weligi dhigan,
Isuma geyneeyso danne,

Waxaa deelkaa ka daran!

Duq iyo wiilkii da’yari,
Isuma geyneeyso danne,

Hablaha tii dabacsan iyo,
Degdeg tii wax u hantiday,
Isuma geyneeyso danne,

Raggana kii door ah iyo,
Midkii weligii dayacan,
Isuma geyneeyso danne,

Dulmiyo kii daacad wada,
Isuma geyneeyso danne,

Nin daafaana iyo dirac,
Isuma geyneeyso danne,

Dareenlow iyo ma-dide,
Isuma geyneeyso danne,

Dulweyn iyo kii dabci xun,
Isuma geyneeyso danne,

Dagaal kii doonayiyo,
Daa’iman kii nabad daydaya,
Isuma geyneeyso danne,

Dembiga ruuxii galoo,
Xabsiga loo daa’imiyo,
Digtoonaan kii qaboo,
Daleeshiisaas u baxay,
Isuma geyneeyso danne,

Nimuu daqar gaarayoo,
Magtiisii doonayiyo,
Minkii duudsiya hayaa,
Isuma geyneeyso danne,

Dabeecada gaaladiyo,
Diintaan leenahay annagu,
Mar hore bay kala durkeenoo,
Isuma geyneeyso danne,

Waxaa deelkaas ka daran!

Ninkii doonnida galoo,
Usaga oo daakhil mari,
Duufaan lagu soo diriyo,
Darbadi daan kaga dhacdoo,
Shiraacii uu degoo,
Xashwadi hoos uga duntoo,
Biyuhu soo daakhileen,

Naftanu waa daallimade,
Dabbaal goortaa galiyo,
Malaay maanyada degani,
Isuma geyneeyso danne!