Скачать или смотреть අලුත් අවුරුදු උත්සවය

                    අලුත් අවුරුදු උත්සවය

      ශ්‍රී ලංකාව බහු ජාතික රටකි. ඒ හේතුවෙන් වර්ෂයේ එක් එක් කාලවල දී මෙම ජාතීන් තමාට අයත් විවිධ උත්සව පවත්වති. අලුත් අවුරුදු උත්සවය ඊට කදිම නිදසුනක් ලෙස පෙන්වා දිය හැකි ය. මෙය සිංහල හා හින්දු ජාතිකයින් විසින් එක්ව සමරනු ලබන නිසා මෙය සිංහල හා දෙමළ අලුත් අවුරුදු උත්සවය ලෙස ද හඳුන්වයි. සෑම වර්ෂයක ම අප්‍රේල් මාසයේ දී පවත්වනු ලබන මෙම උත්සවය ඉතා විචිත්‍රවත්, විනෝදකාමී උත්සවයකි.
        
           අලුත් අවුරුදු කාලයට මුළු රට ම සැණකෙළි සිරියක් ගනියි. මෙකලට මිනිසුන් තම තමාගේ නිවෙස් වතුපිටි ආදිය සුද්ද පවිත්‍ර කරනු ලබයි. නාගරික ප්‍රදේශවල සිදු නොවුණ ද ගම්බද පෙදෙස්වල නිවාසවල ඔංචිල්ලා බැඳීම ද අලුත් අවුරුද්ද ආසන්න වන විට සිදු කරනු ලබයි. තව ද නව ඇඳුම් මිල දී ගැනීම ද මිනිසා අවුරුදු කාලයට වැඩියෙන් ම යොමුවන කරුණක් ලෙස පෙන්වා දිය හැකි ය.

           අවුරුදු කාලයට වෙනස්කම්වලට භාජනය වන්නේ මිනිසා පමණක් නොවේ. පරිසරය ද අලුත් අවුරුද්ද පිළිගැනීම සඳහා සැරසෙන ආකාරයක් අපට මෙකලට දැකිය හැකි ය. මුළු පරිසරය පුරා පිපී ඇති එරබදු මල් දෙස බලන කෙනෙකුට සිතනුයේ එය දක්ෂ චිත්‍ර ශිල්පියෙකු අතින් නිර්මාණය වුණු ඉතා මනරම් සිතුවමක් ලෙසිනි. පරිසරය පුරා තම හඬ රැව් පිළිරැව් දෙන සේ කෑ ගසන කොහා පවසනුයේ අලුත් අවුරුද්ද ළඟ ළඟ ම පැමිණෙන බවයි. තව ද පරිසරයේ තීබෙන සෑම ගසක ම ඵල බර වී අතු බිමට නැමී තිබෙන්නේ අවුරුද්දේ විචිත්‍ර බව නැවත නැවතත් පසක් කරමින් ය. එපමණක් නොව පරිසරය පුරා හමා යන කැවුම්, කොකිස් ආදී රස කැවිලිවල සුවඳ සියලු දෙනාගේ ම ගත සිත ප්‍රබෝධමත් කිරීමට සමත් වෙයි.

            අලුත් අවුරුද්දෙ විශේෂත්වය වන්නේ නැකතට අනුව ක්‍රියා කිරීම ය. එනම් මුළු ශ්‍රී ලංකාව ම අලුත් අවුරුද්දට එක ම වේලාවට කටයුතු කරනු ලබයි. ආහාර පිසීම, වැඩ ඇල්ලීම, ගනුදෙනු කිරීම, ආහාර අනුභවය, හිස තෙල් ගෑම යනාදිය නැකැත්වලට උදාහරණ ලෙස හැඳින්විය හැකි ය. අලුත් අවුරුද්දේ විනෝද ම අංගය වන්නේ අවුරුදු උත්සවයි. අවුරුදු උත්සවවල විවිධ තරඟ සංවිධානය කරනු ලබයි. ගම හරහා දිවීම, අලියාට ඇස තැබීම, කොට්ට පොර ගැසීම හා කණා මුට්ටි බිඳීම එම තරඟවලට උදාහරණ ලෙස දැක්විය හැකි ය.

                       සිංහල දෙමළ අලුත් අවුරුදු උත්සවය යනු ඉතා සොඳුරු උත්සවයකි. මේ උත්සවය මගින් ජාතික එකමුතුකම හා සහජීවනය ඔප් නැංවීමට බෙහෙවින් උපකාරී වෙයි. අන් උත්සව මෙන් නොව මෙම උත්සවයට ලක්වාසී හා ලෝකවාසී සියලු දෙනාගේ ම ආකර්ෂණය හිමි ය. එම නිසා මෙම උත්සවය ශ්‍රී ලාංකික ජනයාගේ විවිධ ගුණාංග වර්ධනය කිරීමට උපකාරී වන ඉතා මනරම්, සොඳුරු, විචිත්‍රවත්, අති සුන්දර වූ, අති උත්කර්ෂවත් වූ ඉතා වටිනා උත්සවයකි.



SINHALA ESSAYS - සිංහල රචනා

PLEASE SUBSCRIBE.
LIKE.
SHARE.


@SINHALA ESSAYS FOR STUDENTS