Скачать или смотреть Մենք ենք մեր գյուղերը Զուար 2

Մեր ճամփորդությունը չէր կարող սահմանափակվել միայն Հայաստանյան գյուղերով, ուստի մեր երկրորդ նպատակակետը Արցախի Զուար գյուղն էր: Նախագծի հավատարիմ անդամներից բացի այս անգամ արշավին մասնակցում էին նաև նոր մարդիկ` տարբեր տարիքի ու ոլորտի: Ավանդույթի համաձայն` 16.05.2015թ. ժամը 08:00-ին բոլորս կազմ ու պատրաստ Հանրապետության հրապարակից շարժվեցինք դեպի Զուար, սակայն հնարավորություն ունեցանք կանգ առնել Հայրավանքում և Դադիվանքում` հիանալու հազարամյա վանքերի գեղեցկությամբ: Այդ հարցում մեզ օգնում էր նաև փորձառու էքսկուրսավարը: Կեսօրին արդեն Զուարում էինք. այստեղ ևս մենք տեղաբաշխվեցինք մեզ հյուրընկալող զուարցիների տներում, իսկ ընթրիքից հետո հավաքվեցինք խարույկի շուրջ: Հաջորդ օրը գյուղացիները մեզ ծանոթացրին ոչ միայն իրենց տնտեսության ու դպրոցի , այլև Զուարի հրաշքներից մեկի "Տաք ջուր" կոչվող հանքային աղբյուրի հետ: Մոտ 65 աստիճան ջերմաստիճան ունեցող այս բնական ջրավազանում լոգանք ընդունելուց հետո մենք շտապեցինք գյուղի պատկերասրահ, որտեղ ի զարմանս մեզ գտանք հայտնի նկարիչների հրաշալի կտավներ: Օրն ավարտվեց ավանդական տոնավաճառով և, իհարկե, թոնրի խորովածով, որից հետո մենք հրաժեշտ տվեցինք մեր նոր բարեկամներին: