Скачать или смотреть ឯ.ឧ ឃឹង សារ៉ាត់ និងលោកជំទាវ ដង្ហែអង្គកឋិនទានវេរប្រគេនព្រះសង្ឃគង់នៅវត្តឱង្ការាម

ខេត្តកណ្តាល ៖ ដែលជាថ្ងៃមួយស្ថិតក្នុងរដូវកាលបុណ្យកឋិនទានប្រចាំឆ្នាំ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន និងលោកជំទាវ ឆាយ សាលីន ជាតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ រួមជាមួយពុទ្ធបរិស័ទជិតឆ្ងាយ បានរួមសាមគ្គីគ្នាដង្ហែអង្គកឋិនទានយ៉ាងអធិកអធម ទៅវេរប្រគេនដល់ព្រះសង្ឃដែលគង់ចាំព្រះវស្សាអស់ត្រីមាស នៅវត្តឱង្គារាម ឋិតក្នុងភូមិគរ ឃុំក្រាំងយ៉ូវ ស្រុកស្អាង ខេត្តកណ្ដាល កាលពីព្រឹកថ្ងៃអាទិត្យ ទី១៩ ខែតុលា ឆ្នាំ២០២៥។
ពិធីបុណ្យនេះបានប្រព្រឹត្តទៅតាមគន្លងប្រពៃណីព្រះពុទ្ធសាសនា ដោយមានការដង្ហែអង្គកឋិនជុំវិញព្រះវិហារ និងពិធីវេរប្រគេនត្រៃចីវរ និងទេយ្យទានជាច្រើនទៀត ដល់ព្រះសង្ឃ ដែលជាកិច្ចដ៏វិសេសដើម្បីផ្គត់ផ្គង់ដល់ការប្រើប្រាស់របស់ព្រះសង្ឃបន្ទាប់ពីបញ្ចប់ការគង់ចាំវស្សាក្នុងរយៈកាល៣ខែកន្លងទៅ។
ក្នុងឱកាសដ៏មហានក្ខត្តឫក្សនេះ ឯកឧត្តម ឧត្តមសេនីយ៍ឯក ឃឹង សារ៉ាត់ និងលោកជំទាវ ឆាយ សាលីន តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ក្នុងនាមជាម្ចាស់ដើមទាន បានវេរប្រគេននូវបច្ច័យសរុបចំនួន ៩៩,៩៩៩,០០០ រៀល (កៅសិបប្រាំបួនលានប្រាំបួនរយកៅសិបប្រាំបួនពាន់រៀល) ដែលក្នុងនោះជាបច្ច័យសទ្ធាជ្រះថ្លារបស់ពុទ្ធបរិស័ទចំណុះជើងវត្តទាំងអស់ចំនួន ៥៩,៩០០,០០០ រៀល (ហាសិបប្រាំបួនលាន ប្រាំបួនសែនរៀល ត្រូវបានប្រគេនដល់ព្រះសង្ឃគង់នៅវត្តឱង្គារាម ដើម្បីទុកសម្រាប់ជាមូលនិធិកសាង និងអភិវឌ្ឍសមិទ្ធផលនានាក្នុងទីអារាម ក្នុងការរួមចំណែកបម្រើដល់វិស័យព្រះពុទ្ធសាសនានៅកម្ពុជា។
ក្នុងឱកាសដ៏ឧត្ដុង្គឧត្ដមនោះ ឯកឧត្ដម ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន បានសម្តែងនូវសេចក្តីសោមនស្សរីករាយជាខ្លាំង ដែលបានមករួមសាមគ្គីគ្នាដង្ហែអង្គកឋិនទានយ៉ាងអធិកអធមវេរប្រគេនដល់ព្រះសង្ឃដែលគង់ចាំព្រះវស្សាអស់ត្រីមាសនេះ ។
ឯកឧត្ដម ឧត្ដមសេនីយ៍ឯក នាយកមន្ទីរប្រឆាំងគ្រឿងញៀន បានបញ្ជាក់ថា ការដែលយើងប្រារព្ធពិធីបុណ្យកឋិនទាននេះ គឺជាពិធីបុណ្យប្រពៃណីដ៏ធំមួយក្នុងចំណោមពិធីបុណ្យសំខាន់ៗរបស់ព្រះពុទ្ធសាសនា ។ មិនតែប៉ុណ្ណោះបុណ្យកឋិនទាននេះ ក៏ជាឱកាសដែលយើងបង្ហាញពីការរួបរួមគ្នា និងសាមគ្គីភាពគ្នារវាងពុទ្ធបរិស័ទជិតឆ្ងាយ ដោយប្រមូលផ្តុំកម្លាំងកាយចិត្ត និងថវិកា ដើម្បីធ្វើបុណ្យរួមគ្នា ហើយបុណ្យកឋិនទាន គឺជាការ ឧបត្ថម្ភ និងទំនុកបម្រុង ដល់ព្រះសង្ឃ និងជួយកសាងសមិទ្ធផលនានាក្នុងវត្តអារាម (ដូចជា កុដិ វិហារ ផ្លូវ) ដើម្បីបម្រើផលប្រយោជន៍ដល់ព្រះពុទ្ធសាសនា និងសង្គមជាតិ៕