Vehbur a sum tlingkhawm ₹4,78,310 hlanna | Thingdawl a vantlang zunin tura siam a cheng te..

December ni 12(inrinni) 2020 khan Thingdawl khua a vantlang zunin tura siam a cheng, spinal cord thalo Pu Rihlimawma(Pu Hlimawma) te chhungkaw puala kan vehbur khawn a sum lo tling khawm cheng ₹4,78,310/-(nuai li sing sarih sang riat zathum leh cheng sawm) hlanna kan zu nei a. He mite chhungkua hmangaiha an sum neih chuang liam pawh nilo an remchan ang ang lo pe tute chungah Zo Inspiration chuan an chhungkaw aiawhin lawmthu a sawi tak meuh meuh a ni. Tin sum leh pai nei remchang lo mahse social media(Facebook,Instagram leh Whatsap) lama thahnemngai taka kan vehbur khawn update leh post min lo thehdarh sak thin tute chungah pawh kan lawm takzet a, in rawngbawlna hi a te bik hauh love.

An chhungkaw mamawh hrang hrangte pawh zawi zawiin mi inphal te zarah an in phu hru chho ve zel a. Tin, a hmaa kan lo tarlan hmaih chu an khua Thingdawl YMA te hian sorkar lamah In sak tanpuina an lo dil sak tawh a, mahse hei hi an dawng ngei dawn em tih hriat ala ni lo. Tin an khaw YMA, MHIP, VC leh pawl dang te pawh hian an chhungkaw mamawh hrang hrang lo buaipuiin an phak ang tawk tawkin hma an lo lak sak thin a ni.

Kan ram/khawvel a chhe tawh tiin sawi fo thin mah ila, midang hmangaihna nei, a taka luang chhuak duh Mizo te zingah heti zat lai mai kan la awm hi a ropui kan van ti em! Kan hmalakna ni kherlo ah pawh kan bul hnai leh hmuh phakah tanpui ngai mi harsa tam tak an awm a ni tih hria ila. Dam chhung reilote a in chhek ârbawm thûr thûr mai lovin kan unau kan mihring pui te tana luan chhuah hi i intih hmuh zel teh ang u khai.


______________________________________________

Please like, subscribe and share for more videos..

Follow us on :
Instagram
  / zoins_piration  
Facebook
  / zo-inspiration-youtube-channel-11231135734...