Скачать или смотреть ការរកឃើញឯកសារប្រវត្តិរឿងរ៉ាវ និងព្រះឆាយាលក្ខណ៍ព្រះអង្គម្ចាស់ក្សត្រី ស៊ីសុវត្ថិ មុនីកេសរ ហៅម្ចាស់ដូង

ក្រុមដំណើរខ្មែរមានកិត្តិយសសូមព្រះអនុញ្ញាត និងអនុញ្ញាត ទូលថ្វាយ និងជម្រាបសួរជូន សម្តេច ព្រះអង្គម្ចាស់ក្សត្រា ព្រះអង្គក្សត្រី អ្នកអង្គម្ចាស់ អ្នកម្នាង ឯកឧត្តម លោកជំទាវ លោក លោកស្រី ប្រិយមិត្តជាទីគោរពដ៏ខ្ពង់ខ្ពស់ ព្រះមេត្តាជ្រាប និងសូមជ្រាបថា ៖

ក្នុងរយៈពេលពីរខែ(ខែកញ្ញា និងតុលា ឆ្នាំ២០២៤) មកនេះ ក្រុមដំណើរខ្មែរបានបំពេញបេសកកម្មស្រាវជ្រាវដ៏ធំមួយដើម្បីរកឯកសារបន្ថែម និងលំអិតទាក់ទងនឹងសិល្បៈ វប្បធម៌ ព្រមទាំងប្រវត្តិសាស្រ្តខ្មែរ ក្រោមការដឹកនាំចុះស្រាវជ្រាវផ្ទាល់ពីលោក វីរៈ វ៉ារ៉ានី អ្នកស្រាវជ្រាវ និងជាប្រធានក្រុមដំណើរខ្មែរ នៅតាមបណ្តាស្ថាប័នរដ្ឋចំនួនបីគឺ បណ្ណាល័យជាតិ , បណ្ណាសារដ្ឋានជាតិ និងពុទ្ធិសាសនបណ្ឌិត្យ ព្រមទាំងបណ្ណាល័យនៃមជ្ឈមណ្ឌលខេមរសិក្សា (សៀមរាប)។

ក្នុងដំណើរស្រាវជ្រាវនេះ ក្រុមដំណើរខ្មែរបានរកឃើញឯកសារសំខាន់ៗជាច្រើនមានដូចជា ឯកសារសេណារីយ៉ូខ្សែភាពយន្តបួនរឿងសម័យយុគមាស , ឯកសារប្រវត្តិស្នាដៃឥស្សរជនខ្មែរសម័យអាណានិគមបារាំង សម័យសង្គមរាស្រ្តនិយម សម័យសាធារណររដ្ឋខ្មែរ និងសម័យសាធារណរដ្ឋប្រជាមានិតុកម្ពុជា , ឯកសារអត្ថបទ និងប្រវត្តិចម្រៀងខ្មែរទសវត្ស៦០ និង៨០ ,ឯកសារទាក់ទងនឹងមរតកភាពយន្តខ្មែរ, ឯកសារស្តីពីព្រឹត្តិការណ៍សំខាន់ៗក្នុងរជ្ជកាលព្រះមហាក្សត្រក្នុងសម័យអាណានិគមនិយមបារាំង, ប្រវត្តិនៃអារាមបូរាណៗក្នុងសម័យឧត្តុង្គ និង ព្រះប្រវត្តិរឿងរ៉ាវព្រះរាជវង្សានុវង្ស ដោយក្នុងនោះក្រុមដំណើរខ្មែរបានរកឃើញនូវឯកសារដ៏កម្រ និងមានសារៈសំខាន់ក្រៃលែងនូវ រឿងរ៉ាវសំខាន់ៗព្រះអង្គម្ចាស់ក្សត្រី ស៊ីសុវត្ថិ មុនីកេសរ ហៅម្ចាស់ដូង ស្តីអំពីព្រះរាជពិធីសោកាន្ត និងដំណឹងនៃការប្រឈួនរបស់ព្រះអង្គម្ចាស់ក្សត្រី។

ជុំវិញប្រវត្តិនៃព្រះអង្គម្ចាស់ក្សត្រី ស៊ីសុវត្ថិ មុនីកេសរ ចាត់ទុកថាប្រវត្តិរឿងរ៉ាវដ៏កម្រ និងមិនងាយរកបានខណៈដែលមហាជនភាគច្រើនធ្លាប់ស្គាល់ថា ព្រះអង្គម្ចាស់ក្សត្រី ជាព្រះជាយាមួយអង្គនៃសម្តេចព្រះបរមរតនៈកោដ្ឋ និងជាព្រះមាតានៃព្រះអង្គម្ចាស់ក្សត្រា នរោត្តម នរទីប៉ោ (ណារ៉ាឌីប៉ូ)។ ព្រះអង្គម្ចាស់ក្សត្រី ស្តេចយាងសោយព្រះពិរាល័យក្នុងព្រះបរមរាជវាំងចតុម្មុខនៅ៥ថ្ងៃបន្ទាប់ព្រះអង្គប្រសូតព្រះរាជបុត្រា។

ក្រុមដំណើរខ្មែរ នឹងរៀបចំផ្សាយអត្ថបទដ៏មានខ្លឹមសារជាប្រវត្តិសាស្រ្តនេះនៅក្នុងយូធូបផ្លូវការតែមួយគត់របស់ក្រុមដំណើរខ្មែរ ព្រមទាំងទំព័រហ្វេសបុកផ្លូវការឈ្មោះ ដំណើរខ្មែរអតីតកាល នៅពេលឆាប់ៗខាងមុខនេះ។
សូមជម្រាបផងដែរថា ក្រុមដំណើរខ្មែរ​ជាស្ថាប័នឯករាជ្យ មិនចំណុះឬស្ថិតក្រោមស្ថាប័នមួយណាឡើយ។ ក្រុមដំណើរខ្មែរក៏កំពុងធ្វើកិច្ចការស្រាវជ្រាវជាបន្តប្រមូល និងចងក្រងឯកសារ ទុកជាឧត្តមប្រយោជន៍ជាតិ។