[條路自己揀 唔好喊] 中三揀科分享

[條路自己揀 唔好喊]
曾幾何時，我都面對過揀科既煩惱，中三成績唔好，入理科一係讀生物Bio，一係讀附加數學A. Maths，無得兩樣一齊讀。當年我明明知自己計數叻啲，但係覺得Bio有趣啲，最後揀左Bio。Bio有興趣都好，好用心去讀，放最多時間落去，可能方法錯啦，都係讀得唔好，反而Maths同Phy就讀得好好，入CU Physics前，用左兩個月就自修晒成個A. maths兩年既內容，好明顯，我中三係揀錯科，但係我無後悔，條路係自己揀既。

中三揀科可以係影響一世，所以我地要好小心去諗，但你又對未來一無所知，所以唔會知邊條路好啲，好似我咁，就唔會知道自己有一日會愛上Physics，除非你話我祈禱上帝就會指條明路比我，咁我地呢啲凡人既煩惱你就唔會明呀喇。

中三揀呢科好定嗰科好，人生行呢條路好定嗰條路好，都係同一個道理，其實無話死要用邊一個準則黎決定，但最起碼，要係你自己揀既。要為自己既人生負責任既，只有你自己一個，學黃子華話齌，我食飯係我飽，唔會係你飽，一個決定會影響到既只有你自己，咁係咪好應該由你自己去做呢個決定。

有好多人覺得人生既意義呢啲問題好虛無，但係你要做一個影響你一生既決定，而你就唔知自己一生想點，為左咩生存，咁其實係咪好戇居？如果你無諗清楚，最後就會變左做「人地話…」「個個都係…」一生就會咁樣過左去，到最後望返轉頭，你就會諗「如果我嗰時…今日又點？」但當你諗到一個屬於自己既答案，知道自己為咩而活，有清晰既目標方向，咁你就會有勇氣去做決定。

當分享呢番說話既時候，有同學就問我：「呀Sir，咁你個答案係咩呀？」我既答案唔重要，因為呢個問題唔會有標準答案，重要既係喺搵答案既過程入面，你會更加了解自己，而你既信念只會更加強大，更加堅定。

Online補習平台：https://tutorial.marcyam.com
Mechanics 力學所有課程：https://tutorial.marcyam.com/collecti...
Electrostatics 靜電學課程：https://tutorial.marcyam.com/courses/...
Circuit and Domestic Electricity 電路和家居用電課程：https://tutorial.marcyam.com/courses/...