Скачать или смотреть တရုတ် လေယာဉ်မှူးတွေကို လေ့ကျင့်ပေးမှုအတွက် အမေရိကန် လေတပ် အရာရှိဟောင်း အဖမ်းခံရ | People's Spring

တရုတ် လေယာဉ်မှူးတွေကို လေ့ကျင့်ပေးမှုအတွက် အမေရိကန် လေတပ် အရာရှိဟောင်း အဖမ်းခံရ

တရုတ် လေယာဉ်မှူးတွေကို လေ့ကျင့်ပေးခဲ့တယ်ဆိုတဲ့ စွပ်စွဲချက်နဲ့ အမေရိကန် လေတပ် အရာရှိဟောင်း တစ်ဦးကို ဖမ်းဆီးလိုက်ကြောင်း သိရပါတယ်။

အသက် ၆၅ နှစ်အရွယ် ဂါရဲလ် ဘရောင်းဟာ တရုတ်ကနေ လတ်တလော အမေရိကန်ကို ပြန်လာတဲ့အချိန် အင်ဒီယားနားမှာ အဖမ်းခံခဲ့ရတာပါ။ ဘရောင်းဟာ ခွင့်ပြုချက် မရှိဘဲ တရုတ် လေယာဉ်မှူးတွေကို လေ့ကျင့် သင်ကြားပေးခဲ့တယ်ဆိုတဲ့ စွပ်စွဲချက်အတွက် အဖမ်းခံခဲ့ရကြောင်း အမေရိကန် တရားရေး ဝန်ကြီးဌာနက အတည်ပြုခဲ့ပါတယ်။

သူဟာ ၂၀၂၃ ခုနှစ်၊ ဒီဇင်ဘာလ ကတည်းက တရုတ်မှာ သွားရောက်နေထိုင်ပြီး တရုတ် တိုက်လေယာဉ်မှူးတွေကို သင်တန်းပေးနေခဲ့တာလို့ ဆိုပါတယ်။

အမေရိကန် နိုင်ငံခြားရေး ဝန်ကြီးဌာနက ထုတ်ပေးတဲ့ သီးသန့်လိုင်စင် မရှိဘဲနဲ့ နိုင်ငံရပ်ခြား တိုင်းပြည်တစ်ခုမှာ စစ်လေယာဉ် မောင်းနှင်မှု သင်တန်းပို့ချခြင်းက ဥပဒေ ချိုးဖောက်ရာ ရောက်တယ်လို့ တရားရေး ဝန်ကြီး ထုတ်ပြန်ချက်မှာ ပါရှိခဲ့ပါတယ်။

ဘရောင်းဟာ အမေရိကန် လေတပ်မှာ အမှုထမ်းသက် ၂၄ နှစ် ရှိခဲ့တဲ့ လေယာဉ်မှူးဟောင်း တစ်ဦးပါ။ သူ့ရဲ့ အမှုထမ်း ကာလမှာ နျူကလီးယား လက်နက်တွေ သယ်ယူရတဲ့ ပျံသန်းမှုတွေ အပါအဝင် လျှို့ဝှက်အဆင့် မစ်ရှင်တွေကို ကိုင်တွယ်ခဲ့ရတယ်လို့လည်း ဆိုပါတယ်။

၁၉၉၆ ခုနှစ်မှာတော့ သူဟာ လေတပ်ကနေ အနားယူပြီး ကုန်တင် လေယာဉ်မှူး တစ်ဦးအဖြစ် ပြောင်းလဲ အလုပ်လုပ်ခဲ့ပါတယ်။ အဲဒီနောက် သူဟာ A-10နဲ့ အဆင့်မြင့် မျိုးဆက်သစ် F-35 တိုက်လေယာဉ်တွေ မောင်းနှင်မှု သင်တန်းပေးတဲ့ ကန်ထရိုက် သင်တန်းဆရာ တစ်ဦးအဖြစ် အမေရိကန် လေတပ်နဲ့ ပူးပေါင်း အလုပ်လုပ်ခဲ့ပါတယ်။

၂၀၂၃ ခုနှစ်၊ ဩဂုတ်လမှာတော့ သူလျှိုမှုအတွက် အမေရိကန်မှာ ထောင် ၄ နှစ် ကျခဲ့ဖူးသူ စတီဖန် ဆူဘင်ရဲ့ ချိတ်ဆက်ပေးမှုကြောင့် တရုတ်ရဲ့ စာချုပ် ကမ်းလှမ်းမှုကို ဘရောင်းက လက်ခံ ရရှိခဲ့ကြောင်း သိရပါတယ်။

တရုတ်ဟာ ပြီးခဲ့တဲ့ နှစ်ပိုင်းတွေအတွင်း စစ်ရေးအင်အားနဲ့ စစ်ရေးနည်းပညာပိုင်းကို တဟုန်ထိုး မြှင့်တင်လာနိုင်ပြီး စစ်လက်နက်တွေရဲ့ ရုပ်ဝတ္ထုပိုင်းက မြန်မြန်ဆန်ဆန် တိုးတက်လာခဲ့ပါတယ်။ ဒါပေမဲ့ လေယာဉ်မှူးတွေကို လေ့ကျင့်ပေးမှု အပိုင်းမှာတော့ အမေရိကန်နဲ့ အနောက်မဟာမိတ် နိုင်ငံတွေရဲ့ နည်းစနစ်တွေကို လိုက်မမီသေးတာကြောင့် စစ်မှုထမ်းဟောင်းတွေကို လုပ်ခလစာ အများအပြားနဲ့ မက်လုံးပေး စည်းရုံးပြီး သင်တန်းဆရာအဖြစ် ငှားရမ်းမှုတွေ ရှိနေကြောင်း ထောက်လှမ်းရေး အေဂျင်စီတွေက သတိပေးထားပါတယ်။

ကိုးကား: Standard

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA