Скачать или смотреть Ақтөбеде адамдар мен малдарға қасқырлар шабуылы азаймай отыр

Ақтөбе облысы Әйтеке би ауданында Асқар Әбдібек есімді балаға таңертең мектепке кетіп бара жатқанда, қасқыр шапқан. Беті қатты жарақаттанған оны санитарлық ұшақпен аудандық ауруханаға жеткізіп, құтырмаға қарсы екпе жасаған. Содан бері де Ақтөбеде ит-құстың ауыл адамдары мен малдарға шабуылы азаймай отыр. Ал, кәсіпкерлікпен қоса, аңшылықпен де айналысатын кейбір азаматтар түз тағысын қазіргі заманғы озық техника көмегімен де ұстайтын болған. 20 мың долларлық моторлы шана мініп, мұздай қаруланып аң қуатын аңшылар тіпті, шекесіндегі бейнекамера арқылы қансонарды түгел түсіріп те отырады. Бір сонарда 20 қасқырға дейін ұстайтын қазіргі заманғы кәсіпкер аңшылардың өмірімен, әріптестеріміз танысып қайтты.
Бұл қансонарда қасқыр қуғандар. Бірақ, түз тағысын аулау үшін мұқият дайындық пен ұзақ жылғы тәжірибе керек. Ақтөбелік заманауи аңшылар бес қаруы сай, мінгені моторлы шана болған адамдардың өзіне қасқыр тұра шабады дейді.
Аңшы:
Тым жақындамау керек, жақындасаң, өзіңе тұра шабады.
20 жылдан бері аң аулауды кәсіп еткен бұл үш азамат қазір бір-бірін ыммен түсінетін команда. Оларға кейде Ресейден де достары келеді. Бұлар үнемі қансонарда ізге түсуді әдет қылған. Бірақ, айтуларынша, мотордың дауысын қасқырлар 10-15 шақырымнан естіп қашады. Үш шанамен қаумалап, түз тағысын басы мен қолтығын көздеп атса да, оқ тимегенде, шанамен қағып өтуге тура келеді.
Аңшылардың айтуынша, қысты күндері оларды Ақтөбенің маңындағы ауылдар кейде арнайы шақыртады. Өйткені, ит-құс ауылға, малға шабуын жиілететін шақ аз емес. Қанша сәнді, қанша қымбат техникамен аң қуса да, аңшылар бұл кәсіпті "еріккеннің ермегі емес" деп бағалайды. Бұған қоса, олар тек заң жүзінде рұқсат етілген аңдарды аулауға серт еткен.