តារាភាពយន្ត ប៉ា ព្រីកា តួឯកក្នុងខ្សែភាពយន្តជីវិតសោករឿងកោដ្ឋិមួយពីរនាក់

ក្នុងបច្ចុប្បន្ននេះ មានអ៊ំពូមាមីងបងប្អូនមួយចំនួនមិនសូវស្គាល់តារាភាពយន្ត ប៉ា ព្រីកាឡើយ ក៏ព្រោះតែលោកស្រី ប៉ា ព្រីកា ចូលរួមប្រឡូកក្នុងវិស័យភាពយន្តក្នុងរយះពេល៥ឆ្នាំប៉ុណ្ណោះគឺរវាងពីឆ្នាំ១៩៦៣ ដល់ឆ្នាំ១៩៦៧ ហើយខ្សែភាពយន្តល្បីៗដែលលោកស្រីបានសម្តែងបានវិនាសបាត់បង់អស់ហើយនោះ។
ប៉ា ព្រីកា ជាតារាភាពយន្តមួយដួងធ្លាប់មានឈ្មោះល្បីល្បាញនៅពាក់កណ្តាលទសវត្ស៦០ ដែលរាប់ថា ស្ថិតនៅក្នុងជំនាន់ទី២នៃសម័យយុគមាស។
ខ្សែភាពយន្តដំបូងដែលលោកស្រី ប៉ា ព្រីកាបានសម្តែងជាតួរងក្នុងរឿង កូលាបស្រពោន របស់ផលិតកម្មព្រះកែវមរតកភាពយន្ត។ បន្តមកលោកស្រីបានសម្តែងជាតួរងសំខាន់ក្នុងខ្សែភាពយន្តបីរឿងទៀត គឺរឿង អណ្តែតតាមវាសនា , រឿង ដាវរឿងដាវរោយ របស់ផលិតកម្មរាជសីហ៍ភាពយន្ត និងរឿង ចន្ទ្រាដីខ្មែរ របស់ផលិតកម្ម បន្ទាយស្រីភាពយន្ត។
នៅឆ្នាំ១៩៦៦ លោក អ៊ឹម វ៉ូ បានប្រគល់តួនាទីតួឯកស្រីជូនលោកស្រីតាមរយះខ្សែភាពយន្តរបស់លោករឿង កោដិ្ឋមួយពីរនាក់ ខណៈនោះផលិតករ អ៊ឹម វ៉ូ បានប្រគល់ចម្រៀងមួយបទបញ្ចូលក្នុងខ្សែភាពយន្តនេះអោយលោកស្រី ប៉ា ព្រីកា ច្រៀងដោយផ្ទាល់ទៀតផង។ ក្នុងការសម្តែងជាតួឯកក្នុងភាពយន្តជីវិតសោកនេះ តារាភាពយន្ត ប៉ា ព្រីកា បានទទួលការលើកសរសើរពីការសម្តែងដ៏ល្អក្នុងទំព័រទស្សនាវដ្តី Kambuja និងទស្សនាវដ្តី បច្ចុប្បន្នភាពនៃកម្ពុជា។
មុនពេលលោកស្រី សម្រាកពីវិស័យសិល្បៈភាពយន្ត លោកស្រីបានសម្តែងជាតួសំខាន់ក្នុងខ្សែភាពយន្តចំនួនបីរឿងទៀត គឺរឿង នារីខ្មែរដៃដែក , រឿង គួរអោយចុកឈាម និងរឿង វាសនាឬការកសាង។
ចំពោះប្រវត្តិឯកជននៃជីវិតគ្រួសារលោកស្រី ក្រុមដំណើរខ្មែរកំពុងធ្វើការស្រាវជ្រាវយ៉ាងសកម្មដើម្បីស្វែងរកសាច់ញាតិរបស់លោកស្រី។