Скачать или смотреть Tv Klan - Zgjerohet konflikti në Lindjen e Mesme

Izraeli nisi një valë të re sulmesh ajrore kundër Iranit këtë të hënë dhe zgjeroi hartën e veprimit duke shënjestruar edhe Libanin.

Ushtria njoftoi se po sulmonte vende të lidhura me militantët shiitë të Hezbollahut, pasi grupi aleat i Iranit kishte lëshuar raketa dhe dronë drejt shtetit hebre në hakmarrje për Khamenein.

Paraprakisht u raportua për 31 persona të vrarë dhe rreth 150 të plagosur, kryesisht në periferitë e kryeqytetit Bejrut.

Tanke izraelite u panë të afroheshin në zonën kufitare me Libanin herët këtë të hënë, ndërsa ushtria izraelite u bëri thirrje njerëzve në gati 50 fshatra libanezë të evakuohen.

“Kemi mobilizuar afër njëqind mijë rezervistë. Jemi të vendosur për të mbrojtur kufirin verior dhe të përgatitur për të gjitha mundësitë. Të gjitha opsionet janë në tryezë”, deklaroi Effie Defrin, zëdhënësi i ushtrisë izraelite.

Izraeli gjithashtu nisi sulme të tjera kundër Iranit. Shpërthime u dëgjuan në pjesë të ndryshme të kryeqytetit. Sipas Gjysmëhënës së Kuqe, numri në total i viktimave iraniane ka arritur mbi 555. 165 prej tyre janë raportuar nga bombardimi i një shkolle vajzash në ditën e parë të sulmit.

Pamjet treguan edhe një stacion policie në Teheran të dëmtuar rëndë nga bombardimet gjatë natës.

Në orët e para të mëngjesit, sirenat e sulmeve ajrore u aktivizuan në të gjithë Izraelin, përfshirë Tel Avivin dhe Jerusalemin.

Shpërthime të forta u dëgjuan në të gjitha vendet e Gjirit, teksa një shtëllungë e madhe tymi dilte nga ambasada amerikane në Kuvajt. Ministria e Mbrojtjes e Kuvajtit tha se disa avionë ushtarakë të Shteteve të Bashkuara u rrëzuan dhe se të gjithë anëtarët e ekuipazhit mbijetuan (sipas CNN).

Pamjet në rrjetet sociale treguan avionin dhe pilotët që zbrisnin me parashutë.

Një sulm me dron goditi bazën e Forcave Ajrore të Mbretërisë së Bashkuar në Akrotiri në Qipro gjatë natës, duke shkaktuar dëme të kufizuara. Sulmi ndodhi disa orë pasi Londra zyrtare njoftoi vendimin për të lejuar forcat amerikane të përdornin bazat e saj në rajon për sulme ndaj Iranit.

“Baza e vendimit tonë është vetëmbrojtja kolektive e miqve dhe aleatëve të hershëm dhe mbrojtja e jetëve britanike. Kjo është në përputhje me ligjin ndërkombëtar,” deklaroi Keir Starmer, kryeministër i Mbretërisë së Bashkuar.

Mbretëria e Bashkuar, së bashku me Francën dhe Gjermaninë, thanë të dielën se ishin të gatshme të mbronin interesat e tyre dhe ato të aleatëve të tyre në Gjirin Persik, nëse është e nevojshme, duke ndërmarrë veprime mbrojtëse kundër Iranit.

Ndërkohë që qielli i rajonit është paralizuar nga sulmet, qindra fluturime janë anuluar ose pezulluar në aeroportet kryesore të Lindjes së Mesme, duke lënë mijëra pasagjerë të bllokuar.

Në deklaratat e fundit, presidenti amerikan Donald Trump tha se operacioni amerikano-izraelit ndaj objektivave iraniane mund të vazhdojë për të paktën katër javë.

SUBSCRIBE to “RTV KLAN” on YouTube for more videos!

Email: info@tvklan.al

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook:   / tvklan  
Follow Tvklan on Instagram:   / rtvklan  
Programet e Tv Klan mund t’i ndiqni edhe në faqen https://tvklan.al/programe/