قصيدة ياسر التويجري في أخوه

قصيدة ياسر التويجري في أخوه
#ياسر_التويجري#شعر#ابيات#اخوي#قصيد


يا راكب اللي مساحيبه طشاش بردي
تقول جرداً من غبار السيوح بهقا

مفورشٍ كل ما تاطا عليه يغدي
أطوع من اللي عليه السوط والمعرقا

إليا لهدته على الممسوح راح يعدي
وان كان تبغاه يرقى فالنوازي رقا

يا راكبه لا بدا ليل وتبيّن جدي
وامست قرانيس عقبان الخلا فالنقا



ميّل على بيت كساب السمان الهدي
الدمث ابو مرحبا للضيف وآبو البقا

اللي لي احن من قلبي وقلب ولدي
شقيقي اللي معوضني عن الاشققا




سلام يا اكثر فعل طيب وكفٍ ندي
يالمتقي والتقى والتوق والمتقا


يا مقتدى الظهر يا حزامي ويا مسندي
يا مكسبي من حياة البهذله والشقا

يا وافرٍ منك يستنبط سنا الأبجدي
يا هقوةٍ كانت الاصعب على من هقا

يا وهبةٍ قبل نوماسي وعقب سعدي
أيقونةٍ كانت الأكثر وضوح ونقا

يا وجهةٍ كانت براسي قبل لااهتدي
للنور واطلع من الضيعة بطيّب لقا



الله يالمبتدأ للعفو والمبتدي
يا كثر مالك من ضعاف النفوس عتقا

يا سلاحي الحاضر المذخور في مجندي
يالبيّن اللي ما عمره فاللزوم اتقى


ياشوق نجلاً محياها مطالع غدي
عفيفةٍ ما قِصد فيها سقاالله سقى



يا اخوي ضاقت وحارت بي وكل جهدي
وعلومي علوم وظروف الزمان محقى


والناس ما ادري علام الناس ما تنحدي
للحق والحق واضح والرجال حققى

يا اخوي بار الردي وعادي يبور الردي
المشكلة باروا الأخوان والاصدقا


عجزت لا اقطع رجاء وأتوب وانفض يدي
باللي على البال رغم انه بهم وش بقى