Скачать или смотреть សហគមន៍កសិកម្មសាមគ្គីមនោរម្យ កំពុងមមាញឹកប្រមូលផលស្ពៃក្តោប និងស្ពៃបូកគោ​ខណៈការបញ្ជាទិញកាន់តែ

ខេត្តមណ្ឌលគិរី ៖ អ្នកដាំបន្លែសុវត្ថិភាពសហគមន៍កសិកម្មសាមគ្គីមនោរម្យ កំពុងមមាញឹកប្រមូលផលស្ពៃក្តោប និងស្ពៃបូកគោ​ ក្នុងសប្តាហ៍​ទីពីរ​នៃខែកុម្ភៈនេះ ខណៈការបញ្ជាទិញកាន់តែមានច្រើនពីអតិថិជន ព្រោះគុណភាព និងតម្លៃសមរម្យ។លោក ភិន ផន ប្រធានសហគមន៍បន្លែសុវត្ថិភាពកសិកម្មសាមគ្គីមនោរម្យ បានឲ្យដឹងថា បច្ចុប្បន្នបងប្អូនអ្នកដាំដុះ​បន្លែ​បានចងក្រងគ្នាជា​សហគមន៍ មានចំការច្រើនទីតាំងក្នុងក្រុងសែនមនោរម្យ ដែលអាចផ្គត់ផ្គង់ទៅដល់អ្នកបញ្ជាទិញ យកទៅលក់នៅតាម​បណ្តាផ្សារទំនើបនានា និងខេត្តផ្សេងៗ។លោក ភិន ផន បន្តថា រាល់ថ្ងៃនេះបន្លែដែលទទួលបានការបញ្ជាទិញច្រើនជាងគេពីសំណាក់មហាជន គឺស្ពៃក្តោប និងស្ពៃបូកគោ ដោយសារ​វា​មានរសជាតិឆ្ងាញ់ប្លែកពីតំបន់ដទៃ ទើបទទួលបានការគាំទ្រយ៉ាងច្រើនបែបនេះ។ រឿងរសជាតិមួយបែប បើនិយាយពីគុណភាពបន្លែដែលដាំ​ដោយប្រជាសហគមន៍នៅក្រុងសែនមនោរម្យ គឺធានាពីសុវត្ថិភាពជូនដល់សុខភាពរបស់អ្នកបរិភោគ១០០% ដ្បិតការដាំដុះគឺសុទ្ឋតែមានការ​ត្រួត​ពិនិត្យបានយ៉ាងត្រឹមត្រូវពីអ្នកជំនាញ និងការជួយផ្នែកបច្ចេកទេសពីមន្ត្រីមន្ទីរកសិកម្មផងដែរ។ លោក បន្តថា ស្ពៃក្តោប និងស្ពៃបូកគោ ដែលលោកកំពុងប្រមូលផលនេះ គឺលក់បាន​តម្លៃចាប់ពីប្រាំមួយពាន់​រៀល ទៅប្រាំ​ពីរពា​ន់​រៀល ។ ក្រៅពីស្ពៃបូកគោ និងស្ពៃក្តោប សហគមន៍បន្លែសុវត្ថិភាពកសិកម្មសាមគ្គីមនោរម្យ នៅមានដាំបន្លែជាច្រើនទៀតរួមមាន មើមយ៉េន ការ៉ុត ត្រប់ សាលាដ៏ ឆៃថាវ…។ យ៉ាងណាក៏ដោយបើតាមការបញ្ជាក់ពីលោក ភិន ផន ទោះបីកសិករបានប្រមូលផ្តុំគ្នាជាសហគមន៍ ដើម្បីផ្គត់ផ្គង់ បន្លែតាមការបញ្ជាទិញពីអតិថិជន ក៏នៅមានការខ្វះខាតបរិមាណបន្លែម្តងម្កាលនារដូវវស្សាសម្រាប់ទីផ្សារ ដែលតម្រូវឲ្យកសិករត្រូវបង្កើន​ការដាំដុះបន្ថែម។លោក ភិន ផន ប្រធានសហគមន៍បន្លែសុវត្ថិភាពកសិកម្មសាមគ្គីមនោរម្យ​បានផ្តាំផ្ញើដល់បងប្អូនកសិករទាំងអស់ ដែលកំពុងប្រកបរបរដាំបន្លែ​ដូចគ្នា សូមសិក្សាបច្ចេកទេសពីមន្ត្រីជំនាញឲ្យបានច្បាស់លាស់ ព្រោះនៅពេលដែលបន្លែដែលយើងដាំដុះមានគុណភាពល្អ មានសុវត្ថិភាព យើងនិងទទួលបានតម្លៃថ្លៃពីការបញ្ជាទិញ។ មិនត្រឹមតែប៉ុណ្ណោះបងប្អូនប្រជាកសិករ ត្រូវចេះរួបរួមគ្នាសាមគ្គីជាសហគមន៍ ដើម្បីមានឱកាស​សហ​កា​រជាមួយក្រុមហ៊ុនទទួលទិញបន្លែឬពីផ្សារទំនើបនានានៅរាជធានីភ្នំពេញ ដែលអាចធានាពីតម្លៃទីផ្សារល្អសម្រាប់អ្នកដាំដុះផ្ទាល់។លោក សេង សៅ ប្រធានការិយាល័យក្សេត្រសាស្ត្រ និងផលិតភាពកសិកម្មនៃមន្ទីរកសិកម្មខេត្តមណ្ឌលគិរី បានឲ្យដឹងថា បន្លែសុវត្ថិភាពគឺ​មានទីផ្សារច្រើនសម្រាប់នាំចេញ ជាពិសេសគឺស្ពៃក្តោប និងស្ពៃបូកគោ ។ លោក បញ្ជាក់​ថា សម្រាប់​ឆ្នាំ​២០២៤​កន្លង​ទៅ ការងារ​បង្កបង្កើន​ផលដំណាំ​សាក​វប្បកម្ម​បន្លែ ល្ហុង ឪឡឹក ម្នាស់ ស្វាយ ទុរេន ប័​រ ក្រូច​វ​ល្លិ៍ និង​ស្រកានាគ អនុវត្ត​បាន​សរុប​ចំនួនជាង ២ពាន់ហិ​កតា កើន​លើស​ឆ្នាំ​២០២៣ ចំនួន ​៦៣​ហិ​កតា និង​មាន​ទិន្នផល​មធ្យម​ ១២​តោន​ ក្នុង​មួយ​ហិ​កតា ស្មើ​បរិមាណ​ផល​សរុប​ជាង២ម៉ឺនតោន ៕អត្ថបទ រូបភាព ករុណា