Ajak Timtemba Lima - Limala Longkümer (AMR)

Limala Longkümer - ajak timtemba lima (AMR)

07:04:2021 nü car yangloshijen (garage) ka nong lia, ano yakta dang NL 10 car ka aser taxi car tila ka ta aro aser tena perongla ka kü ajiji aser ka kü abenlen nong car ji anener yanglodaktsü. Ozü asem külemi pei pei car ji yangloba repranger, saka kati ka den o mejempiteper. Yakta dak meshimetsür tantsür ka aoso (plate) amer ozü asem alidak jaki süi. Taxi anishisang jaki sen ter akiteter, tantsüla nem aküja ashi. “Ojala ni akokba ajak aki ne nem sen ter dang akütsüteter” Tantsüla jaki ashi, “Ni na nongi sen tali menüngdaker, aser ni asoshi sen ter ya aika.” NL 10 kipor tolorsang künati taxi anishisang aser tantsüla tena jempiba ajak menürema reprang. Taxi anishisang asoshi sen ter ji aikabo masütsü akok, saka tantsüla asoshi sen ter ji aika dang liasü. Iba sülen taxi anishisang jaki car yangloshitsür nem keji takütsütsü liasü, aji akütsür oadok. Saka nibo ano longsü ka (1 hour) shibo car yangloshijen mapangji akitsüla. Ni kü car jaki ia amen aser ozü asem den tantsürla ajoroba nongi ken ka yanglotsü kü melong nong kanga ajongshi. Kü mobile phone nong “Ajak Timtemba Lima” nükmen ser iba nü iba ken ya zülo. Aser ni iba ken ya osang tajong ken yimya nong yanglo. Imlipilema iba video repranger ajaki sarasatema reprangdaktsüner

Lyrics (07:04:2021) Talitemjen Imchen
Composer : Wati Jamir

Tolor den dang masü tilar den tembar Yisu
Shibai pa temeshi lenmang nong teti jajar
Alima nong Yisu den pa nemetong tembar
Aser tatem nong Pai kodaki anitsü

Alima yabo ajak timtemba lima
Takar makar ajak shisapoloba lima
Kenü manger mesangwa nong süitemadoktsü
Nisonger arishi tenemser metsü lir anasü dang

Benjong meimer takarsang melomi nong lir
Meshimetsür Lazarus Kodak Yisu den lir
Atiano nai kobala lenmang shiyimer
Teti dangbo taoji mapang ya malitsü

Alima yabo ajak timtemba lima
Takar makar ajak shisapoloba lima
Kenü manger mesangwa nong süitemadoktsü
Nisonger arishi tenemser metsü lir anasü dang

Na sensaka liaka kobika timtemtsü
Na takar süaka nai kobika akatsü
Akümlir mapa renemnü ajak doktsütsü
Kodak nong alima rongsen jenjang maka

Alima yabo ajak timtemba lima
Takar makar ajak shisapoloba lima
Kenü manger mesangwa nong süitemadoktsü
Nisonger arishi tenemser metsü lir anasü dang