Скачать или смотреть 20 NOVO ECIJANA, OPISYAL NANG IPINAKILALA SA BINIBINING NUEVA ECIJA 2026 | TV48 STATION

20 NOVO ECIJANA, OPISYAL NANG IPINAKILALA SA BINIBINING NUEVA ECIJA 2026

Opisyal nang ipinakilala ang 20 kandidata na maglalaban sa Binibining Nueva Ecija 2026 sa ginanap na Official Sashing at Press Conference noong March 8, 2026 sa Event Center ng SM City Cabanatuan.

Ang mga kandidata ay nagmula sa iba’t ibang bayan at lungsod ng Nueva Ecija at ipinakilala sa publiko at sa mga kinatawan ng media bilang mga opisyal na kalahok sa patimpalak.

Ang naturang pageant ay inihahandog ng Pamahalaang Panlalawigan ng Nueva Ecija sa pamumuno ni Governor Aurelio 'Oyie' Umali at Vice Governor Lemon Umali, kasama ang suporta ni Former Governor and Congresswoman Cherry Domingo-Umali. Katuwang din sa programa si Former Vice Governor Emmanuel Antonio 'Doc Anthony' Umali, franchise owner ng Miss World Nueva Ecija at Miss Grand Philippines Nueva Ecija.

Isinagawa ang patimpalak sa pakikipagtulungan ng Jacks and Queen Organization Inc., ang franchise partner ng Miss Universe Philippines Nueva Ecija. Dumalo rin sa programa sina Maica Cabling Martinez, Corporate Secretary ng organisasyon at Local Director ng Miss Universe Philippines, at Jason Avalos, chairman ng Committee on Tourism and Culture ng Sangguniang Panlalawigan ng Nueva Ecija.

Ayon kay Mara San Pedro, mahalagang pagkakataon ang sashing at press conference upang ipakilala ang mga kandidata na inaasahang magsusulong ng turismo ng lalawigan.

Sinabi naman ni Atty. Jose Maria Ceasar San Pedro, Provincial Administrator, na nagsisilbing plataporma ang patimpalak upang maipahayag ng mga kandidata ang kanilang mga layunin at adbokasiya kasabay ng pagdiriwang ng National Women’s Month.

Sa press conference, nagkaroon din ng pagkakataon ang mga miyembro ng media na magtanong sa mga kandidata tungkol sa kanilang paghahanda at adbokasiya.

Samantala, personal naming nakapanayam ang kandidata mula sa Lupao na si Joanalie Francisco,na unang beses pa lang na sumali sa isang isang provincial pageant.

Ayon sa kanya, wala siyang napanalunang titulo sa kanilang municipal pageant ngunit nagpasya siyang sumali dahil sa suporta ng mga taong naniniwala sa kanyang kakayahan.

Habang ang kandidata mula sa Palayan City ay ginagamit naman ang kanyang mga karanasan sa pageantry bilang paghahanda sa kompetisyon, matapos na ilang beses ding kumatawan sa Nueva Ecija sa mga national pageant.

Maglalaban ang 20 kandidata para sa mga titulo ng Binibining Nueva Ecija Universe, Binibining Nueva Ecija World, at Binibining Nueva Ecija Grand International 2026. Ang mga mananalo ay magsisilbing tourism ambassadors ng lalawigan.