Uğursuz eksimer lazer əməliyyatları

Eksimer lazer əməliyyatı (zəifgörmə əməliyyatı) olunanlar və olunmağı düşünənlər, bu videonu izləməyinizi tövsiyə edirəm. 👀Görəsən, eksimer lazer əməliyyatı, həqiqətən də, uğursuz nəticələr verə bilərmi?
👀Əgər zəifgörmə aradan qalxırsa, bəzilərinin eksimer lazerlə bağlı şübhələri nədən qaynaqlanır?
Videonu izləməyi və suallarınızı qeyd etməyi unutmayın.

Aşağıdakı linklərə daxil olaraq məni digər sosial şəbəkələrdən də izləyə bilərsiniz.
Facebook:   / rafadarxalilov  
İnstagram:  / rafadarxalilov  


Bugünkü mövzumuz uğursuz eksimer lazer əməliyyatları. Pasiyentlər gəlir: “Həkim, eşitmişik, bu əməliyyatda uğursuzluqlar olur. Bu uğursuzluğa görə narahatıq, çəkinirik, əməliyyat olunmaq istəmirik”. Bu mövzuları eşitdikcə istər-istəməz belə bir video hazırlamaq və ya bu mövzunu müzakirə etmək qərarına gəldim. Eksimer lazer əməliyyatının ideyası 70-ci illərdən ortaya atıldı, sonra mövzu təkmilləşdi, təkmilləşdi və 1988-ci ilə qədər əvvəlcə eksperiment hissələri, heyvan gözləri, sonra görməyən gözlər üzərində, 1988-ci ildən ilk dəfə görən göz üzərində əməliyyat icra olunmağa başladı və çox etaplar keçərək günümüzə gəldi çıxdı. Hazırda günümüzdə dünyada sayca ən çox icra olunan əməliyyat qrupudur eksimer lazerlər və dünyada ən təhlükəsiz əməliyyat qrupu sayılır. İldə orta hesabla 5-7 milyon insan bu əməliyyatdan istifadə edir. Bu əməliyyatın mahiyyəti, zəifgörməsi olan insanlarda zəifgörməni ortadan qaldırır və normal görməyə qovuşurlar. Eksimer lazerin 9 fərqli metodu var və bu metodlar, əlbəttə ki, pasiyentin gözünün parametrlərinə görə verilə biləcək qərarlardır. Əməliyyatın məqsədi görməni yaxşılaşdırmaqdır. Bəzi hallarda pasiyentlərlə qarşılaşırıq: “Əməliyyat uğursuzdurmu?”. Ya pasiyent soruşur: “Həkim, mən bu əməliyyatı olsam, əməliyyatda problem ortaya çıxma ehtimalı nə qədərdir?”. Ola biləcək problemlər ən birincisi rast gəlinə biləcək teorik olaraq infeksiyadır. Şükür Allaha, hələ indiyə qədər infeksiya ilə bağlı bir problem yaşamamışıq. İnsanları ən çox narahat edən zəifgörmənin geriqayıtması, yəni pasiyentlər uğursuzluğu belə qiymətləndirirlər. Bu mövzunu bir az açmaq istəyirəm. Ümumiyyətlə, dünya statistikasına görə əməliyyat olan 100 nəfərdən 4-də əməliyyatdan sonrakı 5 il müddətində başlanğıc refraksiyanın 20%-i geri qayıda bilər. Bu qəbul oluna biləcək bir rəqəmdir. Yəni bunu tərsinə çevirsək, əməliyyat olan 96% insan əməliyyatdan heç bir problem yaşamadan ömürlərini tamamlaya bilirlər. 4% insan da əməliyyatdan sonrakı 5 il içərisində problem yaşana bilər. Bu problem nədir? Başlanğıc refraksiyanın 20%-i geri qayıda bilər, yəni əməliyyatdan öncə pasiyentin gözünün dərəcəsi mənfi 10 idisə, əməliyyatdan sonra mənfi 2-ə qədər geri qayıda bilər. Uğursuzluğu bir az daha vurğulayırlar pasiyentlər. Yenə də mən uğursuzluğu, bir neçə dəfə bu kəlməni mən də vurğulamaq ehtiyacı hiss edirəm. Bu əməliyyatlarda uğursuzluq deyəndə biz nəyi nəzərdə tuturuq? Əməliyyatdan öncə pasiyent 2% görürdü, mənfi 7 dioptriya ilə görməsi 100%-ə çıxırdı. Pasiyentlə söhbət etdik: “Bəli, sizdə zəifgörmə var. Görməniz 2%-dir. Əməliyyatdan sonra 100%-li bir görmə gözləyirik”. Əməliyyat etdik, əməliyyatdan sonra pasiyentin görməsi 100% oldu. Aylar keçdi, illər keçdi, hər şey qaydasındadır. Bir müddətdən sonra pasiyent gəldi: “Həkim, hiss edirəm ki, görməyimdə zəifləmə var”. Müayinə edirsən, baxıb görürsən ki, bəli, 100% planlaşdırmışdıq. Pasiyentin görməsi 100-dən 90-a düşür və ya 80-ə düşür. Yəni bu uğursuzluq kəlməsi, əslində, izah olunmalı kəlmədir. Uğursuzluq o demək deyil ki, pasiyent 2% görürdü, əməliyyat olundu 100%-ə çıxdı, təzədən yenə 2%-ə qayıtdı. Xeyr, 100% görürdü, 90%-ə düşdü, uğursuzluq budur. 100% görürdü, 80%-ə düşdü, uğursuzluq budur. Yaxud Allah qorusun, pasiyent 2% görürdü. Əməliyyat olundu, kor oldu. Belə bir şey mümkün deyil. Mən illərə baxanda ən çox say olaraq da, il olaraq da təcrübəsi olan adamlardan biriyəm. Bu 21 min nəfərdən 70 neçə nəfərində təkrar mənfinin bir hissəsi geri qayıdıb. Bunların da yarısına yaxını narahat olub: “Həkim, indiki görmə məni qane etmir, təkrar əməliyyat ola bilərəmmi?”. Bəli. Yəni o 70 neçə nəfərin də yarısına yaxınını təkrar əməliyyat etmişik. Yenə əvvəlki, normal, 100%-li görməyi geri qayıdıb. Bəziləri deyir ki, həkim, düzdür, görməyim zəifdir. Amma bu məni qane edir, bu görmə də məni qane edir. Təkrar əməliyyat olunmaq istəmirəm. Bu şəkildə də saxlanılır, nəzarətdə qalır. Yəni əməliyyatın uğursuzluğu bizim normal anladığımız effektivsizlik deyil, hədəfimizdən bir az geriyə qayıtmadır. Bu da kimlərdə olur? Maksimum 4% insanda. Bizim praktikamızda bu “uğrusuzluq”la qarşılaşmamaqdan ötrü əlimizdən gələn bütün tədbirləri görürük və az öncə bir rəqəm söylədim, 21 min nəfərə yaxın əməliyyatımız var və bunlardan təxminən ancaq 80 nəfərə yaxınında mənfisi geri qayıdan olub. Bu da, bilmirəm, heç hesablamamışam, 1%-in belə çox altında bir rəqəmdir.