UMAR HAYAT RASEKH | KHOWAR POETRY

چوتھا ہندوکش کلچرل کانفرنس کے پروگراموں کے سلسلے میں زیر انتظام انجمن ترقی کھوار چترال ایک محفل مشاعرہ چترال ویوہوٹل میں منعقد ہوا۔ نوجوان شاعر عمرحیات راسخؔ کا کلام پیش خدمت ہے۔

نظم: گِلائی وا گِلائیان جواب
نیویشک: عمرحیات راسخ
شکوہ:
ای دی مہ غیچی نو ہائے مہ دُعان اثر ہسے کیاغ؟
یادا؟ آرزوان ارو، تو حشر نشر ہسے کیاغ؟
کو آزمائش تو الاٶ مہ غون گنہگارو سورا؟
دنیا تھوکے مہ الائے کندوری قرارو سورا؟
قہرو معیار اوسنیران حبیبو معیارو سورا
طایفہ چیری کوری احمدِ مختارو سورا۔
بستیو دیخ کوریسو زیر اوچے زبر ہسے کیاغ؟
یادا؟ ارزوان ارو، تو حشر نشر ہسے کیاغ؟
جواب:
فکرو ای ترانگ کوچاہا کھیو دی آسایش جاݰوسان؟
تان بے صبریو ہنون کھیوتے آزمائش جاݰوسان؟
فہمہ بو کم نیسیتاو ہو کی مہ خواہش جاݰوسان
تو مہ پینجیکو طرزو کھیوتے نمائش جاݰوسان؟
طایفہ نو اوشویا وحشتو منظر ہسے کیاغ؟
رے اسوم کا دی نکی مہ غون باخبر ہسے کیاغ؟
شکوہ:
تو کوس کی خوش دوریتاو ولایتو تاجہ الوس
کیاوت "مُنیر" تو کوروس اشتیکئھے "سراجہ" الوس
اوا اُمت ہتوغو مہ ہتو مزاجہ الوس
تہ کی وٙصلو افس ہوئے ای چھویو معراجہ الوس
تو مہ وصلو افسہ ارو در بدر ہسے کیاغ؟
یادا؟ آرزوان ارو تو حشر نشر ہسے کیاغ؟
جواب:
تو کی اُمت ہتوغو تہ قول و عمل اباتھہ
طلب سوم ویݰکی نو ہوئے تہ عشقو محل اباتھہ
اصلہ احساس کی نو ہوئے عِشِق مکمل اباتھہ
ہتو اٙبٙد کورا شیر؟ کھیو کی ہویے اٙزٙل اباتھہ
سے تہ قدرو اریرا؟ تو ہو مُیسٙر ہسے کیاغ؟
رے اسوم کا دی نکی مہ غون با خبر ہسے کیاغ؟
شکوہ:
کو بندگنان موژی عٙدلو نٙرٙواہ کوروسان؟
پھتیو کھیشٹیہ نیشئے ای پھتیو تباہ کوروسان
باردے جیبریلو پھانہ کوس کھیوتے گمراہ کوروسان؟
پھتی ویتھوک پیڅھیکو سمندرین راہ کوروسان
ارو تے اچتو گیاکوت راہان پُر خطر ہسے کیاغ؟
یادا؟ آرزوان ارو تو حشر نشر ہسے کیاغ؟
جواب:
حقو باطلو موژی اوسنئیلیک حِجاب غٙلٙطٙہ؟
مہ بندگانن ساری گنئیلیک حساب غلطہ؟
پینجی جم اوچے شومو مہ ہے انتخاب غلطہ؟
کوسُم کیہ ضِد کومانہ؟ لو دیت کی جواب غلطہ؟
اسوم ہر دٙورا ویݰے اوا پٙیٙمبٙر ہسے کیاغ؟
رے اسوم کا دی نکی مہ غون با خبر ہسے کیاغ؟
شکوہ:
کیہ لو شیر؟ ہر رویوتے ایمانو دولت کو نو دوس؟
تانتے رحیم کی ریسان سفوت سہولت کو نو دوس؟
تو قیامتو انوس رویانتے مُہلت کو نو دوس؟
سف کی تہ ہوستہ شینی سفوتے جنت کو نو دوس؟
ہیہ دنیا ہیہ کیاغ؟ پھار ہتے محشر ہسے کیاغ؟
یادا؟ آرزوان ارو تو حشر نشر ہسے کیاغ؟
جواب:
لٙتٙرکٙبُنّٙ ریمان طٙبٙق عٙن طٙبٙق کھیو بچین؟
لوؤ مٙصدراری تہ گلائی مُشتٙق کھیو بچین؟
مہ نا شکریو کوری ذکرِ اٙنٙا الحٙق کھیو بچین؟
دوزخ بہشٹو ہنون بوژیکوت تو چٙق کھیو بچین؟
پورا حیاتو کوریک گناہہ بسر ہسے کیاغ؟
رے اسوم کا دی نکی مہ غون با خبر ہسے کیاغ؟
شکوہ:
ہردیو پھت مو کورے لو دیت کی تو کورا اسوس؟
کھیوتے مشقول نو بوسان ہݰ کھیوتے غرورا اسوس؟
یا نکی ہِش کورا تو، کی نو کو پوتھورا اسوس؟
عٙرشاری یو خومی تو کورا کوہِ طُورا اسوس؟
موسٰیؑ کوریکو نو ہوئے تہ ویݰکی نظر ہسے کیاغ؟
یادا؟ آرزوان ارو تو حشر نشر ہسے کیاغ؟
جواب:
تو کی پھوک غٙوُر ارو گوم اوا ہر کورا غیچی
دریاہو لہرہ غیچی ساحلو شوغورا غیچی
ہوا، اوݯھوغ، گمبوریہ زومالو ایہہ پھورا غیچی
مگم اصلی ہٙیئٙتہ گوم اوا پھوک گُورا غیچی
بہشٹہ دوم رے اسوم، دیدارو ہُنٙر ہسے کیاغ؟
رے اسوم کا دی نکی مہ غون با خبر ہسے کیاغ؟
شکوہ:
"راسخ" تہ جم ژانیران تھے تہ سُم مشقول ہیہ را
روئے مہ گمراہ جاݰونیان ہیس رویان اصول ہیہ را
فقط اللّٰهے کورے ہانی مہ قبول ہیہ را
تہ کیہ حکمو نو کورام نو بیتی عُدُول ہیہ را
وزنِ شعریو بچین مصرعہ مُکٙرٙر ہسے کیاغ؟
یادا؟ آرزوان ارو تو حشر نشر ہسے کیاغ؟
جواب:
قٙول اوچے فعلہ ای بوس، کیاوت دی تو جو لو مو دیت
اٙدٙبہ لو دیت مہ سُم کا ریران کی تو لو مو دیت
مگم رویان نسہ تو ہٙݰ بیتی بٙدخو لو مو دیت
کیانی بوئے وہم مو بوس وا ہموݰ چھوچھو لو مو دیت
ہمیش کھولاٶ رے اسوم تھوبو ہتے دٙر ہسے کیاغ؟
یادا؟ آرزوان ارو تو حشر نشر ہسے کیاغ؟