IELTS imtahanı

Xaricdə təhsil almaq, işləmək və ya təlimlərdə iştirak etmək üçün adətən bizdən dil sertifkatı tələb olunur. İngilis dili üçün ən çox tələb edilən sertifikatlar IELTS və TOEFL-dır. Bu videoda sizə İELTS imtahanı barəsində danışacağam.
IELTS sözünün açılışı International English Language Testing System-dir. Cambridge universitetinin ESOL imtahan mərkəzi, Britaniya Konsulluğu və IDP:IELTS Avstraliya tərəfindən 130-dan çox ölkədə 1100-dən çox test mərkəzində həyata keçirilir. Dünyada 10.000-dən çox universitet və təşkilat tərəfindən tanınır.
IELTS dörd hissədən ibarətdir – Listening, Reading, Writing və Speaking. Listening, Reading və Writing testləri eyni gündə verilir. Speaking testi isə eyni gündə və ya imtahan tarixindən 7 günə qədər əvvəl və ya sonra verilə bilər.
Onu da deyək ki, imtahanın : İELTS Academic (Akademik) və İELTS General training (İELTS Ümumi Hazırlıq) olmaqla 2 versiyası var. Akademik versiya ingilis dilli ölkədə təhsil almaq istəyənlər üçün nəzərdə tutulub. General Training versiyası isə ingilis dilli ölkədə işləmək və ya belə ölkələrə miqrasiya etmək istəyən şəxslər üçün nəzərdə tutulub. Bütün namizədlər eyni dinləmə və danışıq testindən keçir, lakin oxuma və yazı testləri fərqli olur.
IELTS imtahanı paper based yəni kağız üzərində verilən bir imtahandır.
Dinləmə hissəsi 30 dəqiqə davam edir, 4 bölmədən ibarətdir və asandan çətinə doğru gedir. Bölmələrdə monoloq və dialoqlar olur. Dinləmə bölməsində etməli olduğunuz maqnitafondan gələn səsə qulaq asaraq sizə verilən kağızdakı sualları cavablamaq və cavab kartına köçürməkdir. Onu da qeyd edək ki, bu bölmədə ingilis dilinin müxtəlif ləhcələrindən istifadə olunur.
Oxuma bölməsi 1 saat davam edir, 3 mətn və 40 sualdan ibarətdir. Burda da mətnlər asandan çətinə doğru dəyişir. Mətnlər Akademik və General versiyalarda fərqli olur. Akademik versiyada adətən elmi və dərs kitablarından götürülən mətnlər, general versiyada isə müxtəlif qəzet və jurnallardan götürülən köşə yazıları, məqalələr verilir. Cavablarınızı işarələdikdən sonra isə cavab kartına köçürməlisiniz.
Yazı bölməsi 2 tapşırıqdan ibarətdir, 1 saat davam edir. Bu bölmənin tərkibi də Akademik və General versiyalara görə fərqlənir. Akademik versiyada birinci tapşırıqda verilən sxem, qrafik vəya cədvəli yazılı təsvir etməyiniz, general versiyada isə məktub, şikayət ərizəsi və bənzəri yazılar yazmağınız istənilir. İkinci tapşırıq isə oxşar olub tanış bir mövzuda fikir bildirməyiniz tələb edilir.
Danışıq bölməsi üz-üzə müsahibə formasında keçirilir, 11-14 dəqiqə davam edir və 3 hissəlidir. Birinci hissədə özünüz haqqında ümumi məlumat verir, ikinci hissədə sizə verilən mövzuya hazırlaşaraq danışır, üçüncü hissədə isə imtahan götürən şəxslə ikitərəfli müzakirə edirsiniz. Bu bölmədə cavablarınız səsyazan vasitəsilə qeydə alınır.
İmtahanın ümumi müddəti 2 saat 45 dəqiqədir.

Nümunə suallar: https://www.ielts-exam.net

Mətn: Sevinc Əliyeva
Hazırladı: Sevinc Əliyeva
Səsləndirmə: Sevinc Əliyeva
Yeni videolardan ilk siz xəbərdar olmaq istəyirsinizsə: https://bit.ly/2LdMgOe

Facebook: Video Bilik
Instagram: @videobilik

The video is copyrighted by Sevinc Əliyeva and cannot be reused in other online channels without permission.