Скачать или смотреть ថ្ងៃទី៣ ឧសភា ការទូលសូមការអត់ទោសបាបដ៏ត្រឹមត្រូវ

ថ្ងៃទី៣ ឧសភា៖ ការទូលសូមការអត់ទោសបាបដ៏ត្រឹមត្រូវ
------------------------------------------------------------------------------------------
បើយើងលន់តួបាបវិញ នោះទ្រង់មានព្រះហឫទ័យស្មោះត្រង់ ហើយសុចរិត ប្រយោជន៍នឹងអត់ទោសបាបឲ្យយើង ហើយនិងសំអាតយើង ពីគ្រប់អំពើទុច្ចរិតទាំងអស់ផង។ ១យ៉ូហាន ១:៩
ខ្ញុំនៅចាំថា មានពេលមួយ សាស្ត្រាចារ្យម្នាក់ នៅសាលាព្រះគម្ពីរបានមានប្រសាសន៍ថា វិធីល្អបំផុត ដើម្បីធ្វើតេស្តមកលើទេវសាស្ត្ររបស់នរណាម្នាក់ គេត្រូវពិនិត្យមើលឥទ្ធិពលដែលទេវសាស្ត្រនោះមានមកលើការអធិស្ឋានរបស់យើង។
ខ្ញុំជឿថា នេះជាការពិតមែន ដោយសារខ្ញុំមានបទពិសោធន៍ផ្ទាល់ ក្នុងជីវិតខ្ញុំ។ កាលខ្ញុំ និងភរិយាខ្ញុំឈ្មោះ ណូអែល ទើបតែបានរៀបការ យើងមានទម្លាប់អធិស្ឋានជាមួយគ្នា រៀងរាល់ពេលល្ងាច។ ខ្ញុំកត់សម្គាល់ឃើញថា ក្នុងអំឡុងពេលខ្ញុំកំពុងចូលរួមវគ្គសិក្សាព្រះគម្ពីរ ដែលនាំឲ្យទេវសាស្ត្ររបស់ខ្ញុំមានការផ្លាស់ប្តូរយ៉ាងខ្លាំង ការអធិស្ឋានរបស់ខ្ញុំក៏មានការផ្លាស់ប្តូរ តាមរបៀបដែលគួរឲ្យកត់សម្គាល់ផងដែរ។
ការផ្លាស់ប្តូរសំខាន់បំផុតនៅសម័យនោះ បានកើតមានក្នុងការអធិស្ឋានរបស់ខ្ញុំ ដោយសារខ្ញុំបានរៀនអធិស្ឋានទូលសូមនៅចំពោះព្រះ ដើម្បីថ្វាយសិរីល្អដល់ព្រះអង្គ។ ខ្ញុំបានចាប់ផ្តើមការអធិស្ឋានថា “សូមព្រះនាមព្រះអង្គបរិសុទ្ធ” ហើយបញ្ចប់ដោយពាក្យថា “ក្នុងព្រះនាមព្រះយេស៊ូវ” ដែលមានន័យថា ការថ្វាយសិរីល្អរបស់ព្រះនាមព្រះអង្គ ជាគោលដៅ និងមូលហេតុដែលខ្ញុំបានអធិស្ឋាន។
ជីវិតខ្ញុំមានកម្លាំងឡើង ពេលដែលខ្ញុំបានរៀនអធិស្ឋាន សូមការអត់ទោសបាប មិនគ្រាន់តែផ្អែកទៅលើសេចក្តីមេត្តារបស់ព្រះ តែក៏ផ្អែកទៅលើយុត្តិធម៌របស់ព្រះអង្គ ក្នុងការលើកដំកើងតម្លៃនៃការស្តាប់បង្គាប់របស់ព្រះរាជបុត្រាព្រះអង្គ។ ព្រះទ្រង់ស្មោះត្រង់ និងយុត្តិធម៌ ហើយព្រះអង្គនឹងអត់ទោសបាប ឲ្យអ្នក(១យ៉ូហាន ១:៩)។
ព្រះគម្ពីរសញ្ញាថ្មី បានបង្ហាញនូវមូលដ្ឋាននៃការអត់ទោសបាប បានច្បាស់ជាងព្រះគម្ពីរសញ្ញាចាស់ តែមូលដ្ឋាននោះ ដែលជាការប្ដេជ្ញារបស់ព្រះ ចំពោះព្រះនាមព្រះអង្គ មិនបានផ្លាស់ប្តូរឡើយ។
សាវ័កប៉ុលបានបង្រៀនថា ការសុគតរបស់ព្រះគ្រីស្ទ បានបង្ហាញសេចក្តីសុចរិតរបស់ព្រះ ក្នុងការផ្ទេរបាបរបស់យើងទៅលើព្រះអង្គ ហើយបង្ហាញយុត្តិធម៌របស់ព្រះ ក្នុងការរាប់មនុស្សមានបាប ជាសុចរិត គឺអ្នកដែលពឹងផ្អែកទៅលើព្រះយេស៊ូវ មិនមែនពឹងផ្អែកខ្លួនឯង(រ៉ូម ៣:២៥-២៦)។
អាចនិយាយបានម្យ៉ាងទៀតថា ព្រះគ្រីស្ទបានសុគតមួយដងជាសម្រេច ដើម្បីបញ្ជាក់ភាពស្អាតស្អំនៃព្រះនាមព្រះ ក្នុងរឿងដែលមនុស្សគិតឃើញថា ព្រះអង្គហាក់ដូចជាសម្រេចសេចក្តីយុត្តិធម៌មិនបានត្រឹមត្រូវ ដោយសម្រេចឲ្យមនុស្សមានបាបរួចទោស ដោយយល់ដល់ព្រះគ្រីស្ទ។ តែព្រះគ្រីស្ទបានសុគត តាមរបៀបដែលការអត់ទោសបាប “ដោយយល់ដល់ព្រះគ្រីស្ទ” គឺមិនខុសពីការអត់ទោសបាប “ដោយយល់ដល់ព្រះនាមព្រះ”។ ដូចនេះ ក្នុងរឿងនេះ គ្មានការសម្រេចយុត្តិធម៌ដោយមិនត្រឹមត្រូវឡើយ។ មានការបញ្ជាក់ពីភាពត្រឹមត្រូវនៃព្រះនាមព្រះ សេចក្តីសុចរិត និងយុត្តិធម៌របស់ព្រះអង្គ នៅក្នុងការលះបង់របស់ព្រះគ្រីស្ទ ដែលបានលើកដំកើងព្រះនាមព្រះវរបិតា។
គឺដូចដែលព្រះយេស៊ូវមានបន្ទូល មុនពេលព្រះអង្គសុគតថា “ឥឡូវនេះ ខ្ញុំមានចិត្តតប់ប្រមល់ តើត្រូវឲ្យខ្ញុំទូលដូចម្តេច ឱព្រះវរបិតាអើយ សូមជួយសង្គ្រោះទូលបង្គំ ឲ្យរួចពីពេលនេះផង ប៉ុន្តែ គឺដោយហេតុនេះឯង បានជាទូលបង្គំមកដល់ពេលនេះ ឱព្រះវរបិតាអើយ សូមដំកើងព្រះនាមទ្រង់ឡើង”(យ៉ូហាន ១២:២៧-២៨)។ នេះជាព្រះបន្ទូលព្រះអង្គ ដែលបានបង្ហាញថា ព្រះអង្គមានយុត្តិធម៌ និងជាអ្នករាប់ជាសុចរិត ដល់អស់អ្នកដែលទទួលជឿព្រះអង្គ(រ៉ូម ៣:២៦)។