ថ្ងៃទី៥ សីហា៖ អត្ថន័យ១០យ៉ាង របស់ព្រះនាមព្រះយេហូវ៉ា

ថ្ងៃទី៥ សីហា៖ អត្ថន័យ១០យ៉ាង របស់ព្រះនាមព្រះយេហូវ៉ា
----------------------------------------------
ព្រះទ្រង់ក៏មានព្រះបន្ទូលនឹងម៉ូសេទៀតថា “ចូរនិយាយនឹងពួកកូនចៅអ៊ីស្រាអែលដូច្នេះថា ព្រះយេហូវ៉ាជាព្រះនៃពួកឰយុកោអ្នករាល់គ្នា គឺជាព្រះនៃអ័ប្រាហាំ ជាព្រះនៃអ៊ីសាក ហើយជាព្រះនៃយ៉ាកុបទ្រង់បានចាត់ឲ្យខ្ញុំមកឯអ្នករាល់គ្នា នោះជាឈ្មោះអញនៅអស់កល្បជានិច្ច ហើយក៏សំរាប់ជាសេចក្តីរំឭកពីអញ ដល់គ្រប់ទាំងដំណរៀងរាបតទៅ”។(និក្ខមនំ ៣:១៥)
ក្នុងព្រះគម្ពីរសញ្ញាចាស់ យើងឃើញថា ពួកអ៊ីស្រាអែលបានហៅព្រះនាមព្រះអម្ចាស់ថា ព្រះយេហូវ៉ា ដោយផ្អែកទៅលើពាក្យ “អញជាព្រះដ៏ជាព្រះ”។
ដូចនេះ រៀងរាល់ពេល យើងឮពាក្យ យេហូវ៉ា ឬរៀងរាល់ពេល អ្នកឃើញពាក្យព្រះអម្ចាស់ អ្នកគួរតែគិតថា ពាក្យនេះជាព្រះនាមព្រះ ដែលគេបានហៅ ដោយផ្អែកទៅលើពាក្យ “អញគឺជាព្រះដ៏ជាព្រះ” ហើយរំឮកខ្លួនឯងថា ព្រះទ្រង់ជានរណា។
ពាក្យ យេហូវ៉ា ឬពាក្យ “អញជាព្រះដ៏ជាព្រះ” មានការបកស្រាយ យ៉ាងតិច១០យ៉ាង អំពីព្រះអម្ចាស់ :
១. ព្រះអង្គមិនមានការចាប់ផ្តើមឡើយ។ ក្មេងៗចូលចិត្តសួរថា “តើនរណាបង្កើតព្រះ?” ហើយឪពុកម្តាយដែលមានប្រាជ្ញាអាចឆ្លើយថា “គ្មាននរណាបង្កើតព្រះទេ។ ព្រះទ្រង់តែងតែមានព្រះវត្តមានជានិច្ច គឺគ្មានការចាប់ផ្តើមទេ”។
២. ព្រះអង្គគ្មានទីបញ្ចប់ឡើយ។ បើព្រះអង្គមិនមានព្រះជន្មទេ នោះព្រះអង្គក៏មិនអាចសុគត ព្រោះព្រះជាអង្គបុគ្គល។
៣. ព្រះអង្គជាការពិតដាច់ខាត។ គ្មានការពិតអ្វី ដែលមានមុនព្រះអង្គ។ គ្មានការពិតអ្វី ដែលកើតមាននៅក្រៅព្រះអង្គ បើព្រះអង្គមិនបានអនុញ្ញាត ហើយបង្កើតឲ្យមានការពិតនោះទេ។ ព្រះអង្គមានវត្តមានតាំងពីអស់កល្បជានិច្ចមក គឺគ្មានអ្វីដែលមានមុនព្រះអង្គឡើយ។ គ្មានអវកាស គ្មានចក្រវាល គ្មានភាពទទេ មុនព្រះអង្គឡើយ។
៤. ព្រះអង្គមានឯករាជទាំងស្រុង។ ព្រះអង្គមិនពឹងផ្អែកទៅលើអ្វីមួយ ដើម្បីឲ្យព្រះអង្គមានវត្តមាន ឬជួយទ្រទ្រង់ព្រះអង្គ ឬក៏ផ្តល់ឲ្យព្រះអង្គនូវការប្រឹក្សាយោបល់ ឬមួយធ្វើឲ្យព្រះអង្គក្លាយជាព្រះនោះទេ។
៥. អ្វីៗដែលមិនមែនជាព្រះ គឺពឹងផ្អែកទាំងស្រុងទៅលើព្រះ។ ចក្រវាលគឺជារបស់បន្ទាប់បន្សំ។ វាបានកើតមានឡើង ដោយសារព្រះអង្គ ហើយបន្តមានវត្តមាន ពីមួយពេលទៅមួយពេល ផ្អែកទៅលើការសម្រេចព្រះទ័យរបស់ព្រះអង្គ ឲ្យវានៅមានវត្តមាន។
៦. ចក្រវាលទាំងមូល មិនអាចប្រៀបផ្ទឹមនឹងព្រះអង្គបានឡើយ។ វាគ្រាន់តែជា ការពិតការក្រុមដែលពឹងផ្អែកទៅលើព្រះអង្គ ដែលជាការពិតដែលឯករាជ្យ ប្រៀបដូចជាស្រមោលនៃសារធាតុ និងសម្លេងឡងនៃផ្គរលាន់។ អ្វីៗទាំងអស់ដែលយើងមានចិត្តស្ញប់ស្ញែងចំពោះ ក្នុងពិភពលោក និងក្នុងកាឡាក់ស៊ីនេះ គឺមិនអាចប្រៀបផ្ទឹមនឹងព្រះអង្គបានឡើយ។
៧. ព្រះអង្គមិនចេះប្រែប្រួល។ ព្រះអង្គនៅតែដដែល នៅថ្ងៃម្សិលមិញ ថ្ងៃនេះ និងជារៀងរហូត។ ព្រះអង្គមិនត្រូវការឲ្យគេជួយព្រះអង្គ ឲ្យល្អជាងមុន។ ព្រះអង្គមិនប្រែក្លាយជាអ្វីមួយឡើយ។ ព្រះអង្គនៅតែជាព្រះដដែល។
៨. ព្រះទ្រង់ជាខ្នាតគំរូដាច់ខាត នៃសេចក្តីពិត សេចក្តីល្អ និងភាពស្រស់ស្អាត។ ព្រះអង្គមិនត្រូវការឲ្យសៀវភៅច្បាប់ណាមួយប្រាប់ព្រះអង្គថា អ្វីត្រូវ អ្វីខុសនោះទេ។ និងមិនត្រូវការសៀវភៅតារាសាស្រ្ត ដើម្បីឲ្យដឹងការពិតនៃចក្រវាល។ ហើយមិនត្រូវការមគ្គុទ្ទេសក៍ ដើម្បីឲ្យដឹងច្បាស់ថា មានអ្វីល្អប្រសើរ ឬស្រស់ស្អាត។ អង្គទ្រង់ផ្ទាល់គឺជាស្តង់ដានៃអ្វីដែលត្រូវ អ្វីដែលពិត និងអ្វីដែលស្រស់ស្អាត។
៩. ព្រះទ្រង់ធ្វើអ្វីៗតាមព្រះទ័យព្រះអង្គ ហើយតែងតែត្រូវជានិច្ច តែងតែស្រស់ស្អាត និងតែងតែសមស្របនឹងសេចក្តីពិត។ ការពិតដែលនៅក្រៅព្រះអង្គ គឺព្រះអង្គបានបង្កើត និងរចនាមក ហើយគ្រប់គ្រងលើកការពិតនោះ ក្នុងលក្ខណៈព្រះអង្គជាការពិតដាច់ខាត។ ដូចនេះ ព្រះអង្គមានសេរីភាពទាំងស្រុង មិនស្ថិតនៅក្រោមការកំណត់អ្វីមួយ ដែលមិនកើតចេញពីបំណងព្រះទ័យព្រះអង្គនោះទេ។
១០. ព្រះទ្រង់ជាការពិត និងជាអង្គបុគ្គលដែលសំខាន់ និងមានតម្លៃបំផុត ក្នុងចក្រវាល។ ព្រះអង្គមានភាពសក្តិសមនឹងឲ្យយើងចាប់អារម្មណ៍ និងចាប់ចិត្តលើព្រះអង្គ ហើយស្ងើចសរសើរ និងអរសប្បាយនឹងព្រះអង្គ លើសការពិតផ្សេងទៀត ដែលរាប់បញ្ចូលទាំងចក្រវាលផង។
#Plovpit
#ផ្លូវពិត
#DirsiringGod
#JohnPiper
#សៀវភៅគ្រីស្ទាន
#SolidJoys