انا ام درمان - الفرجوني و زينب الحويرص - عبد الله محمد زين

http://www.sudanesesongs.net/

انا ام درمان - كلمات :عبد الله محمد زين

أنا أم درمان أنا السودان أنا الدر البزين بلدي
أنا البرعاك سلام وأمان أنا البفداك يا بلدي
***
أنا أم درمان لسان حالك أريتك تدري بحالي
أنا القدرت أحوالك وحبك بدري أوحالي
أقوم بأعظم الأدوار .. وأكون الساحة للثوار
وأبقى البقعة للأحرار .. وأمثل عزة السودان
***
أنا أم درمان سليلة السيل قسمت الليل وبنت صباح
أنا الولدوني بالتهليل ... وهلت فوقي غابة رماح
أنا الطابية المقابلة النيل أنا العافية التشد الحيل
وأنا القبة التضوي الليل وتهدي الناس سلام وأمان
أنا أم درمان نصرت الدين وكنت هداية للإسلام
وروحوا حولي ناس صادقين بناهم في حياتي غرام
وصانوا المبدأ والفكرة وخلدوا أعظم الذكرى
ودخلوا المدرسة الكبرى ونالوا شهادة الإيمان
***
أنا أم درمان سقاني النيل رحيق العزة من كاسو
أنا اللي مجدوا كنت دليل وآية الوحدة لناسو
أنا الفي الشاطيء الغربي بخوض نار حربي
وأنا النيل طلب قربي ومزج بين كافة الألوان
***
أنا أم درمان أنا الواحة ري البسقي العطشان
بروقى تضوي لواحة وتهدي الساري والضهبان
مرقو وشدو فوقي الناس ونادوا بقية الاجناس
وللتعمير بقيت مقياس وللتقدير بقيت ميزان
***
أنا أم درمان دا ميلادي وميلاد البشيل أسمي
أنا القدمت أولادي شرافه وسيف على وسمي
وكنت القوة والحولة دست وفزت بالجولة
كنت الراية والدولة وفي التاريخ بقيت عنوان
***
أنا أم درمان معبد الميس اصيلة وشوني رجال
لكن القدرة والتقديس أرادني شايق الاجال
تقلبت فوق ربوع داري .. ونفس انفاس أقداري
أريتم يعرفوا مسداري ويجلوا زماني للفرسان ..