Soya Beans Farming | Soya Beans Farming Profit | Vijay Karnataka

ಪ್ರತೀ ಬಾರೀ ಸೋಯಾ ಬೀನ್ ಬೆಳೆದು ಕೈ ಸುಟ್ಟುಕೊಳ್ಳುತ್ತಿದ್ದ ಬೀದರ್‌ನ ರೈತರಿಗೆ ಈ ಬಾರಿ ಸೋಯಾ ಬೀನ್‌ ಬೆಳೆಯೇ ಆಸರೆಯಾಗಿದೆ. ಈ ಬಾರಿ ಉತ್ತಮ ಮಳೆಯಾಗಿರುವುದರಿಂದ, ಭೂಮಿ ಸುಡುವ ಬೀದರ್‌ನಲ್ಲಿ ಸೋಯಾ ಬೀನ್‌ ಹುಲುಸಾಗಿ ಬೆಳೆದಿದೆ. ಮುಂಗಾರಿನ ಖಾತ್ರಿ ಬೆಳೆ ಎಂದೇ ಕರೆಯಲ್ಪಡುವ ಈ ಬೆಳೆಗೆ ಈ ಬಾರಿ ಒಳ್ಳೆಯ ದರ ಸಿಗುವ ನಿರೀಕ್ಷೆಯಲ್ಲಿ ರೈತರು ಇದ್ದಾರೆ.
ಬೀದರ್ ಜಿಲ್ಲೆಯ ಬೀದರ್‌, ಬಸವಕಲ್ಯಾಣ, ಔರಾದ್ ತಾಲ್ಲೂಕಿನ ಹಲವು ಗ್ರಾಮಗಳಲ್ಲಿ ರೈತರು ಸೋಯಾ ಬೀನ್‌ ಬೆಳೆದಿದ್ದಾರೆ. ಈ ಬಾರಿಯ ವರುಣನ ಆಶೀರ್ವಾದದಿಂದಾಗಿ ಕೃಷಿಗೆ ನೀರು ಲಭ್ಯವಿದ್ದು, ಕೃಷಿ ಇಲಾಖೆ ಯೋಜನೆಯ ತುಂತುರು ನೀರಾವರಿ ಸೌಲಭ್ಯ ಪಡೆದು ಬೆಳೆ ಹಾಕಿದ್ದಾರೆ. ಸೊಗಸಾಗಿ ಬೆಳೆದಿದರುವ ಸೋಯಾಬೀನ್ಗಳು ಇದೀಗ ಕಟಾವಿಗೆ ಬಂದಿದ್ದು, ಗದ್ದೆ ಪೂರ್ತಿ ಹಸಿರಿನಿಂದ ನಳ ನಳಿಸುತ್ತಿದೆ.
ಮುಂಗಾರು ಬೆಳೆಯ ನಂತರ ರೈತರು ಮುಂದಿನ ವರ್ಷದ ಬಿತ್ತನೆಗಾಗಿ ಜಮೀನನ್ನು ಹದಮಾಡಿ ಇಡುವುದು ಸಹಜ. ಆದರೆ ಈ ವರ್ಷ ಉತ್ತಮ ಮಳೆಯಾಗಿರುವ ಕಾರಣ ಮುಂಗಾರು ಹಾಗೂ ಕಬ್ಬು ಕಟಾವಿನ ಬಳಿಕ ಖಾಲಿಯಾಗಿರುವ ಜಮೀನಿನಲ್ಲಿ ಸೋಯಾಬೀನ್ ಬಿತ್ತಿದ್ದಾರೆ. ಒಂದು ಎಕರೆ ಸೋಯಾ ಬೀನ್‌ಗೆ 15 ಸಾವಿರ ಖರ್ಚು ತಗಲುತ್ತದೆ. ಕಪ್ಪು ಜಮೀನಿನಲ್ಲಿ ಎಕರೆಯೊಂದರಲ್ಲಿ 7 ರಿಂದ 8 ಕ್ವಿಂಟಲ್, ಕೆಂಪು ಜಮೀನಲ್ಲಿ 5 ರಿಂದ 6 ಕ್ವಿಂಟಲ್ ಇಳುವರಿ ಪಡೆಯಬಹುದು. ಮೂರೇ ತಿಂಗಳಲ್ಲಿ ಕಟಾವಿಗೆ ಸಿದ್ಧವಾಗುವ ಈ ಬೆಳೆಯ ನಿರ್ವಹಣೆ ಸುಲಭ. ಈ ಬಾರಿ ಕಟಾವಿಗೂ ಮುನ್ನವೇ ಬೆಲೆ ಏರುಮುಖದತ್ತ ಸಾಗಿದ್ದು, ರೈತರ ಮುಖದಲ್ಲಿ ಸಂತಸ ಉಂಟು ಮಾಡಿದೆ.

#Bidar #SoyaBean #Farmers

Our Website : https://Vijaykarnataka.com
Facebook:   / vijaykarnataka  
Twitter:   / vijaykarnataka