မြိုင်မြို့ သရက်ကွရွာ ပျူစခန်းကို တိုက်ခိုက်ရာ စခန်းသိမ်းနိုင်ပြီး စစ်အုပ်စု အလောင်းတွေ ရ၊

မကွေးတိုင်း၊ မြိုင်မြို့နယ်၊ သရက်ကွရွာ ပျူစောထီးစခန်းကို တော်‌လှန်ရေးတပ်တွေက သုံးရက်ကြာ ထိုးစစ်ဆင် တိုက်ခိုက်ခဲ့ပြီး ပျူစောထီးတွေ ထွက်ပြေးသွားလို့ ရွာကို အပြီးသတ် သိမ်းပိုက်ရရှိတယ်လို့ မြိုင် ပကဖ က သတင်း ထုတ်ပြန်ပါတယ်။

အဲ့ဒီ ပျူစခန်းသိမ်း တိုက်ပွဲအတွင်း စစ်ကူလာတဲ့ စစ်အုပ်စုကို ကြားဖြတ် တိုက်ခိုက်ရာ စစ်အုပ်စု ၁၄ ယောက် သေပြီး တော်လှန်ရေး ရဲဘော် နှစ်ဦး ကျဆုံးတယ်လို့ ဆိုပါတယ်။

မြိုင်မြို့ရဲ့ တောင်ဘက် လေးမိုင်ခန့်အကွာက စစ်အုပ်စုနဲ့ ပျူစောထီး ခန့်မှန်း အင်အား ၆၀ ခန့် အထိုင်ချတပ်စွဲထားတဲ့ သရက်ကွကျေးရွာ ပျူစောထီးစခန်းကို ဒီဇင်ဘာလ ၁၉ ရက် မနက် ၆ နာရီက စတင်ပြီး တော်လှန်ရေး တပ်တွေက ထိုးစစ်ဆင် တိုက်ခိုက်ခဲ့ရာ ပထမရက်မှာတင် ကျေးရွာထဲက နေရာ တော်တော်များများကို စီးနင်း သိမ်းပိုက်နိုင်ခဲ့ပြီး ဒီဇင်ဘာလ ၂၁ ရက်မှာတော့ စစ်အုပ်စုနဲ့ပျူတွေ ထွက်ပြေးလို့ ပျူစောထီးစခန်းကို အပြီးသတ် သိမ်းပိုက်ရရှိခဲ့တာလို့ မြိုင် ပကဖ တာဝန်ရှိသူတစ်ဦးက MFP ကို ပြောပါတယ်။

“ခွေးကင်းစင်‌နယ်မြေ အခုဖြစ်သွားပြီဗျ၊ ခွေးတွေ အကုန် ဆုတ်သွားတယ်။ ပျူစောထီးတွေပေါ့၊ အကြွင်းအကျန်တွေပဲ ကျန်တော့တာပေါ့။ သူတို့ ဆုတ်သွားတာဆိုတော့ ကျန်တဲ့ဟာတွေက အကုန် ယူသွားကြတာ” လို့ မြိုင်ပကဖ တာဝန်ရှိသူတစ်ဦးက ပြောပါတယ်။

ပျူစောထီးစခန်း စတင်သိမ်းပိုက်တဲ့နေ့မှာပဲ မြိုင်မြို့ပေါ်ကနေ အင်အား ၁၅၀ ခန့်ပါ စစ်အုပ်စု စစ်ကြောင်း တစ်ကြောင်း စစ်ကူလာရောက်လို့ တော်လှန်ရေးတပ်‌ဖွဲ့တွေနဲ့ ထိတွေ့တိုက်ပွဲ ဖြစ်ပွားခဲ့ပြီး ဗိုလ်အဆင့် အပါအဝင် စစ်အုပ်စု ၁၄ ယောက်‌ခန့် သေဆုံးကာ ၃၀ ခန့် ဒဏ်ရာရပြီး မြိုင်မြို့ဘက် ပြန်လည် ဆုတ်ခွာ ထွက်ပြေးတယ်လို့ ဆိုပါတယ်။

သရက်ကွရွာ ပျူစခန်းကို စွန့်ခွာထွက်ပြေးတဲ့ စစ်အုပ်စုနဲ့‌ပျူစောထီး အင်အား ၆၀ ခန့်ကတော့ မြိုင်မြို့ဘက် ထွက် မပြေးဘဲ ပျူစခန်းနဲ့ ငါးမိုင်ခန့်အကွာက စက်မှု-၂ အထိုင်စခန်းဘက် ထွက်ပြေးတာလို့ မြိုင် ပကဖ က ဆိုပါတယ်။

အဲ့ဒီ တိုက်ပွဲ အတွင်း ပခုက္ကူခရိုင် PDF တပ်ရင်း ၆ က တော်လှန်ရေး ရဲဘော်တစ်ဦးနဲ့ ပခုက္ကူခရိုင် PDF တပ်ရင်း ၇ က တော်လှန်ရေး ရဲဘော်တစ်ဦးတို့ ကျဆုံးခဲ့တယ်လို့ ဆိုပါတယ်။

သရက်ကွရွာ စခန်းသိမ်းတိုက်ပွဲကို မြိုင် ပကဖ ၊ပေါက်ပကဖ ၊ (မြိုင် ပေါက် ကမ္မ) ပကဖ တပ်ရင်း အမှတ် ( ၁ ၊ ၂) တပ်ရင်း ၊ ပခုက္ကူခရိုင် အမှတ် (၂ /၆/၇/၁၄/၁၅/၁၇ ) တပ်ရင်း ၊ အညာမြေတပ်ပေါင်းစု ၊ ကမ္မတပ်ပေါင်းစု ၊ PLC တပ်ပေါင်းစု ၊ 8+ စုဖွဲ့မှု ၊ ပခုက္ကူစုဖွဲ့မှုတပ်ရင်း ၊ဝံပု‌ေလွ ပြောက်ကျားတပ်ဖွဲ့ ၊ ဂဠုန်ပြည်သူ့ကာကွယ် ရေးတပ်ဖွဲ့ ၊ ဓားမင်းကြီးတပ်ဖွဲ့ နဲ့ ကိုအောင်ကြီးတပ်ဖွဲ့တို့က ပူးပေါင်းတိုက်ခိုက်သိမ်းပိုက်ခဲ့တာလို့ ဆိုပါတယ်။

သရက်ကွကျေးရွာဟာ ‌မြိုင်မြို့ရဲ့တောင်ဘက် လေးမိုင်ခန့်အကွာမှာ ရှိပြီး တော်လှန်ရေး တပ်တွေက ရိက္ခာနဲ့ စစ်ကြောင်းကို ဖြတ်တောက်ထားတာကြောင့် စစ်အုပ်စုက လေကြောင်းကနေ ရိက္ခာ ပို့ပေးနေရတဲ့ ကျေးရွာ ဖြစ်ပါတယ်။

MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
#Mandalay_Free_Press_MFP