Скачать или смотреть ซออื่อสี่แจ้งห้าประตูเมืองเชียงใหม่ | GT.YRC

เนื้อร้อง :

ไหว้สาปี้น้องตังหลาย บ่ว่าญิงจาย เฒ่าแก่
บ่ว่าเจ้าป้อ หนอแม่ หมู่ผดา คนฟัง
เฮานักเรียนยุพราช ได้จ้วยกั๋นจด กั๋นจ๋ำ
ได้จ้วยกั๋น จัดทำ เป็นระบำ เพลงอื่อ

จักกล่าวถึงประตูเวียง เจียงใหม่อัน ขึ้นจื้อ
เปิ้นนั้นได้แป๋งไว้หื้อ เจ็ดร้อยกว่าปี๋ เมินมา
ข้าศึกยากจะย่ำยุทธ์ สุดแสนลำบาก นั้นหนา
ก่เป๋นด้วยพระคุณา องค์กษัต๋า เจียงใหม่

ประตูที่หนึ่ง นั้นกา องค์กษัต๋า ได้เลือก
คือประตู๋จ๊างเผือก เอาไว้ติ๊ศเหนือของเวียง เป๋นประตู๋สำคัญ
เฮาก่อู้ได้ไปเปลื๋อง อยู่ตางติ๊ศเหนือของเวียง คือประตู๋ จ๊างเผือก

ยังมีฮูปปั้นมงคล นี้เป๋นฮูปปั้นจ๊างเผือก
อยู่หั้นตวยกั๋น สองเจื้อก ไว้อาฮักบ้าน ก๋ารเวียง
หนึ่งจื้อปราบจักร วาล เบ่นหน้าไปตาง หนเหนือ
สองตางวันตก ดีเหลือ ไว้ปราบหมู่มาร ยักษ์ใหญ่

บะเด่วนี้ก่อเจริญ ตางรัฐบาลเปิ้นเอาใจ๋ใส่
มีตึงคิวรถ ยิ่งใหญ่ เฮาได้เดินต้า เดินตาง
สัพป๊ะคัวกิ๋นเครื่องใจ๊ มีเต้าใดก่ตึงบ่ขาง
หมั่นเเซวแม่ก๊าว่างาม บ่ อดข้าวน้ำ สักเตื้อ


ประตูที่สองต่อมา คือประตู๋ สวนดอก
ยามจะเสด็จ ออกนอก เข้าสู่เขตอุท ยาน
บุ้ปผาลาจา ดอกไม้ หอมไกล๋ ทั่วใน เขตฐาน
ล้วนสะพรั่ง เบ่งบาน คือประตู๋ สวนดอก

สมัยพญากือนา ใฝ่ศาสนา สร้างวัดสวนดอก
ก้านกุ่งรุ่งเรือง สุดยอด เป๋นอารามหลวง ของเวียง
หื้อพระสุมน เถระ ได้จ๋ำพรรษา อ่านเขียน
สุโขทัยล่องมายังเวียง บ่เสียความเปียร เป๋นแน่

มหาวิทยาลัย ก่อยู่แวดไป โดยรอบ
ยามออกประตู๋สวนดอก มีตึงสวนสัตว์ โฮงยา
โฮงเฮียนก่มีอยู่หั้น ของนักเฮียนนักศึกษา
เลยไปแหมน่อยนั้นกา ก่เป็นดอย สุเทพ

ประตูที่สามต่อมา คือประตู เจียงใหม่
กันว่าจะไป ตางใต้ ก๊าขายยังเมือง หละปูน
เป็นเมืองโบราณ ก่อนนั้น บ่ได้ลบลาย หายสูญ
หริภุญไชย เมืองบุญ เมืองปี้เมืองน้อง เจียงใหม่

สมัยปัจจุบัน ก่เป๋นตี้ตั้ง ยังกาด
ของกิ๋นของว่านักเหลือขนาด พ่องเอามาจากบนดอย
ผลหมาก รากไม้ มีแผวแก๋งเห็ด แก๋งหอย
ฝรั่งผ้องเตวมากอย มีแผวลาบซ่า แก๋งอ่อม

กันว่าปี้น้องสายใต้ ผ้องใค่ปิ้กจอง ปิ้กบ้าน
ก่มีคิวรถ อยู่หั้น โดยสารปิ้กภูมิ ลำเนา
รถเมล์ดอยเต่า ออกจากเวียง รถเหลืองก่จะไหลไปหา
จ๋อมตองเมืองฮอดนั้นกา ก่ปากั๋นมา ตึงหมู่

ประตู๋ที่สี่ ต้าแป งดงามนักแก ตั้งอยู่ยิ่งใหญ่
ประตูเจียงเรือกนั้นไท้ เป๋นจื้อเก่าแก่ เดิมมา
ตะก่อนอยู่ติด น้ำปิง ตึงจายตึงญิง ไปฮิไปหา
เป็นแหล่งก๊าขาย นานา เอาล่องเเปมา ขึ้น ต้า

สมัยบ้านเมืองเจริญ ถนนคนเดิน นี้ก่ขึ้นจื้อ
เทศบาลเปิ้นจัดแต่งหื้อ แม่ก๊าได้มา ขายครัว
มีตึงของฝาก ของใจ๊ ของกิ๋นก่จ้าดลำจ้าดหนัว
ผ้องก่มา ขายครัว ผ้องก่มา เตวแอ่ว

ประตู๋ที่ห้า สวนปรุง อยู่เผิกเดวกับประตู๋เจียงใหม่
ทางการเปิ้นเอาใจ๋ใส่ ฮักษาไว้กู้ เวียงพิงค์
ธรรมเนียมสืบมาก่อนนั้น นี้เป๋นเรื่องแต๊ แน่จิ๋ง
ศพในเวียง ป้อจายแม่ญิง ต้องหามออกตี้ ประตูนี้เน่อ

เดิมจื้อประตูสวนแร ป้อสามฝั่งแกน เปิ้นกึ๊ดเปิ้นก่อ
ส่วนนามสวนปรุงนี้น่อ มาจากเตาปุง เหล็กตอง
ใกล้ๆประตู๋นั่นเล้า หล่อแป๋งพระเจ้าเป๋นโกฏิเป๋นก๋อง
ไผคนใดขึ้นกองล่องกอง เลยฮ้องสวนปรุงจื้อใหม่

ผ่านไปแล้วห้าประตู๋ เล่าเป๋นความฮู้ เหลือแหมสี่แจ่ง
จักได้ลำดับ ตัดแต่ง เล่าต่อหื้อท่าน ได้ฟัง
จะไปฟั่งเบื่อ ฟั่งก้าย ขอจะไปหน่าย ใส่กั๋น
ขอหื้อท่านได้อดดาฟัง ของเก่าโบราณ เจียงใหม่

แจ่งทีหนึ่ง จื้อ สะหลีภูมิ อยู่ทางขวา ประตู๋จ๊างเผือก
พญามังราย ได้เลือก สร้างเป็นแจ่งแรก ของเวียง
ตั้งไว้เป๋นมังคะละ หื้อเป๋นจัยยะ มีจื้อมีเสียง
เป๋นสะหลีแก่เวียง ไผไหนบ่เปียง บ่เต้า

แจ่งที่สองจื้อแจ่งหัวลิน มาจากรางริน ไหลหลาก
น้ำห้วยที่บนผาลาด ล่องไหลลงมา ตวยราง
มาสบยังแจ่งหัวลิน ไหลหลั่งเป๋นเส้นเป๋นหาง
ไหลเลาะไปตวยตาง เข้าสู่คูเมือง เจียงใหม่

แจ่งที่สามนั้นกา จื้อแจ่งกู่เฮือง อยู่ซื่อแอร์พอร์ต
ประวัตินี้ก่สุดยอด เกยเป๋นตี้ขัง พญา
คำฟู ป้อเจ้าคุมโดยหมื่นเฮือง นั้นหนา
บ่จ้างขะว่าใดจา เลยตั้งกู่เฮือง เป๋นเกียรติ

มาถึงสุดท้ายแล้วนา หยังมาอิดใจ๋ จะเล่า
ของบะเกื้อ บะเก่า บะหื้อได้หาย ลืมเลือน
ขอหละอ่อนรุ่นใหม่ ได้ช่วยกันบอกกันเตื๋อน
ฮักษาเขตกำแปงเมือง บ่หื้อมันม้าง มันแตก

มาถึงแจ่งสุดท้าย จะขอบรรยาย เนอท่าน
แจ่งนี้จื้อแจ่ง กะต๊ำ ฟังแล้วแปลกหู แปลกต๋า
เพราะเป๋นเครื่องมือเครื่องใจ๊ คนบะเก่าเอาไว้ยับปล๋า
สมัยตะก่อนเมินนา ตัดนี้เป๋นหนอง เป๋นบวก

บะเด่วก่ถึงเวลา เฮาพรรณนา จนไคว่
สี่แจ่งห้าประตูเจียงใหม่ ตามตี้ได้ว่า ออกมา
กำใดผิดพลาด ขอท่านยกโต้ด โตสา
ม่อนข้าจักขอวันตา ยกมือสุมา น้องปี้

จักขอขอบพระคุณ คุณครูที่ ปรึกษา
เปิ้นนั้นก่ได้อุตส่าห์ มาแนะแนวทาง ทำงาน
หื้อได้สำเร็จ ลุล่วง เปิ้นนั้นก่ได้ ประสาน
ฝากไว้เป็นต๋ำนาน คู่ยุพราช เจียงใหม่…

คณะผู้จัดทำ :

นายศรัณยพงศ์​วงค์ขัติย์
นายนครธน​​มูลไฝ
นายชลิต ​​ชัยเรืองสุข
นายธนนทัช ​​ก่าคำ
นายชาญณรงค์ ​สุเนตร

คำชี้แจง หลังจากชมสื่อซอแนะนำประตูเมืองและแจ่งเมืองเขียงใหม่แล้ว ขอความร่วมมือ ตอบแบบสำรวจความพึงพอใจที่มีต่อสื่อโดยเลือกให้ตรงกับระดับความคิดเห็น ดังนี้
5 คือ มากที่สุด
4 คือ มาก
3 คือ ปานกลาง
2 คือ พอใช้
1 คือ ปรับปรุง

อย่าลืมชมวิดีโอจนจบ ขอบคุณสำหรับความร่วมมือ
แบบสำรวจความพึงพอใจ : https://docs.google.com/forms/d/e/1FA...

เสียงปี่ประกอบฉาก Cr. ซออื่อ สตริง ปี่อินเหลา
สถานที่ : โรงเรียนยุพราชวิทยาลัย
ตัดต่อ : CapCut