„ოცნების“ საარჩევნო ვიდეოკლიპი რუსული სცენარით

„ქართულმა ოცნებამ“ გუშინ გამოაქვეყნა საარჩევნო კლიპი, რომელიც 2018 წელს რუსეთის საპრეზიდენტო არჩევნების დროს გამოქვეყნებული ვიდეოს სცენარის მსგავსია.

სოციალურ ქსელში „ოცნების“ ვიდეოს არაერთგვაროვანი გამოხმაურება მოჰყვა. ინტერნეტმომხმარებლების რეაქციას გამოეხმაურა შალვა პაპუაშვილი:

„სასაცილოა ცოლ-ქმრობის გამოცხადება რუსულ მოვლენად, თუკი ეს არის თქვენი იდეოლოგია, მაშინ რაღა უნდა ვთქვა. მაგრამ კიდევ ერთხელ, მადლობა, გაავრცელეთ ეს კლიპი
რაც შეიძლება, ბევრმა უნდა ნახოს“, - განაცხადა პაპუაშვილმა.

„ოცნების“ კლიპში, მთავარი პერსონაჟი „სიზმარში“ ხედავს კადრებს წინა ხელისუფლების მმართველობის დროს მომხდარი მოვლენებიდან, მათ შორისაა აგვისტოს ომი, სანდრო გირგვლიანის მკვლელობა, ვალერი გელაშვილის ცემა, საპროტესტო აქციების დარბევა და ა.შ., ამ კადრებს შორის მანიპულაციურადაა ჩასმული ოპოზიციონერი ლიდერების კადრებიც.

რაც შეეხება რუსულ ვიდეოკლიპს, აქ მთავარი პერსონაჟი „სიზმარში“ ხედავს, რომ 52 წლის ასაკში ჯარში იწვევენ და მასთან მისული ერთ-ერთი სამხედრო მოსამსახურე ფერადკანიანია; შვილი „სკოლაში უსაფრთხოებისთვის“ 4 მილიონ რუბლს სთხოვს; LGBTQI თემის წევრი ახალი კანონის თანახმად თავშესაფარს მის სახლში მოითხოვს. გასამძაფრებლად, კლიპში გამოყენებულია წითელი განათება და შემაწუხებელი მუსიკა.

კრიტიკული საზოგადოების ნაწილი ფიქრობდა, რომ ეს ვიდეო ან პუტინის კამპანიის შექმნილია ან ცენტრალური საარჩევნო კომისიის, თუმცა ცესკოსთან დაკავშირებულ კომპანიებს ეს არ დაუდასტურებიათ. ზოგიერთმა დამკვირვებელმა კლიპის შემქმნელები დაადანაშაულა სექსიზმში, რასიზმსა და ჰომოფობიაში.