搵錢呢啲嘢丨巨型麻雀萌生念頭 母女檔創業搞文創 推定製麻雀教外國人打牌

麻雀你打我又打，玩法離不開廣東牌、台灣牌等。資深建築師陳麗喬(阿Q)認為「人一世物一世，點都要試下做生意」。她有次為社區活動打造一副A3尺寸的麻雀，打了一場巨型四方城，結果在社交平台獲得大量好評。在女兒Kay提議下，母女雙劍合璧創辦麻雀文創品牌「 一筒」(Glocal Mahjong)，一起向海外旅客傳播香港麻雀文化。

阿Q有豐富建築設計經驗，曾參與不少本地項目，但不同於建築要精打細算，其創業經驗是「撞板撞出嚟」。她創立一筒之前，曾與一位合伙人在PMQ元創方開店，出售一些可以自由組合的模塊化傢俱，但她們沒有考慮到，旅客不會旅行時買傢俱，地點亦不方便本地客，生意很快就碰壁。

雖然傢俱店曾賺到一些錢，但之後也敵不過疫情等因素。「反正都係蝕，蝕都蝕得過癮啲」，阿Q決定大膽嘗試，與Kay把店舖轉型為麻雀文創店。熱衷創作的阿Q負責產品設計，以及人事管理；擁有創科和商業背景的Kay則負責網站設計，以及媽媽最不擅長的會計工作，「我人生最憎就係睇數，佢就將excel玩到神乎其技，所以我哋兩個都幾夾」。

不少子女都會嫌母親「煩」，更何謂母女一同創業？阿Q笑言她們有時也出現「代溝」分歧，曾經有次阿Q設計了一款海報，縱使自己很滿意，但女兒卻直言「嘩邊個睇呀咁老土，句嘢好似啲政府部門嘅感覺」。

雖然意見分歧有時使雙方激動，但是她們總會理解對方，「佢係代表咗年青人嘅個角度睇嘢，我個generation可能覺得靚，但係佢個generation覺得肉酸，我都要尊重」。一筒為兩人帶來不少磨合機會，「令到我哋呢係似朋友，多過似媽媽同女」。

店舖出售各式各樣的麻雀產品，例如明信片、筆、沙包等。阿Q坦言，現時很難做到全部產品都是原創，「因為佢(規模)細，你要走去跪玻璃咁求人哋幫你做嘢」，例如店鋪想生產10件產品，但工廠可能每次生產1,000件起跳，「人哋就唔睬你」。因此店舖定位是一個綜合各種麻雀產品的「平台」，會放售其他品牌的產品，不過最熱賣還是她的定製麻雀。

一筒製作全套A至Z 26個英文字母的麻雀，深受客人歡迎。最近就有客人訂製麻雀，用來求婚，「你做嘅小小產品係人哋一生中重要嘅紀念品，好有意思」。現成的單張麻雀盛惠80元，定制麻雀則200元。

她們冀利用麻雀推動本地文化，設計圖案除了十二生肖外，還有政府總部、青馬大橋和滙豐總行大廈等。她表示「麻雀雖小」是個優勢，每粒都可以發揮空間很大。

阿Q又指今時今日好講究顧客體驗，因此她們不局限於產品，還會定期開辦工作坊，教授廣東麻雀、為手工麻雀牌上色等，當中不乏一些海外人士參與。店舖未來還打算開發新活動，例如麻雀鎖匙扣工作坊等。

另外，公司會與一些機構或公司合作，教授員工如何打麻雀，甚至用她們的巨型麻雀做團隊建設(Team Building)，「你知打麻雀好睇個人性格嘅嘛」，參加者透過活動能知道自己和其他團隊成員的性格。

一筒正值新冠疫情時開張，阿Q表示當時的經營環境是最惡劣，沒有遊客來港，香港人「連開舖幾時開都唔知」，「蝕咗幾年好老實講」，幸好店舖堅持下來，在過去2年漸漸變得紮實，總算「搵到一條路」，其商品和體驗是市場沒有，有不少人主動邀請合作。阿Q強調不會濫造，因為她們的初衷不是純粹為賺錢，而是推廣傳統文化和知識。

對於店舖發展，她形容：「如果零到一係無中生有，我哋行緊就係一到二，每件嘢盡可能變成我哋原創嘅嘢。」最終目標不是開很多分店，反而是開一間店，集合博物館、商店、咖啡和體驗元素，讓客人由買到玩到食，全方位去感受這件事」。

(首播日期：22.11.2024）