Məsud Pezeşkiyanın çətin missiyası

https://t.me/AzadIranTelegram
İranda keçirilən növbədənkənar prezident seçkilərində iki turda gerçəkləşən gərgin mübarizədən sonra türk kimliyi ilə fəxr edən islahatçı namizəd Məsud Pezeşkiyan parlaq qələbə qazandı. Regionda və dünyada böyük maraq doğuran bu nəticə çoxları tərəfindən gözlənilməz, hətta sensasiyalı bir hadisə kimi qarşılandı. Hərçənd İranda son illərdə gedən daxili siyasi prosesləri diqqətlə izləyənlər və dərindən bilənlər üçün bu sonuc elə də qeyri-adi olmadı. Belə ki, İran İslam Respublikasının tarixində siyasi idarəçiliyin ənənəvi olaraq mövcud şərtlərdən çıxış edilməklə, mühafizəkar-islahatçı əvəzlənməsi üzrə getdiyi reallığını bir kənara qoysaq, Pezeşkiyanın seçkiyə buraxılması faktının özü diqqətli müşahidəçinin, necə deyərlər, dalağının sancmasına səbəb olmalı idi. Qədim Azərbaycan şəhəri Urmiyadan olan doktor Pezeşkiyanın namizədliyi 2021-ci ilin prezident seçkilərində təsdiq olunmamışdı. Bəs ötən üç il ərzində nə baş verdi ki, Pezeşkiyan seçkiyə buraxıldı? Yalnız islahatçı kəsimin təmsilçisi kimi? Axı meydanda Pezeşkiyandan daha çox islahatçı sayıla biləcək iddiaçılar vardı! Üstəlik, paniranist düşüncənin güclü olduğu islahatçı cərəyan içərisində Pezeşkiyan uzun illərdən bəri açıq-aşkar türk milli kimliyindən çıxış edən, İranda yaşayan etnosların hüquq bərabərliyini dəstəkləyən, nəhayət, İran parlamentində türk fraksiyası yaradıb onun başında duran bir şəxsiyyətdir. Elə isə seçkiyə buraxılan beş mühafizəkar namizədə qarşı niyə məhz ona yaşıl işıq yandırıldı?



#İran #seçki #prezident #Xameneyi #Pezeşkiyan #Cəlili #türk