அண்ணாமலைக்கு இசை மாலை 4k | C Sathya | Mahashivarathiri |

எப்பேர்ப்பட்ட மலை
🪔
அண்ணாமலை அண்ணாமலை அண்ணாமலை அண்ணாமலையே...

எப்பேர்ப்பட்ட மலை;
எப்பேர்ப்பட்ட மலை
எப் பார்வைக்கும்
அடங்கா மலை!

அப்பால் கடந்து செல்வோரையும்
தன்பால் ஈர்க்கும்
வசிய மலை!

பூமியின் கிரீடமாய்த் திகழும் மலை.
பொங்கிய கடலாய்த் தோன்றும் மலை.

மயிலின் அகவல் இசைக்கும் மலை.

ஞானியர் தம் பெயர்
தொலைத்த மலை.

அண்ணாமலை அண்ணாமலை
அண்ணாமலையே!
🌸
அன்பே காற்றாய்
அலையும் மலை.
சும்மா இருத்தலைக் காட்டும் மலை.

அசையாச் சொத்தாய் அமைந்த மலை. கேள்வியின் விடையாய் விரிந்த மலை.

வானத்தைப் பார்க்கும் நிர்வாண மலை...

மோனத்தை மொழியாய்க்
கொண்ட மலை...

தேடும் சாவியை ஒளித்த மலை.

பிறப்பும் இறப்பும் ஒழித்த மலை.

அண்ணாமலை அண்ணாமலை அண்ணாமலையே!
🌸

கல்லாய் மண்ணாய்த் தெரியும் மலை...
காலம் யாவும் கடந்த மலை!

பற்றை அறுக்கச்
சொல்லும் மலை.

பிறவியின் முடிச்சினை
அவிழ்க்கும் மலை.

ரமண பாதம் பதிந்த மலை.

இரகசியம் கோடி பொதிந்த மலை.

சித்தர்க்குக் கற்பித்தப் பள்ளி மலை.

ஜோதியைத் திலகமாய்
அணியும் மலை.

அண்ணாமலை அண்ணாமலை அண்ணாமலையே!

🌸

அடியவர் சுற்றி வந்த மலை.
'அருணாச்சல சிவ' ஒலிக்கும் மலை.

திருவாசகத்தைக் கொடுத்த மலை.
தெய்வ இருப்பின்
சாட்சி மலை.

உணராதவர்க்கோ
ஒன்றுமில்லை; உணர்ந்தவர்க்கெல்லாம்
எல்லாம் மலை!

அண்ணாமலை திரு அண்ணாமலை
அண்ணாமலை திருவண்ணாமலை!

எப்பேர்பட்ட மலை;
எப்பேர்பட்ட மலை;
எப்பேர்ப்பட்ட மலை...

நினைத்தாலே முக்தி மலை!

அண்ணாமலை
அண்ணாமலை திருவண்ணாமலையே!
🌸

#meditation
#annamalai
#devotional
#divine