Noda-Şingədulan-Xanəgah yolunda təmir işlərini yekunlaşdırmaq üçün 6.6 milyon manat vəsait ayrıldı

Ölkə başçısının sərəncamına əsasən 2013-cü ilin sonlarından etibarən Lerikin 30 min əhalinin yaşadığı Noda – Şingədulan –Xanəgah avtomobil yolunun əsaslı təmirinə başlanıldı. İki gün əvvəl isə Prezident İlham Əliyev sözügedən yolun təmirinin başa çatdırılması üçün əlavə 6.6 milyon manat vəsaitinin ayrılması ilə bağlı sərəncam imzaladı. Dövlət başçısının imzaladığı sərəncam sakinlərin hədsiz sevincinə səbəb oldu.


50 yaşayış məntəqəsini birləşdirən Noda – Şingədulan –Xanəgah avtomobil yolunda 2014-cü ilin əvvəlindən isə yolun asfaltlanma işlərinə başlanılaraq Zenoni kəndinə qədər çatdırıldı. Bu hissəyə kimi həmin yol üzərində yerləşən yaşayış məntəqələrinin sakinləri yol çəkiləndən işlərinin xeyli rahatlaşdığını, rayon mərkəzinə asanlıqla gələ bildiklərini deyirlər. Üstəlik əvvəllər itirdikləri saatlarla əlavə vaxta da qənaət etmiş olurlar. Bura isə yolun hələ ki, təmir olunmamış hissəsidir. Kadrlardan göründüyü kimi burada gediş-gəliş həddindən artıq çətindir. Yağış-qar yağanda isə yol demək olar ki, keçilməz olur. Təbii ki, bu 20-yə yaxın kəndin sakinləri üçün əlavə çətinliklər yaradır. Lakin artıq Ölkə başçısının imzaladığı sərəncamla onların da yol problemi öz həllini tapacaq. Məsələnin digər tərəfinə gəldikdə isə işin icrası zamanı ərazinin relyef şəraiti xüsusi diqqətlə nəzərə alınmalıdır. Əks halda yol çəkildikdən bir müddət sonra yenə dağıla bilər. Elə çəkiliş apardığımız zaman da bir neçə yerdə sürüşmə və çökmə halları müşahidə etdik. Yəqin ki, icraçı şirkət yolun qalan hissəsində iş apararakən bunu nəzərə alacaq.