Jadranski tsunami - plima, Vela Luka 1978.

dokumentarna emisija o plimi u Veloj Luci 21.06.1978. (HTV 2008.)

http://www.velaluka.hr/files/velaluka...

Plima u Veloj Luci, Izvor Oreb

Ispod Huma, Pinskog Rata
S miron sniva misto malo,
Pun je misec, sve se vidi,
Što noć sprema nî se znalo.

S kampanela ure tuču,
Bonaca je ćuha nima,
Kad iz vale glas se čuje:
«Judi, judi, vela plima!»

Trču čejad u nevoji
Spasit barke, vesla, mriže,
Koću, levut, arte cile,
Nevoja je sve to bliže.

Sve po malo ki da neće
Oplimalo rivu velu,
Pa se penje uza mîre,
Po štradama i kortelu.

I uliza već u dvore,
U konobe i gustrine,
Silon korte sve otvara,
Već se penje uz skaline.

Do kamara već je došla,
Prid plafunu je fermala,
Po svon forcon šija na se,
Jadna ti je naša vala.

Iz konobe uje diže,
Črne jame sve obliže,
Uzmutila i šporkala,
Sve butige oćušćala.

A u portu brode stuče,
I potopi i odvuče,
Nasrid lipe naše vale
Na suho su ribe ‘stale.

Lumin gori, svit se moli,
Sudnji dan je, šapću judi,
I daž dojde s vedra neba,
Bože, Bože, s nama budi!

S kampanela podne tuče,
Tad se smiru plimni vâli,
Ali usud pustoš osta,
Od Lučice pa do Kali,

I po ciloj našoj vali.

iz zbirke poezije: Oreb, Izvor (1990): Lanterna na škoju