Скачать или смотреть SERIKALI YAKAGUA MASOKO KATAVI, YASISITIZA USAFI NA BEI STAHIKI ZA BIDHAA.

Serikali ya Mkoa wa Katavi imeendelea kusimamia kwa karibu shughuli za biashara katika masoko, ikiwa ni sehemu ya juhudi za kuhakikisha wananchi wanapata huduma bora na kwa bei nafuu.

Hayo yamebainishwa leo, Novemba 6, 2025, wakati Katibu Tawala Msaidizi Sehemu ya Biashara, Viwanda na Uwekezaji, Bw. Florence Chrisant, alipongoza timu ya wataalamu kutoka Ofisi ya Mkuu wa Mkoa na Ofisi ya Mkurugenzi wa Manispaa ya Mpanda katika ukaguzi wa masoko kadhaa ndani ya Manispaa hiyo.

Masoko yaliyotembelewa ni Soko Kuu, Soko la Mpanda Hoteli, na Soko la Buzogwe, ambapo timu hiyo ilijiridhisha na hali ya upatikanaji wa bidhaa, mwenendo wa bei pamoja na mazingira ya usafi katika maeneo ya biashara.

Akizungumza baada ya ukaguzi huo, Bw. Chrisant alisema kuwa kwa ujumla hali ya biashara ni nzuri na bidhaa muhimu zinapatikana, ingawa ongezeko la bei ya maji ya kunywa bado lipo. Kwa sasa, chupa kubwa ya maji inauzwa kati ya shilingi 1,500 hadi 2,000, ikilinganishwa na shilingi 1,000 kabla ya kipindi cha uchaguzi.

Aidha, alitoa wito kwa viongozi wa masoko kuhakikisha usafi unazingatiwa ipasavyo, akisisitiza kuwa mkoa unaelekea katika msimu wa mvua na matunda, hivyo ni muhimu kuzuia uwezekano wa magonjwa ya mlipuko.

Kwa upande wake, Afisa Biashara wa Manispaa ya Mpanda, Bw. Paul Kahoya, alibainisha kuwa changamoto ya maji itapatiwa suluhisho muda si mrefu, kutokana na hali ya usambazaji kuwa imetengemaa na magari ya kusafirisha bidhaa kuruhusiwa kufanya kazi kwa uhuru.

Amesema pia kuwa tayari mwekezaji katika eneo la Kakese ameanzisha kiwanda cha maji, kitakachosaidia kupunguza kabisa changamoto ya upatikanaji wa maji mara michakato midogo iliyosalia itakapokamilika.

Viongozi wa masoko hayo wamepongeza uamuzi wa serikali kufuatilia kwa karibu shughuli za biashara, wakisema hatua hiyo imeongeza imani, ushirikiano na ari ya kufanya kazi miongoni mwa wafanyabiashara wa Mkoa wa Katavi.