warapitiya viduhala mahaoya මෙහෙම පාසලක් මෙහෙම ගුරුවරු මේ රටේ තවත් සිටිනවාද

දඹුල්ල කාංචන කුමාර ආරියදාස 0773416157 ඉමෝ 0706416157)

2024.10.04


මෙහෙම පාසලක් මෙහෙම ගුරුවරු මේ රටේ තවත් සිටිනවාද

මුළු මහත් පාසල් ගුරුවරුන්ට ආදර්ශයක් ලබා දෙමින් පාසලේ දරුවන් වෙනුවෙන් දිවා රාත්‍රී දෙකෙහි කැපකිරීම් කරන අපූරු පාසලක් පිළිබඳව තොරතුරක් අම්පාර මහඔය ප්‍රදේශයෙන් අපට වාර්තා විය.
අම්පාර මහඔය වරාපිටිය විදුහලේ ගුරුවරුන් දිවා කාලයේ පාසල් පවත්වා අපොස සාමාන්‍ය පෙළ සහ උසස් පෙළ දරුවන් සඳහා නැවත සවස 6 සිට රාත්‍රී දොළහ දක්වා පාසලේ පන්ති පවත්වමින් දරුවන්ට නොමිලේ සිප් සතර ඉගැන්වීම් කටයුතු සිදුකරයි.
ඉතාම ආර්ථික මට්ටමින් පහල දෙමව්පියන්ගේ දරුවන් අති දුෂ්කර වරාපිටිය පාසලේ අධ්‍යාපනය ලබයි, පළමු වසරේ සිට 13 වසර දක්වා මෙහි පන්ති පැවැත්වේ
අම්පාර දිස්ත්‍රික්කයට අයත් මහඔය වරාපිටිය ගම්මානය පිහිටා ඇත්තේ මහඔය නගරයේ සිට කිලෝමීටර් 20කට පමණ දුරකින් අති දුෂ්කර වූ ප්‍රදේශයක වීම විශේෂත්වයකි , පාසලේ මෙන්ම ගම්මානයේ ජනතාව ද දැඩි පානීය ජල අර්බුදයකට මුහුණ පා අහස් වැස්සෙන් හේන් ගොවිතැන් කරන ජනතාවක් වාසය කරති.
දරුවන් සඳහා උපකාරක පන්ති හෝ වෙනත් පන්ති කිසිවක් නොමැත ,ඔන්ලයින් පන්ති ක්‍රියාත්මක කිරීම සඳහා ආර්ථික ශක්තියක් මෙන්ම අන්තර්ජාල පහසුකම් ද මෙම ගම්මානයේ නොමැත.
මෙවරක් උසස් පෙළ විභාගය සඳහා සූදානම් වන දරුවන් පිරිසක් රාත්‍රී පාසල් පැමිණ ඇති අයුරු අහම්බෙන් අපට දැනගන්නට ලැබිණි, ඒ අනුව රාත්‍රියේ පාසලට යනවිටත් මෙම දරුවන්ට එහි උසස් පෙළ ඉගැන්වීම් කරන බී.එම් . ගාමිණී බස්නායක ගුරුතුමා ඉගැන්වීම් කටයුතුවල නිරතව සිටින අයුරු දැකගැනීමට හැකි විය , නියෝජ්‍ය විදුහල්පතිතුමා මෙන්ම විදුහල්පතිතුමාද රාත්‍රිය වනතුරුම පාසලේ රැඳී සිටීම විශේෂත්වයකි,
මෙම දරුවන්ගේ ආරක්ෂාව සඳහා ගුරුවරුන් සිදු කරන මනා කැප කිරීම පිළිබඳව දරුවන්ටද ඇත්තේ ඉහළ සතුටකිී විදුහල්පති වරයා සඳහන් කළේ අති දුෂ්කර ප්‍රදේශයක පිහිටි මෙම පාසලේ දරුවන්ගේ හෙට දවස සාර්ථක වනු දැකීම තමන්ගේ එකම අරමුණ බවය
ඒ අනුව වසර ගණනාවක සිට මෙම විදුහලේ ගුරුවරුන් සමග එක්ව සාමාන්‍ය පෙළ විභාගයට උසස් පෙළ විභාගයට මෙන්ම ශිෂ්‍යත්ව විභාගයට ද දරුවන්ට පාසලේ රාත්‍රී කාලයේ නොමිලේ පන්ති පැවැත්වීම සිදුකරගෙන යන බවය.
ඒ අනුව දරුවන් බොහෝ දෙනෙකු තම විද්‍යාලයෙන් ඉහළ සමාර්ථයන් ලබාගෙන තිබෙන බවද හෙතෙම සඳහන් කළේය . ගුරුවරයාගේ භූමිකාව දරුවන් හට ඉගැන්වීම බවද සඳහන් කරන්නට විය.
උසස් පෙළ විෂය උගන්වන බී. එම්. ගාමිණී බස්නායක ගුරුතුමාද සඳහන් කළේ මෙම දරුවන් වෙනුවෙන් ගුරුවරයකු ලෙස තමන්ට කළ හැකි සෑම කැපකිරීමක්ම දරුවන් වෙනුවෙන් සිදුකරන බවය.
රාත්‍රී කාලයේ අප විද්‍යාලයට යන විට දැක ගැනීමට හැකි වූ අපූරු තවත් දසුන් කිහිපයක් විය, එනම් රාත්‍රී රැගෙන එන ආහාරය කෙසෙල් කොලයක් ගෙන පාසලේම බංකුව මත එළා සියලු දෙනාගේ බත් එකට දමා වීදුහල්පතිවරයා නියෝජ්‍ය විදුහල්පතිවරයා උසස් පෙළ ගුරුවරයා මෙන්ම දරුවන්ද වටේ සිටගෙන එය අනුභව කොට නැවතත් පන්ති ආරම්භ කරනු ලබයි .
විද්‍යාලයේ පානීය ජලය නොමැත ගම්මානයේ ජනතාව ද ජලය සොයා ගැනීම සඳහා දැඩි දුෂ්කරතාවයකට නිරතව සිටි .රාත්‍රී කාලයේ මෙම දරුවන් බාල්දි වලට ගෙවල් ගානේ ගොස් ජලය එකතු කරගෙන විත් අවශ්‍යතාවය සපුරා ගන්නා අයුරුත් දැක ගැනීමට හැකි විය
ඇතැම් දිනවල වන අලින් ගැවසෙන නිසාවෙන් දරුවන් හට නිවෙස් වලට ගමන් කිරීමටද හැකියාවක් නැතිවි විදුහල්පතිවරයාගේ යතුරුපැදිය නියෝජ්‍ය විදුහල්පතිවරයාගේ යතුරුපැදිවලින් මෙම දරුවන් නිවෙස් වලට ඇරලවීමද විශේෂත්වයකි
උසස් පෙළ උගන්වන ගුරුවරයාට නිවසට යාමට නොහැකිවූ විට එම පංතියකම නිදාගන්නා බවද සිසු සිසුවියන් දැඩි වේදනාවෙන් යුතුව සඳහන් කරන්නට විය.
පසුදා උදෑසන අනෙක් දරුවන් පාසලට පැමිණෙන විට රාත්‍රී ඉගැන්වීම් කටයුතු කළ ගුරුවරයා පන්ති කාමර මෙන්ම පාසලේ කාර්යාල පරිශ්‍රයද අතු ගා පිරිසිදු කරන අයුරු අහම්බෙන් මෙන් අළුයම් කාලයේ අපට දැක ගැනීමට හැකි විය.
වෙනත් පාසල්වල මෙන් නොව උදෑසන පාසලට එන දරුවන් විශාල වතුර බෝතල් වතුර බාල්දි රැගෙන එන දසුන්ද පුදුමය දනවන්නට විය , ඇතැම් දරුවන් ගේ පාදවල සපත්තු සෙරෙප්පු සහ කිසිදු පාවහන් යුගලක් නැති දරුවන්ද උදෑසන පාසලට පැමිණ ක්‍රීඩා පිට්ටනියේ ක්‍රීඩා කරන අයුරුද දැක ගැනීමට හැකි විය
එම දරුවන් ක්‍රිකට් සෙල්ලම් කරන දුටුවේ පොල් පිත්තකින් කපාගත් බැට් වලින් වීම විශේෂත්වයකි
ගුරුවරුන් හා දරුවන් එක්ව හෙට රට භාර ගැනීමට දරන මෙම උත්සාහය මුළු මහත් ගුරු පරපුරටම සිසු පරපුරටම ආදර්ශයකි , මෙවැනි ගුරුවරුන් ඇගයීමට ලක් කිරීම රජයේ සහ අධ්‍යාපන බලධාරීන්ගේ වගකීමකි
එහෙත් අම්පාර මහඔය වරාපිටිය නැමැති දුෂ්කර ගම්මානයේ ගුරුවරුන් මේ හා විශාල කැපකිරීමක් කරනවාද යන්නම රටේ අධ්‍යාපන බලධාරීන් නොදන්නවා ඇත.