Скачать или смотреть ထိုင်းကြားခံနဲ့ အာဆီယံထဲ မြန်မာ ပြန်ဝင်ဆံ့လာမလား - BBC News မြန်မာ

ထိုင်း နိုင်ငံခြားရေးဝန်ကြီး ဆီဟာဆတ် ဖုန်ကတ် ကရောင်းဟာ စစ်ကော်မရှင် နိုင်ငံခြားရေး ဝန်ကြီး ဦးသန်းဆွေနဲ့ ထိုင်းနိုင်ငံတောင်ပိုင်း၊ အပန်းဖြေ ကမ်းခြေမြို့ ဖူးခက်မှာ မကြာခင်ကပဲ တွေ့ခဲ့ပါတယ်။ အဲဒီလို တွေ့ဆုံ အပြီး သတင်းထောက်တွေကို ထိုင်းနိုင်ငံခြားရေး ဝန်ကြီးက ပြောတာတွေထဲ
ထိုင်းအနေနဲ့ မြန်မာနဲ့ အာဆီယံကြား ကြားခံ တံတား သဖွယ် ကူညီသွားလိုတယ် ဆိုတာမျိုး ပါဝင်ပါတယ်။

ဒီတစ်ပတ် သတင်းမြင်ကွင်း အစီအစဥ်မှာ မြန်မာ့အရေးမှာ ထိုင်းရဲ့ ရပ်တည်မှု အပေါ် သုံးသပ်ချက်ကစလို့၊ စီးပွားရေးနဲ့ တည်ငြိမ်ရေး၊ နယ်စပ်ကုန်သွယ်ရေး၊ ကမ်းလွန် ရေနံနဲ့ သဘာဝဓာတ်ငွေ့ တူးဖော်မှု စွမ်းအင်ကဏ္ဍ တို့ အပေါ် အလေးပေး ပြောနေတဲ့ ထိုင်းဟာ မြန်မာ့အရေးမှာ တရုတ် အစိုးရနဲ့ ရပ်တည်မှု ထပ်တူ တူလာတာမျိုးလား၊ ရွေးကောက်ပွဲလွန် ပေါ်လာမယ့် စစ်တပ် ကျောထောက်နောက်ခံပြု မြန်မာ အစိုးရသစ်ကို အာဆီယံထဲ တွဲခေါ်သွားမလား၊ ဒီမိုကရက်တစ် အင်အားစု တော်လှန်ရေး အင်အားစုတွေနဲ့ရော ဆက်ဆံရေးတံခါး ဖွင့်ထားမလား၊ လက်ရှိ အာဆီယံ အလှည့်ကျ ဥက္ကဋ္ဌ ဖိလစ်ပိုင် အနေနဲ့ရော မြန်မာ့အကျပ်အတည်း ပြေလျော့စေရေး ဘယ်လောက် စွမ်းဆောင်နိုင်မလဲ ... စတာတွေကို ကျယ်ကျယ်ပြန့်ပြန့် ဆွေးနွေးထားပါတယ်။

ဒီတစ်ပတ် အစီအစဥ်မှာတော့ ထိုင်းအမျိုးသမီး သုတေသနပညာရှင်၊ လက်ထောက် ပါမောက္ခ ဒေါက်တာ ဆူရာချာဏီ ဟမ္မလီ ဆီးယိုင်ကို ဖိတ်ခေါ်ထားပါတယ်။ ဒေါက်တာ ဆီးယိုင်ဟာ အစိုးရပိုင်း ဆိုင်ရာ ကိစ္စတွေနဲ့ ဗျူဟာမြောက် ဆက်သွယ်ရေး ကဏ္ဍတွေမှာ အထူးပြု အကြံဥာဏ်တွေ ပေးနေတဲ့ S&I Strategic Advisory အဖွဲ့ကို ပူးတွဲ ထူထောင်သူ တစ်ဦး ဖြစ်ပါတယ်။ ဒါ့အပြင် နေရပ်စွန့်ခွာ ထွက်ပြေးကြရတဲ့ လူနည်းစုတွေကို စာနာမှု အကူအညီတွေ ပေးနေတဲ့ SHADE အဖွဲ့ကိုလည်း ယာယီ ညွှန်ကြားရေးမှူး အဖြစ် ဦးဆောင်ခဲ့သူ ဖြစ်ပါတယ်။

ဘီဘီစီသတင်းထောက် ကိုဝေဖြိုး စီစဥ် တင်ဆက်ထားတာကို ဖေဖေါ်ဝါရီလ ၂၈ ရက်၊ စနေည မြန်မာစံတော်ချိန် ည ၈ နာရီမှာ ဘီဘီစီမြန်မာပိုင်းရဲ့ ဖေ့စ်ဘုတ် စာမျက်နှာနဲ့၊ ည ၈ နာရီခွဲ အချိန် ဘီဘီစီမြန်မာပိုင်းရဲ့ ယူကျုချန်နယ်တို့ကနေ ထုတ်လွှင့် သွားမှာမို့ စောင့်မျှော် ကြည့်ရှု နိုင်ကြပါတယ်။ #ဘီဘီစီမြန်မာပိုင်း #သတင်းမြင်ကွင်း