LYRICS | Heestii Laaley | Hibo Maxamed Huddoon (Hibo Nuura)

Heestii: Laaley
Ereyadii: Maxamed Cali Kaariye
Laxankii Cabdikariim Jiir
Codkii: Hibo Nuura

Laaley dusheediyo
Laag iyo xarar-dheer
Laan gebi ku taallooy
Lulayaan dabayluhu
Xiisaha ku laalane
Kalgacaylki lumiyee
Loxoskii ku dumiyee
Guurkii luggooyee
Leef oo ha liqintaa
Lurka ii horseeddee
Laabtaydaneey! Lullulka iga daa.

Lahashada naftaydiyo
Caqligaa legdamayoo
Leexadan i sidatee
Maanka iga labeysaa
Shimbiraha lalaayee
Ku dabbaasha laydhaa
Looyaama duurbaa
Anna i lallabayee
Leef oo ha liqintaa
Lurka ii horseeddee
Laabtaydaneey! Lullulka iga daa.

Luquntayda dheer iyo
Laafyaha garaaraha
Dhabannada labeenta leh
Midabkaygan luulka ah
Nimaan laasanayn oo
Luf-lufku u macaan yahay
Anigaa u loogoo
Lingaxa uga gooyee
Leef oo ha liqintaa
Lurka ii horseeddee
Laabtaydaneey! Lullulka iga daa.